Salamo

TO TE ATUA RA HANAHANA I TO ˈNA RA EKALESIA.

Na te Menasehe, na nia i te Neginota. E Salamo e himene na Asapha.

76 Ua itea te Atua i Iuda; e te rahi ra to ˈna iˈoa i Iseraela. 2 Tei Salema to ˈna tiahapa, e tei Ziona to ˈna parahiraa. 3 I reira oia i te ofatiraa i te mau ohe o te fana ra, te paruru, e te ˈoˈe, e te tamaˈi ra. Sela.

4 E Ziona, e unauna rahi to oe e te maitai, i to te mau mouˈa îî i te taoˈa no te pau ra. 5 Te feia itoito ra, ua pau ïa i te harua: e te taoto ra ratou i to ratou taotoraa: e aita ra hoi to taua mau taata ra puai i te iteraa i to ratou rima ei faaora ia ratou. 6 I to oe ra aˈoraa mai, e te Atua o Iakoba, te taata puaahorofenua e te puaahorofenua atoa ra ua mairi te taoto.

7 O oe, o oe tei mǎtaˈu-rahi-hia! e o vai te mau i mua ia oe ia tupu to oe ra riri? 8 Ua itea to tuuraa utua mai te raˈi mai, mǎtaˈu aˈera te fenua, e ua mamû ihora: 9 a tia mai ai te Atua i nia e faaau i te utua, ia ora tei roohia e te ati i te fenua nei. Sela. 10 E haamaitaihia oe i te riri o te taata nei; e te toea o taua riri ra, na oe ïa e tapea. 11 A euhe, e a faatupu i taua euhe ra, i to outou Atua ra ia Iehova; e te feia atoa i o ˈna ra e ati noa ˈˈe e hopoi ïa i te ô ia ˈna i tei au ia mǎtaˈuhia ra. 12 E faataiâ oia i te aau o te hui arii ra; e mǎtaˈu hoi te hui arii o te fenua nei ia ˈna.