Salamo
TO DAVIDA HAAPURAA, E TE POHERAA O TO ˈNA RA MAU ENEMI.
Sigaiona a Davida, ta ˈna i himene ia Iehova, no te parau a te ati Beniamina ra te parau a Kusa.
7 E tau Atua, e Iehova, te tiaturi nei au ia oe; ia ora vau, e faaora ia ˈu i te feia atoa e hamani ino mai ia ˈu nei; 2 o te riro ratou mai te liona, i te amuraa ia ˈu; o te hahae huˈahuˈa roa ia ˈu, e aita e faaora.
3 E tau Atua, e Iehova, i na reira vau ra: e te vai nei te hara i tau rima: 4 ua hamani ino atu vau i tau hoa, (ua faaora râ vau i tei enemi hara oe noa ia ˈu nei:) 5 a auau mai taua enemi ra a rave mai ia ˈu; a taataahi oia ia ˈu i raro i te repo; e tau hinuhinu nei e tuu oia i raro i te vari! Sela.
6 A tia, e Iehova, ma to riri: a tia i nia, i te riri rahi hoi o tau mau enemi; a ara oe no ˈu nei i te haavaraa ta oe i faaue ra. 7 Ia haaati mai te mau taata i amuihia ra ia oe: e tena na, e hoˈi oe i nia i te vahi teitei ra, no ratou: 8 na Iehova e tuu i te parau-tia i te mau taata ra: e hiˈo mai oe ia ˈu, e Iehova, i te parau-tia na ˈu ra, e te haavare ore i roto ia ˈu nei. 9 Ia faahope-roa-hia te ino o te feia parau ino ra; e haamau râ oe i te feia parau-tia: e Atua parau-tia hoi oe, o tei imi i te aau o te taata e te manaˈo. 10 No ǒ i te Atua ra to ˈu paruru e ora ˈi au nei; e faaora oia i tei tia te parau i te aau ra. 11 E haava parau-tia te Atua; i ore i tuutuu ai to ˈna riri i te feia parau ino ra. 12 Ia ore oia ia fariu ra, e faaina oia i ta ˈna ˈoˈe ia ˈna; ua faafefe oia i tana fana, 13 E ua ineine, e ua faaau-maite-hia te raau e pohe ai te reira: ua rave oia i ta ˈna mau ohe i mirahia no te feia hamani ino ra. 14 Inaha! ua tô te taata ino i te parau tia ore, e ua hapu i te haavare; e mea faufaa ore ra ta ˈna e fanau. 15 Ua ô oia i te apoo, e ua hohonu: e hiˈa râ oia i roto i taua apoo i ôhia e ana ihora. 16 E hoˈi mai to ˈna ino i nia iho i tana upoo; e iri mai hoi to ˈna iria i nia i te tupuai upoo no ˈna iho. 17 E haamaitai au ia Iehova i te parau-tia na ˈna i reira, e himene au ma te haamaitai i te iˈoa o Iehova teitei roa ra.