Salamo

TE PURE NA DAVIDA I TE HOPOIRAAHIA TE AFATA RA.

Na te Menasehe. E Salamo e himene na Davida.

68 Ia tia mai te Atua, e ia haapurara i to ˈna mau enemi! e te feia i riri ia ˈna ra, e maue ê atu ïa i mua i to ˈna mata! 2 Mai te au auahi e pee ra, ia pee atoa ratou! mai te tapau e tahe i te auahi ra, ia na reira to te paieti ore pohe i te aro o te Atua! 3 Ia oaoa râ te feia parau-tia e ia ouˈauˈa noa i te aro o te Atua; e ia rahi to ratou oaoa.

4 E himene te Atua, e himene haamaitai i to ˈna iˈoa; e faateitei i tei horo na roto i te reva ra; o IA to ˈna iˈoa, e ouˈauˈa outou i mua i tana aro. 5 O te metua o te mau otare, e te haava o te mau ivi, o te Atua ïa i to ˈna ra parahiraa moˈa. 6 E tuu hoi te Atua i te putii ia parahi i to ˈna ra utuafare, e tei tapeahia i te fifi auri ra, na ˈna ïa e tatara; area tei hauti ra, e parahi ïa i te fenua mǎrô.

7 E te Atua e, ia oe i haere na mua i to oe ra mau taata: ia oe i haere na roto i te medebara ra; Sela. 8 Ua aueue ihora te fenua, e ua tarapape hoi te mau raˈi i te aro o te Atua e o Sinai atoa ra, i te aro o te Atua, te Atua o Iseraela. 9 Ua manii maira ia oe te ûa rahi, e te Atua e, e te tufaa rohirohi na oe ra, ua turuhia ïa e oe; 10 ua parahi hoi to oe ra pǔpǔ taata i rotopu i te reira: no to oe hamani maitai i faanahonaho ai oe, e te Atua, i ta te taata rii.

11 Ua tuu mai te Fatu i te parau, e e pǔpǔ rahi te feia i faaite ra. 12 Te mau arii o te mau nuu ra ua maue, ua maue, e te mau fetii i te utuafare ra, te tufa ra i te taoˈa pau. 13 Taoto noa iho â outou i te pae auahi ra, e riro outou mai te pererau uupa i tapoˈihia i te ario, e tei faairavarava-haere-hia i te auro ra. 14 Ia purara ˈtura taua mau arii ra i te Puaihope i reira ra, ua riro ïa i te uouo mai te hiona i Salamona.

15 E au te mouˈa o te Atua i te mouˈa ra o Basana; e mouˈa teitei rahi mai te mouˈa ra o Basana. 16 Eaha outou i feii ai, e te mau mouˈa teitei na, i te mouˈa ta te Atua i hinaaro ei parahiraa? e na Iehova e parahi i reira e a muri noa ˈtu. 17 Te mau pereoo a te Atua ra e piti ahuru i te tausani: ua ahuru te taauraa i te melahi maitatai; tei roto te Fatu ia ratou i roto i te vahi moˈa ra mai tei Sinai ra. 18 Ua reva oe i nia, ua aratai oe i te tîtî e rave rahi; e ua tufa oe i te taoˈa na te taata ra; e i roto atoa i te feia i hauti atoa ra, ia parahi te Atua ra, o IA, i roto ia ratou.

19 Ia haamaitaihia Iehova, o tei tauturu mai ia tatou i tera mahana, i tera mahana! o taua Atua nei to tatou ora: Sela. 20 O to matou nei Atua, o te Atua ïa e ora ˈi; no te Atua hoi, no Iehova, i ora ˈi tatou i te mau pohe nei. 21 Ua tairi râ te Atua i te upoo o to ˈna mau enemi, e te tupuai upoo o te feia i mau mârô i ta ratou hara. 22 Ua parau hoi Iehova, E aratai mai au ia ratou mai Basana mai, e e aratai hoi au ia ratou mai tahatai maira mai te moana; 23 ia uhi oe i to avae i roto i te toto o to mau enemi, e ia miti te arero o to mau urî ra i te reira.

24 To oe ra mau haerea, e te Atua, te hiˈohia nei e te taata; te haerea o tau Atua, o tau arii i te vahi moˈa ra! 25 Ua na mua te mau himene, muri iho te feia i faaoto i te mau peu i rotopu i te mau paretenia i te faaotoraa i te tophe ra. 26 E haamaitai i te Atua i roto i te amuiraa; te fanauˈa a Iseraela tei haamaitai i te Fatu. 27 Teie hoi o Beniamina, taata apî ra, o to ratou ïa aratai; te mau arii o Iuda, e to ratou atoa ra pǔpǔ: te mau arii o Zebuluna, te mau arii o Naphatali.

28 Ua faaue to Atua i to oe ra puai: e haapapu na, e te Atua, i ta oe i rave no matou nei. 29 E no to oe ra nao i Ierusalema, e hopoi mai ai te mau arii ra i te taoˈa na oe. 30 E aˈo atu oe i te taehae o te uruaeho ra, te amuiraa o te puaatoro ra, e te mau puaatoro apî o te mau taata ra, a auraro maite ai ratou ma te maa ario i te rima: e haapurara oe i te feia i hinaaro i te tamaˈi. 31 E tae mai te feia rarahi no Aiphiti mai; e ru maite hoi Kusa i te horoa i tana rima i te Atua.

32 E te mau basileia o te ao nei, e himene outou i te Atua, e himene ei haamaitai ia Iehova; Sela. 33 Ia ˈna i tei horo na nia i te ra ˈi teitei tahito ra; inaha, haruru ihora tana reo rahi i te patiri! 34 E tuu atu i te puai i te Atua ara; tei nia ia Iseraela to ˈna mana e tei te mau raˈi ra to ˈna puai. 35 Mataˈutaˈu-rahi-hia to oe, e te Atua, i to oe vahi moˈa ra, o te Atua o Iseraela o Iehova, oia tei horoa mai i te itoito e te puai i to ˈna ra taata: ia haamaitaihia te Atua.