Salamo
TE PURE RA DAVIDA IA FAAORAHIA I TO ˈNA RA MAU ENEMI.
Na te Menasehe, Ale-tasekita. Miketama a Davida i te tonoraahia mai e Saula te vea e tiai i te fare, e taparahi ia ˈna.
59 Ia ora vau, e tau Atua, i to ˈu nei mau enemi; e faatia mai oe ia ˈu i tei mârô mai ia ˈu nei. 2 Ia ora vau i te feia rave parau ino ra, e faaora ia ˈu i te feia i hinaaro i te toto ra. 3 Inaha, te moemoe ra ratou ia ˈu ia pohe; ua amui mai te feia mana ra ia ˈu; e ere râ no te hara, e Iehova, e no te ino na ˈu i rave. 4 Ore noâ te hara te horo maira ratou, te faaineine ratou ia ratou iho; a ara na, e hiˈo mai, ei tauturu ia ˈu. 5 O oe te Atua sabaota, e Iehova, e te Atua o Iseraela e, a ara e tahoo atu i te mau etene ra; eiaha e faaherehere i te feia e rave mârô i te ino ra. Sela.
6 E hoˈi mai ratou i te ahiahi; mai te urî e aoa ra, horo haere noa ˈi i te oire atoa nei. 7 Inaha! te puroro nei te ino na roto i to ratou vaha; e ˈoˈe tei to ratou vaha: o te na ô nei ratou, O vai te faaroo mai? 8 O oe ra, e Iehova, te ata ra oe ia ratou: e tâhitohitoraa te mau etene na oe.
9 No to ˈna puai, e tiai atu â vau ia oe! o te Atua hoi to ˈu pare ati. 10 Na te Atua e aroha mai ia ˈu nei, e tauturu mai ia ˈu; na te Atua e faaite mai i tau mau enemi i te pauraa.
11 Eiaha e taparahihia, a moe tau mau taata nei; e haapurara râ oe ia ratou i to oe iho mana; e huri ia ratou i raro, e to matou paruru, e Iehova e! 12 I te hara a to ratou vaha, te parau ta ratou i parau ra, e to ratou teoteo ia riro atu ratou; e te tuhi e te haavare i ta ratou i parau ra. 13 Ia pau, ia pau roa ratou i te riri, e eiaha roa ia toe; ia ite ratou e tae noa atu i te hopea o te fenua nei, e tei te Atua te hau ia Iakoba ra. Sela.
14 I te ahiahi e hoˈi mai ai ratou, e mai te urî ra i te aoaraa, haaati noa ˈi i te oire nei: 15 ia ori haere noa ratou e imi i te maa, e ia uuru ra ia ore ia paia ra. 16 Area o vau nei; e himene au i te mana na oe ra; e himene hua vau i te mau poipoi atoa nei i te aroha no oe: no te mea o oe te faatia ia ˈu nei; e te haapuraa i te mahana e ati ai ra. 17 E tau puai, e himene au ia oe ra: o te Atua, te Atua i arohahia mai ai au ra, o te faatia ïa ia ˈu nei.