Salamo

TE HAAMAITAI RA DAVIDA I TE ATUA.

E Salamo na Davida i to ˈna faahuru-ê-raa ia ˈna iho i mua ia Abimeleka: o tei tiavaru atu ia ˈna, e ua haere atura oia.

34 E haamaitai â vau ia Iehova e ore e faaea; ia vai tamau maite â te haamaitai ia ˈna i roto i to ˈu nei vaha. 2 E arue tau aau ia Iehova; ia ite mai tei pohe ra i te reira a oaoa atoa ˈi. 3 E haamaitai tatou ia Iehova; tatou atoa te faateitei i to ˈna iˈoa. 4 Ua imi au ia Iehova, e ua parau maira oia ia ˈu; e ua faaora ia ˈu i te mau mea ta ˈu i mǎtaˈu ra. 5 Ua hiˈo atu ratou ia ˈna, e ua haamaramaramahia mai; e aore to ratou mau mata i haama. 6 Ua pii atura taua taata i pohe nei, e ua faaroo maira Iehova; e ua faaora ˈtura ia ˈna i to ˈna atoa ra mau ati. 7 Te patia nei te melahi a Iehova i te puhapa e ati noa ˈˈe i te feia i mǎtaˈu ia ˈna, e ua faaora ia ratou. 8 A tamata na ia ite i te maitai o Iehova! e ao to te taata i tiaturi ia ˈna ra. 9 A mǎtaˈu ia Iehova, outou te feia moˈa no ˈna ra! aore hoi e ereraa to te feia i mǎtaˈu ia ˈna ra. 10 Ua ere te mau liona apî i te maa, e te pohe ra i te poia; area tei imi ia Iehova ra, e ore roa e ere i te maitai. 11 A haere mai na, e te mau tamarii na, e faaroo mai ia ˈu; e haapii au ia outou ia mǎtaˈu ia Iehova. 12 O vai ïa taata i hinaaro i te ora, tei hinaaro ia ite i te maitai i to ˈna pue mahana i te ao nei? 13 A tapea i to arero i te ino, e to vaha eiaha ia parau i te parau haavare. 14 E haapae i te ino, e rave i te maitai; e imi i te hau, e aruaru atu. 15 Tei te feia parau-tia ra to Iehova mata; e tei ta ratou pure to ˈna tariˈa. 16 E mata ê râ to Iehova i te feia i rave i te ino ra, e ia ore roa ia manaˈohia i te ao nei. 17 Te tiaoro nei te feia parau-tia, e te faaroo maira Iehova; e te faaora nei oia ia ratou i to ratou mau ati atoa ra. 18 Te fatata nei Iehova i te feia aau paruparu ra; e te faaora nei oia i te taata aau taiâ. 19 E ati rahi to te taata parau-tia ra; e faaorahia râ oia e Iehova i taua mau ati atoa ra. 20 Na Iehova e tiai i to ˈna ra mau ivi; e ore roa te hoê e ofatihia. 21 E pohe te paieti ore i te ino; e tei riri i te feia parau-tia ra, e mou ïa. 22 E faaora Iehova i te varua o to ˈna ra mau tavini; e ore hoi te hoê e tiaturi ia ˈna ra e faaruehia.