Salamo

TE HAAPOPOU RA DAVIDA I TE FARE NO TE ATUA.

E Salamo na Davida.

27 O Iehova to ˈu maramarama e to ˈu ora: o vai hoi ta ˈu e mǎtaˈu atu? o Iehova te tiai ia ˈu; e mǎtaˈu hoi au ia vai?

2 I te haerea mai o te mau taata iino ra, to ˈu ra mau enemi e tei riri mai ia ˈu, i te tiiraa mai ia ˈu ra e rave e amu, ua turori ihora ratou iho, hiˈa ihora. 3 Patia noa mai â te nuu atoa ra i te puhapa ia ˈu nei, e ore tau aau e mǎtaˈu: e ia tupu noa mai â te tamaˈi ia ˈu nei, e tiaturiraa ïa to ˈu i reira.

4 Hoê a ˈu mea hinaaro ia Iehova ra, e o ta ˈu ïa e titau hua nei; ia parahi â vau i roto i te fare o Iehova e hope roa ˈˈe o ˈu pue mahana, ia ite vau i te maitai o Iehova, e ia ui maite au i roto i to ˈna nao. 5 Ia roohia hoi e te ati ra e huna ˈi oia ia ˈu i roto i to ˈna tiahapa; e faatapuni oia ia ˈu i roto i te vahi moe i to ˈna ra fare, a tuu ai ia ˈu i te vahi teitei ra.

6 Ei teie nei oia e faateitei ai i tau upoo, i to ˈu atoa nei mau enemi e ati noa ˈˈe, ia hopoi au, i to ˈna ra sekene, i te tusia oaoa, e himene hoi au e e himene haamaitai hoi ia Iehova. 7 E haapao mai, e Iehova, i tau reo; ia tiaoro atu vau ra, e aroha mai, e faaroo mai ia ˈu.

8 Ia parau mai oe e, E imi mai outou i tau mata, te parau nei tau aau, E imi ïa vau i to mata, e Iehova. 9 Eiaha oe e huna ê atu i to mata ia ˈu nei: eiaha to tavini e haapae-riri-noa-hia: ua tauturu mai hoi oe ia ˈu, eiaha vau e faarue-ê-hia, eiaha oe e taiva ia ˈu, e tau Atua, e tau Ora! 10 Faarue noâ tau metua tane e tau metua vahine ia ˈu, ei reira Iehova e rave mai ai ia ˈu. 11 E haapii mai oe, e Iehova, i to oe ra eˈa, e aratai ia ˈu na te eˈa manina, no to ˈu nei mau enemi. 12 Eiaha oe e horoa ia ˈu i te hinaaro o tau mau enemi; ite haavare anaˈe tei tia mai e mârô ia ˈu, e te uˈana maira to ratou riri ia ˈu. 13 Te manaˈo nei râ vau, e noaa ia ˈu te maitai o Iehova i te fenua o te taata nei. 14 Tiai ia Iehova; e faaitoito; e na ˈna e faaitoito mai i to aau ra: e tena na, e tiai â oe ia Iehova.