Salamo
TO DAVIDA TIATURIRAA IA PURE.
E Salamo na Davida.
25 Te faaaraaraa ˈtu nei au i tau varua ia oe, e Iehova: 2 e tau Atua, te tiaturi nei au ia oe; eiaha vau ia haama: eiaha tau mau enemi ia teoteo ia ˈu. 3 Eiaha roa tei tiaturi ia oe ra ia roohia e te haama; o tei rave haavare noa i te hara ra, ia haama ˈtu ïa. 4 E faaite mai oe ia ˈu i to mau eˈa, e Iehova; e haapii mai oe ia ˈu i to mau haerea: 5 e faaite mai oe ia ˈu i te parau mau na oe ra, e haapii mai hoi ia ˈu; o oe hoi te Atua o to ˈu ora; te tiaturi nei au ia oe i te mau mahana atoa nei. 6 E haamanaˈo, e Iehova, i to aroha faaherehere ra, e to hamani maitai i te mau mahana i mairi aˈenei. 7 Eiaha oe e manaˈo mai i te ino e te mau hara o tau apîraa ra; manaˈo maira oe ia ˈu, ma to aroha atoa, no to oe hamani maitai, e Iehova ra. 8 Maitai to Iehova e te piˈo ore: e haapii mai ai oia i te feia hara i te eˈatia mau. 9 E aratai oia i te feia aau mǎrû ma te tia; e haapii mai oia i te feia aau mǎrû i to ˈna iho eˈa. 10 Te mau haerea a Iehova ra, o te aroha ïa e te parau mau, i te feia i haapao i ta ˈna parau i faaau e ta ˈna i faaite mai. 11 Rahi noa iho â ta ˈu nei hara, e Iehova, e faaore mai â oe i to oe ra iˈoa. 12 O vai te taata i mǎtaˈu ia Iehova? e faaite oia ia ˈna i tana eˈa ia hinaaro ra. 13 E parahi te reira taata ma te maitai; e riro te fenua i to ˈna ra huaai. 14 Te parau moe a Iehova ra, tei te feia ïa i mǎtaˈu ia ˈna ra; e o ratou ta ˈna e faaite mai i te parau faaau na ˈna ra. 15 Te tano noa nei â tau mata ia Iehova, no te mea e tia ia ˈna ia iriti mai i tau avae i te marei ra. 16 Ite mai ia ˈu, e aroha mai ia ˈu; e ati hoi to ˈu i te moemoe. 17 Ua rahi iho nei te mauiui o tau aau: e faaora oe ia ˈu i tau mau ati nei. 18 E hiˈo mai oe i tau pohe e tau mauiui, e faaore mai oe i tau mau hara atoa nei. 19 A hiˈo na i tau mau enemi ua rahi; e te uˈana maira to ratou riri ia ˈu. 20 Faaitoito mai oe ia ˈu, ia ora vau ia oe; eiaha vau ia roohia e te haama, te tiaturi nei hoi au ia oe. 21 Ia ora vau i te parau mau e te parau-tia; te tiaturi nei hoi au ia oe.
22 E te Atua e, ia ora Iseraela ia oe i to ˈna atoa ra mau ati.