Salamo

E HAAMAITAI DAVIDA IA IEHOVA.

Na te Menasehe. E Salamo na te tavini a Iehova ra, na Davida, o tei parau atu ia Iehova i te parau o teie nei himene i te mahana i faaorahia ˈi oia e Iehova i te rima o to ˈna atoa ra mau enemi, e i te rima o Saula: ua na ô aˈera oia.

18 Te hinaaro atu nei au ia oe, e Iehova, e tau puai! 2 O Iehova tau pǎpǎ, e tau pare, e tau ora, tau Atua, tau mato, ta ˈu e tiaturi nei; tau paruru, e tau tara faaora, tau fare teitei!

3 E tiaoro vau ia Iehova haamaitaihia ra, e ora ïa vau i tau mau enemi. 4 Ua haaatihia vau e te mauiui o te pohe; î aˈera vau i te riaria i te feia rave hara mai te pape pue ra te huru; 5 ua haaatihia vau i te taura ra o hade; e ua tuuhia te marei ra o te pohe ia ˈu! 6 Ua tiaoro vau ia Iehova i tau atiraa ra; ua pii hua ˈtura vau i tau Atua: ua faaroo maira oia i tau reo i to ˈna nao, e ua tae tau pure i to ˈna tariˈa.

7 Ua aueue ihora te fenua e ua rurutaina, e ua ataataa ˈtura te mau tumu o te mouˈa, ua aueuea, no te mea ua riri oia. 8 Ua pee aˈera te au auahi no roto i tana apoo ihu, e te auahi ura e pura ra no roto i tana vaha, ama ihora te auahi i te reira. 9 Ua tuu haehaa maira oia i te raˈi e ua pou maira: e e pouri tei raro aˈe i tana avae. 10 Ua parahi oia i nia i te kerubi e ua maue; oioi atura te maueraa na nia i te pererau ra o te mataˈi! 11 Ua haaati oia ia ˈna iho i te pouri ei tapoˈi; e te pape pouri e te ata meumeu o te raˈi ra to ˈna fare. 12 No te anaana o to ˈna aro, pee atura te mau ata meumeu na ˈna ra, riro atura ei ûa-paari, e te auahi! 13 Ua tuu maira Iehova i te patiri no nia mai i te raˈi; e ua faaite maira tei Teitei ra i to ˈna reo; e ûa-paari hoi, e te auahi. 14 Ua teˈa ihora oia i ta ˈna ohe, purara ˈtura ratou; ua faarahi atura i te uira, fati atura ratou. 15 Itea ihora te vairaa o te moana i reira; e te tumu o te fenua i te itearaa, i to aˈoraa mai, e Iehova, i te mataˈi ra, te aho no to oe ra apoo ihu.

16 Ua faatoro maira oia i tana rima no nia mai, ua rave maira ia ˈu; ua ume aˈera ia ˈu i nia no raro i te moana rahi. 17 Ua faaora aˈera oia ia ˈu i tau mau enemi puai; i te feia i riri mai ia ˈu ra, no te mea, e puai rahi to ratou i to ˈu. 18 I te mahana i ati ai au ra, ua hitimaue au ia ratou; o Iehova râ to ˈu ra tauturu. 19 Ua hopoi aˈera oia ia ˈu i te vahi atea; ua faaora oia ia ˈu, no te mea te au maira oia ia ˈu. 20 Ua faautua maira Iehova ia ˈu i tei au i ta ˈu ra parau-tia, e ua tuu mai i te raupea ia ˈu e au i te viivii ore o tau rima.

21 No te mea ua haapao vau i te eˈa o Iehova, e aita aˈera i faarue ino noa i tau Atua, 22 no te mea i mua anaˈe ia ˈu te mau ture na ˈna, e aore ta ˈna mau haapaoraa i faaruehia e au, 23 no te mea e parau haavare ore ta ˈu ia ˈna, e aore aˈera vau i rave i ta ˈu ra hara. 24 I raupea mai ai Iehova ia ˈu i ta ˈu nei parau-tia; ia au i te viivii ore o to ˈu nei rima i mua ia ˈna. 25 I te feia e aroha ra, ua aroha atoa oe; e te feia parau-tia ra, te tia atoa ra ta oe parau; 26 i te feia viivii ore ra, e viivii ore atoa ta oe; i te feia râ e mârô ra, e riro atoa oe i te mârô: 27 te feia i ati ra, e faaorahia ïa e oe, area tei faateitei ra, e tuuhia ïa e oe i raro. 28 O oe hoi tei tutui i tau lamepa: e na tau Atua, na Iehova, e haamaramarama i to ˈu nei pouri. 29 No te tauturu no oe ra i pǔpǔ atu ai au na roto i te nanai aito ra; e no tau Atua i tae na ˈi ia ˈu te pare: 30 e Atua ïa, ua tia roa tana haerea; te parau a Iehova ra, ua tamatahia ïa; o te paruru oia o te feia atoa e tiaturi ia ˈna ra.

31 O vai mau ra hoi te Atua, maori râ o Iehova? o vai hoi te mato, maori râ o to tatou Atua? 32 O te Atua i tatua mai ia ˈu i te puai; e ua haamanina i to ˈu nei eˈa; 33 te faariro nei oia i o ˈu pue avae mai to te aili; e ua haapapu i to ˈu tiaraa i tau mau vahi teitei: 34 te haapii nei oia i tau rima i te tamaˈi, e ua fati te fana veo i to ˈu nei pue rima. 35 Ua tuu mai oe ia ˈu i te paruru faaora no oe ra, e na to rima atau i tauturu mai ia ˈu; e no to oe mǎrû i rahi ai au. 36 Ua faaatea mai oe i to ˈu taahiraa avae i raro aˈe ia ˈu; i ore i pahee ai o ˈu pue avae.

37 I auau na vau i tau mau enemi e roohia ˈtura ratou e au; aore au i hoˈi, e hope aˈera ratou i te pau. 38 Ua tairi au ia ratou e aita ˈtura e maitai ia tia mai i nia: hiˈa anaˈe ihora i raro aˈe i tau avae: 39 ua tatua mai oe ia ˈu i te puai i te aroraa; e na oe i haavi i tau mau enemi i raro aˈe ia ˈu. 40 Ua horoa mai oe i te mau aˈî o tau mau enemi; ia pohe ia ˈu te feia i riri mai ia ˈu ra. 41 Ua pii atura ratou, aita râ e faaora; ua pii ia Iehova, aore râ oia i parau mai. 42 Papai atura vau ia ratou e huˈahuˈa roa aˈera mai te repo e puehu i te mataˈi ra, faarue atura vau ia ratou mai te vari i te mau aroâ ra. 43 I te turepu-atoa-raa o te taata ra, ua faaora hoi oe ia ˈu; e ua tuu oe ia ˈu i nia iho i te mau etene; te feia itea-ore-hia e au ra, te tavini maira ïa ia ˈu; 44 tei te iteraa ratou ia ˈu ra, ua faaroo maira ratou; te mau fenua ěê ra tei auraro mai ia ˈu; 45 te mau fenua ěê ra tei maheahea i te mǎtaˈu e ua rurutaina i roto i ta ratou iho mau pare.

46 Te ora ra Iehova! e ia haamaitaihia tau mato! e ia faateiteihia te Atua i ora ˈi au nei! 47 Te Atua i tahoo mai i ta ˈu nei parau: e ua haavi i te taata i raro aˈe ia ˈu nei: 48 I te faaoraraa ia ˈu i tau mau enemi ra! e ua faateitei oe ia ˈu i nia iho i tau mau enemi; e ua faaora oe ia ˈu i te taata riri hotuâ ra. 49 E haamaitai ai au ia oe, e Iehova, i rotopu i te mau etene ra; e himene haamaitai â vau i to oe ra iˈoa. 50 E ora rahi ta ˈna i horoa mai i to ˈna arii, e te faaite maira i to ˈna aroha i ta ˈna i faatahinu ra, ia Davida, e to ˈna huaai e a muri noa ˈtu.