Salamo

TE PURE RA DAVIDA IA TAUTURUHIA MAI.

Himene e salamo na Davida.

108 Ua ineine tau aau, e te Atua; e himene au e haamaitai ia oe ma tau hinuhinu ra. 2 A ara, e te nabala e te kinura: na ˈu ïa e ara i te poipoi roa ra. 3 E haamaitai au ia oe, e Iehova, i roto i te mau taata nei; e himene au ia oe i rotopu i te mau etene. 4 Ua hau hoi to aroha i te teitei i te mau raˈi atoa ra; e ta oe ra parau mau e tae noa ˈtu i te reva nei.

5 E faateitei na oe, e te Atua, ia haehaa te mau raˈi; e faaite i to oe ra mana e ati noa ˈˈe te fenua nei. 6 Ia ora tei herehia e oe ra; e faaroo mai ia ˈu e faaora ia matou i to rima atau ra. 7 Te parau ra te Atua i roto i tana vahi moˈa ra, E oaoa ïa vau! e opere au ia Sekema e taa ˈtura te tufaa, e faito hoi au i te peho ra ia Sukota. 8 Na ˈu Gileada, e na ˈu atoa Manase: Epheraima, e ora ïa no tau upoo: o Iuda ra, o ta ˈu ïa faaau ture. 9 O Moabi ra, o ta ˈu ïa horohoroiraa; e e titiri au i tau tamaa ia Edoma; o Philisetia ra, e umere ïa vau ia ˈna ra.

10 Na vai au nei e aratai i taua oire etaeta ra? na vai au nei e aratai i Edoma ra? 11 E ore anei oe, e te Atua, o tei faarue ia matou nei, e aore oe i haere atoa, e te Atua, i ta matou ra nuu? 12 Ho mai na i te tauturu ia matou i te ati nei; e mea faufaa ore te tauturu a te taata nei. 13 E itoito matou i te Atua ia rave ra; e na ˈna e taataahi i to matou mau enemi i raro.