Ioba
TE KATARA NOA RA IOBA I TE MAHANA I FANAU MAI AI OIA RA.
3 E muri aˈe i te reira, ua parau maira te vaha o Ioba e ua katara ihora i te mahana i fanau ai oia; 2 ua parau ihora Ioba, na ô aˈera.
3 Ia mou te mahana i fanau ai au nei, e te rui i parauhia ˈi e, ua tô! e tamaroa! 4 Ia riro ïa mahana ei pouri; eiaha roa te Atua ia na nia mai i te hiˈo; eiaha roa te maramarama ia hitihia mai i nia i te reira. 5 Ia riro roa ïa i te pouri e te mǎrǔ pohe; ia hohorahia mai te ata i nia i te reira; e ia mehamehahia i te ata patiri! 6 O te reira rui! ia riro roa ïa i te pouri, eiaha ia apitihia mai i te mau mahana atoa o te matahiti; e eiaha ia faaôhia mai i roto i te taioraa o te mau marama! 7 Inaha! ia tuua-roa-hia ïa rui i te ano; eiaha te oaoa taata fanau ia ô mai i reira. 8 Na ratou e katara, na tei katara i te mahana, na tei ite i te faaara ia Leviatana. 9 To ˈna fetia ahiahi, ia mohimohi ïa; ia tiai hoi te maramarama, e eiaha roa ïa; e te maramarama o te poipoi, eiaha roa ia itea; 10 no te mea, aore i opani i te opu ia ˈu, aore hoi i huna ê atu i te oto i to ˈu nei mata.
11 Eaha vau i ore i pohe ai i te fanauraa ra? I ore i pohe ai au mai roto mai i te opu? 12 Eaha i tiai mai ai na hufâ ia ˈu? E na û hoi ia otehia e au ra? 13 ua faaea ïa vau i reira ma te mamu; ua tiraha ïa vau i raro, e ua mairi to ˈu taoto, 14 matou e te hui arii e te mau taata parau o te ao nei, o tei patu i te mau vahi moemoe no ratou; 15 matou e te hui arii, no ratou te taoˈa ra e auro, e tei îî to ratou mau fare i te ario: 16 ua riro ïa vau ei mea taahia moe noa ra. Mai te aruaru aore i ite i te maramarama. 17 E ore te paieti ore e hauti mai i reira; e ei reira tei rohirohi e faaea maite ai. 18 Ei reira te mau tîtî e au maite ai i te taotoraa: e ore hoi e ite i te reo o te faahepo. 19 Ei reira tei rahi e tei iti e faito atoa ˈi, e ua tiamâ mai te tavini i to ˈna fatu.
20 Eaha i horoahia mai ai te maramarama i tei ati ra, e te ora i te feia i ahoaho te varua ra? 21 i tei nounou i te pohe, e aita, i tei imi hua, e iti te imi i te taoˈa hunahia ra: 22 i tei oaoa e tae noa ˈtu i te ouˈauˈa noa, e ua itea anaˈe ia ratou te apoo ra, ua umere noa ïa? 23 I te taata i haamoehia to ˈna eˈa, i tei auahia e te Atua e ati noa ˈˈe? 24 Ua na mua hoi tau oia i ta ˈu nei maa, e te manii noa nei to ˈu oto mai te pape. 25 O ta ˈu mau hoi i mǎtaˈu ra, tei roohia mai ïa e au, e ta ˈu hoi riaria ra, o tei iri mai ïa i nia ia ˈu. 26 Aita roa o ˈu e hau, aita roa a ˈu e mamu noa, e aita roa e tuutuuraa ia ˈu, a tupu mai ai taua pohe no ˈu nei.