Ioba

TE VAI NEI TE ITE I TE MAU PEU, O TE PAARI MAU RA, O TE MǍTAˈU ÏA I TE ATUA.

28 E vairaa mau to te ario, e to te auro e tamâhia e te taata nei, e vairaa to ˈna. 2 Na roto i te fenua te auri i te ôraahia, e no roto i te ofai te veo i te maniiraa mai. 3 Te faahope nei te taata i te pouri, e te imi hua nei e ua taea te hopea i te mau ofai no roto i te pouri e te mǎrǔ pohe. 4 Te pou noa nei ratou i raro i to ratou parahiraa; inaha! ua moe ia ratou te peu mau o te avae; ua pou ratou i raro e reva ê atura i te vahi taata. 5 Area te fenua nei, no reira te pane i te noaaraa, o raro aˈera, ia hurihia mai, e au ïa i te auahi. 6 Tei roto ra i to ˈna mau ofai te vairaa o te saphira; e te huˈa auro tei roto ia ˈna te itearaa. 7 O te eˈa teie aore i itea e te mau manu pererau, aore hoi te mata o te aie i ite noa ˈˈe. 8 Aore hoi te mau manu taehae i taataahi noa ˈtu i ie mǎtaˈu; e te liona aito aore i haere na nia iho. 9 Te tuu nei râ te taata i tana rima i roto i te mato paari; e te faatiopa nei i te mouˈa ma te tumu atoa. 10 Te faatahe nei i te pape na roto i te mato, e te ite ra to ˈna mata i te mau mea maitatai ra. 11 Ua faaore oia i te tauraa o te pape, e ua tuu i te taoˈa moe i te vahi maramarama. 12 Eihea râ te paari e itea ˈtu ai? e teihea to te ite ra vairaa? 13 Aore e taata i ite i to ˈna hoo; e aore hoi e itea i to te taata nei parahiraa. 14 Te na ô maira te hohonu, Aore i ǒ nei ia ˈu nei; e te parau maira te moana, Aore i ǒ nei ia ˈu nei. 15 E ore te auro taatoa e tia ia hopoi ei hoo; e ore hoi e tia ia faito i te ario ei utua. 16 Eita e hoona i te auro i Ophira; i te sema maitai ra, e te saphira. 17 Te auro mâ maitai ra e te zekukita e ore e au; e ore hoi te poe auro tamâhia ra e riro ei faito. 18 Eiaha te ramuta e te gebesa e parauhia, ua hau hoi te maitai o teie nei ite i to peninima. 19 E ore hoi te petade i Kusa e faaauhia i te reira, eita hoi e hoona i te auro maitai ra. 20 Nohea mai hoi taua taoˈa nei e paari? e te ite ra, teihea to ˈna parahiraa mau? 21 Ua huna-ê-hia hoi i te mau taata atoa o te ao nei, e ore hoi te mau manu o te reva e ite. 22 Te parau maira te pau e te pohe, O te roo ta mâua i faaroo aˈenei i to mâua tariˈa. 23 O te Atua anaˈe ra te ite i to ˈna haerea, e oia te ite i to ˈna parahiraa. 24 Te ite nei to ˈna mata e tae noa ˈtu i te hopea o te fenua ra: e to raro atoa ˈˈe i teie nei mau raˈi, te ite noa ra oia i te reira. 25 Ia ˈna i hamani i te faito mataˈi ra, e ua faaau maite i te moana i te faito; 26 ia ˈna i hamani i te haerea no te ûa, e te haerea no te uira patiri ra; 27 i reira to ˈna hiˈoraa, e ua faaite mai; e ua haamau-hua-hia, e ua tamata-hua-hia e ana; 28 e ua na ô aˈera, area i te taata nei, Inaha! o te mǎtaˈu i te Fatu, o te paari ïa, e te faarue i te ino ra, o te ite ïa.