Ioba

RAVE RAHI TE PARAU INO AORE I FAAUTUAHIA I TEIE NEI AO, TE VAI ATURA TO ˈNA MAHANA.

24 Aore te mau tau i moe i te Puaihope, eaha hoi te feia i ite ia ˈna i ore i ite ai i to ˈna tau? 2 Te rave nei te tahi pae i te tapao fenua; te haru hua nei i te nǎnǎ, e te amu ra; 3 ua tiahi-ê-hia te asini a te otare; e ua rave i te puaatoro a te vahine ivi ei paruru. 4 Te feia veve ra te tute-ê-hia nei e ratou i te eˈa tia ra; e ua tairuru atoa te feia taoˈa ore o te fenua e tapuni. 5 Inaha! mai te asini oviri i te medebara to ratou haerea i ta ratou ohipa; i te tiaraa i te poipoi roa ia maahia ra. Ei te medebara e noaa ˈi ta ratou maa na te tamarii. 6 Ua ooti ratou i ta ratou sitona i te ô ra, e ua motu ia ratou te ô vine a te hamani ino. 7 Te vaiiho tahaa noa ra ratou i te taata i te rui ra, aore e ahu, e aore roa e tapoˈi i te mâriri. 8 Ua rari roa ratou i te ûa o te mouˈa, e no te tapoˈi ore i piri ai i te mato ra. 9 Ei nia i te û vetahi e haru ai i te otare, e ua rave i te ahu o te veve ei paruru. 10 Te faatii nei i te feia ahu ore eiaha ei ahu, e te hopoi ê ra ratou i te rǔrǔ sitona i tei haapohehia i te poia; 11 te taviri nei ratou i te monoˈi i roto i te fare, e te taataahi ra i te vine ma te pohe i te poihâ.

12 Te auê noa nei te taata i roto i te oire, e te pii hua nei te taata i roohia e te pohe ra; aita râ te Atua i haapao i taua ino ra. 13 O te feia teie aore i au i te maramarama; aore ratou i haapao i to ˈna haerea, e ore ratou e haere na to ˈna eˈa. 14 Ia aputa mai te maramarama e tia ˈi te taparahi taata, ia pohe te taata rii e te veve ia ˈna; e ua rui anaˈe ra ua riro ei eiâ. 15 E tiai â te mata o te moiheuo i te pouri, te na ô ra e, Aore e mata e hiˈo mai a purou ai i to ˈna mata i te ahu. 16 Ei roto i te mau fare ratou e faaô ai i te pouri, e te haamoe ra ratou i te ao; aore ratou i ite i te maramarama. 17 E riro hoi te poipoi ei mǎrǔ pohe ia ratou: e mai te riaria i te mǎrǔ pohe ra i te itearaa ˈtu. 18 Mai te taoˈa mâmâ ra oia i raro i te pape; e riro to ratou pae i te fenua nei i te katarahia, eita hoi oia e tae i te eˈa o te ô vine ra. 19 Te riro nei te pape hiona i te mǎrô e te mahanahana, ia na reira atoa hade i te feia i rave i te hara. 20 Eiaha te opu ia manaˈo ia ratou; o te toˈe ra te amu ia ratou ma te fanaˈo; eiaha roa ratou ia manaˈo faahouhia; ua ofatihia te ino i reira mai te raau ra.

21 Te ui aore i fanautama ra, ua pau ïa ia ˈna i te hamani ino; e aore roa e hamani maitai atu i te vahine ivi. 22 Te tuu nei oia i te taata mana i raro i to ˈna puai; e ia tia oia i nia ra, aore e taata e manaˈo i te ora. 23 Te tuu ra oia i te hau no ˈna, e te vai maitai ra oia, tei nia râ to ˈna mata i ta ratou haerea. 24 Ua faateiteihia ratou, aore i roroa, ore aˈera; ua tâpû-ê-hia ratou mai te sitona; ua tuuhia ratou i raro, e mai te taata atoa ra ua papanihia i roto i te menema. 25 E ere i te reira ra, na vai e faahapa mai i ta ˈu parau, a faariro ai i ta ˈu parau ei mea faufaa ore?