Ioba

TE AˈO NEI ZOPHARA IA IOBA I TE MEA UA FAATIA OIA IA ˈNA IHO.

11 Ua parau atura Zophara ati Naama, na ô atura,

2 E ore anei te taata parau rahi e parauhia ˈtu? e tiahia anei te taata vavi noa? 3 E mamu noa anei te taata atoa i to oe faaahaaharaa? e e vavi noa ˈtu anei oe eiaha ei tapea? 4 I parau na hoi oe e, Ua tia ta ˈu nei parau, e te viivii ore hoi to ˈu ia hiˈo mai oe. 5 Ahiri râ te Atua e parau hua mai e! e ia faaite hua mai tana vaha ia oe; 6 ahiri oia e faaite ia oe i te parau moe aroaro o te paari ra; te hau ê ra ïa i te mau parau itea atoa ra: te faaiti nei râ te Atua i to oe pohe i ta oe hara, ia ite mai hoi oe.

7 E itea anei te Atua ia oe ia imi? e itea-hua-hia anei te Puaihope ia oe i ta oe imiraa? 8 E teitei mau to te raˈi, e nahea ta oe rave? E hohonu rahi to hade; eaha ta oe vahi e ite? 9 Maoro aˈe to reira i to te fenua, aano rahi to te reira i to te moana. 10 Na ˈna e haru ra, e ua tapea ra, e ua aratai mai i te haavaraa: o vai te tia ia parau atu? 11 Ua ite oia i te aau o te taata haavare; e tia anei ia ˈna ia haamoe atu i te hara ta ˈna iho i ite ra? 12 Te hinaaro ra te taata maamaa ia manaˈohia e, e paari to ˈna, fanau noa ˈi te taata nei mai te fanauˈa asini oviri ra.

13 Ia faanahonaho oe i to aau, e ia faatoro atu oe i to rima ia ˈna; 14 e ia faarue oe i te ino i to rima na, e eiaha ia vai noa te ino i roto i to oe tiahapa. 15 E nânâ oe i to mata i nia ma te porao ore i reira; e itoito hoi oe ma te mǎtaˈu ore: 16 e moe hoi taua pohe no oe ra i reira, e ia manaˈo ra, e riro ïa mai te manaˈo i te pape i reva ê ra: 17 e riro hoi taua tau ra i te maramarama e iti to te avatea; e te pouri ra, e riro mai te poipoi. 18 E ore oe e aueue, no te mea te vai ra to oe tiaturiraa; e te vahi i ôhia ra, e faaea maite oe i reira ma te ora. 19 E taoto hoi oe, e ore hoi te hoê e haamataˈutaˈu mai; e rave rahi hoi te tomo mai i mua i to oe mata. 20 E mohimohi râ te mata o te paieti ore; e mou to ratou haapuraa; e riro to ratou manaˈoraa mai te unuhiraa varua ra.