Ioba
Ioba
TE TAOˈA RAHI E TE PAIETI O IOBA, E TE HAMANI INO O SATANI RA.
1 Tei te fenua ra o Uza te hoê taata, o Ioba te iˈoa; e taata parau-tia e te paieti, i te mǎtaˈuraa i te Atua, e te faarueraa i te ino. 2 E fanau maira a ˈna pue tamarii tamaroa toohitu e na tamahine tootoru. 3 E o a ˈna pue taoˈa e hitu tausani ïa i te mamoe, e toru tausani kamela, e hoê tausani puaatoro, e pae hanere asini ufa, e te utuafare taata e rave rahi: hau atura oia i te rahi i to te hitia o te râ atoa ra. 4 E peu mau hoi na taua pue tamarii na ˈna ra, e faaamuraa maa fetii ra, o te taata o to ˈna ra mahana fanauraa e ati aˈe ratou ra: e ua tii atura ratou i taua na tuahine no ratou tootoru ra, e haere mai e amu e e inu hoi ratou atoa ra. 5 E hope aˈera na mahana amuraa maa ra, ua tii atura Ioba e tamâ ia ratou; e ua tia aˈera oia i te poipoi roa, e ua hopoi i te tusia e hope aˈera na tamarii na ˈna ra; te na ô ra hoi Ioba, peneiaˈe ua hara taua mau tamarii na ˈu nei, e ua faaino hoi to ratou aau i te Atua. I na reira hoi Ioba i te mau mahana atoa ra.
6 E tae aˈera i te hoê mahana, ia haere mai te mau tamarii a te Atua e faaite ia ratou iho i te aro o Iehova, tei roto atoa maira Satani ia ratou. 7 Ua parau atura Iehova ia Satani, Maihea mai oe? Ua parau maira Satani ia Iehova, na ô maira, Mai to ˈu haaati haerea e te haere-noa-raa i nia i te fenua nei. 8 Ua parau atura Iehova ia Satani, Ua hiˈo anei oe i tau tavini ia Ioba? aita hoi o ˈna e faito i nia i te fenua nei, e taata parau-tia e te paieti, e te mǎtaˈuraa i te Atua, e te faarueraa i te ino? 9 Ua parau maira Satani ia Iehova, na ô maira, E mǎtaˈu noa anei Ioba i te Atua? 10 E ere anei tei auahia oia e oe, e to ˈna atoa ra fare, e ta ˈna atoa ra mau taoˈa atoa e ati noa ˈˈe? ua haamaitaihia e oe ta ˈna ohipa i rave, e ua rahi ta ˈna taoˈa i te fenua nei. 11 Nanao noa ˈtura râ i to rima a rave atu ai i ta ˈna e ia pau roa; e e faaino oia ia oe i mua i to aro i reira. 12 Ua parau atura Iehova ia Satani, Inaha, ta ˈna atoa ra mau taoˈa tei to rima ïa, eiaha râ to rima e rave noa ˈtu ia ˈna iho. Reva ˈtura Satani mai te aro atu o Iehova.
13 E tae aˈera i te hoê mahana, te amu ra ta ˈna mau tamarii tamaroa e te mau tamarii tamahine i te maa, e te inu ra i te uaina i te fare o to ratou tuaana, 14 te vea maira ia Ioba, na ô maira, Te arote ra te mau puaatoro e te amu noa ra te mau asini ufa i te maa i pihaiihora; 15 ua haru noa maira te ati Seba ia ratou; e ua pohe te mau taata apî i te tairihia i te ˈoˈe, e o vau anaˈe tei ora mai, i haere mai au e faaite ia oe. 16 Te parau noa ra oia, te haere maira te tahi, na ô maira, Ua mairi maira te uira no te raˈi mai, ama ˈtura te mau mamoe, pau ihora hoi te mau tavini, e o vau anaˈe nei tei ora mai ei faaite ia oe. 17 Te parau noa ra oia, ua haere maira te tahi, na ô maira, Ua faataa ihora te Kaladaio i na pǔpǔ e toru, e ua haru ihora i te mau kamela, e riro atura: e ua tairihia te mau taata apî i te ˈoˈe; e o vau anaˈe nei tei ora mai, i haere mai au e faaite ia oe. 18 E te parau noa ra oia, ua haere maira te tahi, na ô maira, Te amu ra to mau tamarii tamaroa, e to mau tamahine i te maa, e te inu ra i te uaina, i roto i te fare o to ratou tuaana, 19 e inaha, o te mataˈi uˈana maira na nia mai i te medebara, mau maira i na poro e maha o te fare, mairi ihora i nia i taua mau taata apî ra, e pohe ihora: e o vau anaˈe nei tei ora mai, i haere mai au e faaite ia oe.
20 Ua tia maira Ioba i nia, e ua hahae i to ˈna ahu, e ua hahu i tana upoo, e ua haamairi ihora i raro i te repo ua haamori i te Atua, 21 ua na ô aˈera, i haere faufaa ore noa mai au mai roto i te opu o tau metua vahine, e te hoˈi faufaa ore noa nei â vau i reira, Na Iehova i horoa mai, e na Iehova i rave mai; ia haamaitaihia te iˈoa o Iehova. 22 Aore Ioba i harahia i taua mau mea atoa nei, e aore hoi i faahapa i te Atua.