Nehemia

TE HAAPAERAA MAA, E TE TATARAHAPARAA O TE MAU TAATA RA.

9 E tae aˈera i te mahana taau ma maha i taua marama nei, ua putuputu te tamarii a Iseraela ma te haapae i te maa, e te ahu oto, e ma te repo i nia iho ia ratou. 2 Ua faataa ˈtura te tamarii a Iseraela i te taata ěê, e ua tia noa ihora ua faˈi i ta ratou hara, e te haapao ore o to ratou mau metua. 3 Ua tia noa ihora i to ratou tiaraa, e ua taiohia ihora te buka ture a to ratou Atua a Iehova, te hoê tuata i taua mahana ra; e te tahi tuata i taua mahana ra, e faˈiraa ïa i ta ratou hara, e ua haamori i to ratou Atua ia Iehova.

4 I reira te mau ati Levi, o Iesua, e o Bani, e o Kadamiela, e o Sebania, e o Buni, e o Serebia, e o Bani, e o Kenani, i te tiaraa i nia i te vahi hamanihia ra, e ua pii hua ˈtura i to ratou Atua ia Iehova. 5 E te mau ati Levi, o Iesua, e o Kadamiela, e o Bani, e o Hasabinia, e o Serebia, e o Hodia, e o Sebania, e o Petahia, na ô aˈera, A tia, a haamaitai i to outou Atua ia Iehova e a muri noa ˈtu: ia haamaitaihia hoi to oe ra iˈoa hanahana, o tei teitei roa i nia ê ra e ore e taea e te haamaitai e te arue. 6 O oe, oe anaˈe ra o Iehova; na oe i hamani i te raˈi, te raˈi o te mau raˈi, e te nuu atoa i reira, te fenua, e te mau mea atoa i roto ra; te tai e te mau mea atoa i roto ra, e na oe anaˈe hoi e tiai; e te haamori ra to te raˈi atoa ra ia oe. 7 O oe te Atua, e Iehova, o tei maiti ia Aberama, e na oe oia i aratai mai mai Ura mai, i ǒ te Kaladaio, e na oe i mairi i to ˈna iˈoa ia Aberahama; 8 e ua ite atura oe i to ˈna aau i te haavare ore i mua i to aro ra, e ua faaau i te faufaa ia ˈna ra, e ua horoa mai oe i te fenua o te ati Kanaana, e to te ati Heta, e to te ati Amori, e to te Perezi, e to te ati Iebusi, e to te Giregasi, na ˈna, e ua horoa mai i te fenua ra o Kanaana no to ˈna ra huaai, e ua faatupu oe i taua parau na oe ra; no te mea e parau-tia ta oe; 9 e ua hiˈo oe i te ati o to matou mau metua i Aiphiti, e ua faaroo oe i ta ratou auê i te miti uteute ra; 10 e ua faaite oe i te tapao e te ravea taa ê i nia ia Pharao, e tana mau tavini, e i nia atoa i te taata atoa o to ˈna fenua: ua ite hoi oe, e teoteo tei ta ratou rave ia ratou ra. Noaa ihora to oe iˈoa, mai tei teie nei â mahana. 11 Ua amaha ihora te miti ia oe i mua i to ratou aro, haere noa ˈtura ratou na roto i te moana i nia i te vahi mǎrô; e ua taora ihora oe i te feia i hamani ino mai ia ratou i te moana mai te ofai i raro i te tai rahi ra. 12 E ua aratai oe ia ratou i te pou ata i te ao; e te rui ra i te pou auahi, ei haamaramarama i to ratou eˈa ia haere ra. 13 E ua pou mai oe i raro i nia i te mouˈa ra o Sinai, e ua parau mai oe ia ratou i nia i te raˈi ra, e ua horoa mai oe i te haapaoraa tia, e te ture mau e te peu maitai, e te parau tia; 14 e ua faaite mai oe ia ratou i te sabati moˈa na oe, e ua tuu mai oe i te aˈo, e te mau peu, e te ture, i te vaha o to tavini ra o Mose: 15 e ua horoa mai oe i te maa no te raˈi mai ia poia ratou ra, e ia poihâ ratou, ua horoa mai oe i te pape na ratou no roto i te mato; e ua parau oe ia ratou e haere e parahi i te fenua ta oe i tǎpǔ e e horoa mai no ratou. 16 Area ratou, to matou mau metua, teoteo aˈera ratou, e ua mârô aˈera ratou, aore aˈera i faaroo i ta oe parau; 17 aore aˈera i haapao, aore hoi i haamanaˈo i ta oe mau ravea mana i ravehia e oe i rotopu ia ratou ra; faaetaeta aˈera râ ratou e i to ratou mârô ra, ua haapao i te hoê raatira ei faahoˈi ia ratou i to ratou ati rahi i Aiphiti ra; area oe, e Atua oe e faaore mai â i te hara, e te aroha noa, e te faaherehere mai, e ore roa e riri vave, e te hamani maitai rahi, aita aˈera oe i faarue mai ia ratou. 18 E ia hamani hoi ratou i te kafa faatô na ratou, e ia parau ra e, O to atua teie tei aratai mai ia oe mai Aiphiti mai, e rahi roa aˈera hoi ta ratou faaooo ia oe; 19 aore â oe i faarue ia ratou i te medebara no to oe aroha rahi: aore hoi taua pou ata ra i faarue mai ia ratou i te ao, ei aratai ra ia ratou i te eˈa; e te pou auahi hoi i te po, ei tiarama ia ite ratou i te eˈa ia haere. 20 Ua horoa mai hoi oe i to oe varua maitai ei aˈo mai ia ratou, e aore hoi i pipirihia e oe ta oe mâna i to ratou vaha; e ua horoa mai hoi oe i te pape ta ratou i hiaai. 21 E piti taau hoi o oe matahiti i te faaamuraa mai ia ratou i te medebara, e aore roa ratou i ere; aore hoi to ratou ahu i marau, e aore to ratou avae i eea. 22 E ua horoa mai hoi oe i te mau basileia ra e te mau fenua, ua tufa-hua-hia e oe tei ia ratou. Tei ia ratou te fenua o te arii o Hesebona o Sihona, e te fenua o te arii o Basana o Oga. 23 E ua faarahi hoi oe i ta ratou mau tamarii mai te fetia i nia i te raˈi ra, e ua aratai oe ia ratou i te fenua, ta oe i parau mai i to ratou ra mau metua e haere ratou i reira parahi ai. 24 Ua haere atura hoi te mau tamarii i roto e ua parahi i taua fenua ra, e ua vi ihora to te fenua ia oe, te ati Kanaana, e ua tuu mai oe ia ratou i to ratou rima, to ratou mau arii, e te taata atoa o te fenua ra, ia rave ratou i to ratou hinaaro. 25 E oire etaeta hoi tei pau ia ratou, e te fenua taoˈa, e te mau fare, ua î i te mau mea maitatai, e te apoo pape ua oti i te ôhia, e te ô vine, e te ô olive, e te mau raau maa e rave rahi. Ua amu ihora hoi ratou, e paia aˈera, e poria ˈtura, oaoa roa aˈera ratou i te aroha rahi no oe ra. 26 Taiata ˈtura râ ratou, e te haapao ore ia oe, faarue ihora i ta oe ture i muri i to ratou tua, e ua taparahi i te mau peropheta na oe tei aˈo mai ia ratou ia fariu mai ia oe ra, rahi atura ta ratou faaooo ia oe ra. 27 I tuu ai oe ia ratou i te rima o to ratou mau enemi, o tei faaooo atoa mai ia ratou: ia roohia râ ratou i te ahoaho, e ia tiaoro atu ratou ia oe, ua faaroo mai oe i nia i te raˈi ra; e no to oe ra aroha rahi ua horoa mai oe i te faaora no ratou, o tei faaora ia ratou i te rima o to ratou mau enemi. 28 E hau ihora to ratou, ua hoˈi faahou ratou i te parau ino i mua ia oe: vaiiho ihora oe ia ratou i te rima o to ratou mau enemi, e faahepohia ihora ratou: ia hoˈi râ ratou e ia tiaoro atu ia oe ra, ua faaroo mai oe i nia i te raˈi: e rave rahi to oe faaoraraa ˈtu ia ratou i to oe aroha rahi; 29 e ua aˈo atu hoi oe ia ratou, ia fariu mai ratou i te ture na oe: ua teoteo râ ratou e aore i faaroo i ta oe parau, ua hara râ ratou i ta oe parau, (ua rave anaˈe hoi te taata i te reira, e ora ïa oia i te reira.) Ua iriti maira i te tapono, e ua faaetaeta, e aore aˈera i faaroo. 30 E rave rahi râ to oe matahiti i te faaoromairaa ia ratou, e te aˈoraa hoi ia ratou i te varua no oe i roto i te mau peropheta na oe ra; e aore aˈera ratou i faaroo, ua tuu oe ia ratou i roto i te rima o te mau taata no teie nei mau fenua. 31 No to oe ra aroha rahi, aita aˈera oe i rave haapau roa ia ratou, e aore hoi i faarue roa; e Atua hamani maitai oe, e te aroha. 32 E teie nei, e to matou Atua, e te Atua rahi, e te puai, e te mǎtaˈuhia, o tei haapao i te faufaa e te aroha ra, eiaha ia iti ia oe te mau ati i roohia mai ai matou nei; i to matou mau arii, e te feia mana, i te mau tahuˈa nei, e ta matou mau peropheta, e to matou mau metua, e i nia atoa i to oe ra mau taata mai te anotau mai â o te mau arii o Asura ra, e tae roa aˈenei i teie nei mahana. 33 E parau-tia râ ta oe, i te mau mea atoa i roohia mai ai matou ra; aore hoi i hapa ta oe parau, e parau ino râ ta matou: 34 aore hoi to matou mau arii, e to matou feia mana, e to matou feia tahuˈa, e to matou mau metua, i haapao i ta oe ture, aore hoi i faaroo i ta oe parau e ta oe ra haapaoraa i tuu mai ia ratou ra. 35 E i roto atoa hoi i to oe ra basileia, ta oe hoi i horoa noa mai ia ratou i te maitai rahi no oe ra; i roto hoi i taua fenua rahi maa ta oe i tuu mai i mua ia ratou ra, aore â ratou i faaroo ia oe, aore hoi i faarue i ta ratou parau ino. 36 Inaha matou i teie nei mahana, ua riro ei tavini i te fenua ta oe i ho mai i to matou mau metua ia amu noa i te maa maitai rahi no taua fenua ra, e inaha, ua riro matou ei tavini i taua fenua nei: 37 e te hopoi nei hoi matou i te maa rahi o teie nei fenua na te mau arii i tuuhia mai e oe i nia ia matou, no ta matou nei hara; e te faahepo nei ratou i to matou nei tino, e ta matou nei mau puaa, te rave nei i ta ratou iho i hinaaro; e ati rahi to matou i teie.

38 E no taua mau parau atoa ra, ua fafau ihora matou i te hoê faufaa itoito e ua oti i te papaihia, e na to matou feia rarahi, e te mau ati Levi, e te feia tahuˈa, i taati.