Nehemia
TE TÂHITO RA TE MAU ENEMI, TE PURE RA NEHEMIA MA TE ARA.
4 Ite aˈera Sanabalata e te patu ra matou i te patu, riri aˈera oia, ooo roa aˈera, e ua tâhitohito maira i te ati Iuda, 2 ua parau atura oia i tana mau taeae e te nuu atoa i Samaria, na ô atura, Te aha noa ra tera ra mau ati Iuda rii? te faaetaeta ra anei ratou? e hopoi anei ratou i te tusia? e oti anei ta ratou ohipa i te mahana hoê? e rave faahou anei ratou i te ofai ama auahi no roto i te patu parari ra? 3 Te tia noa ra te ati Amona ra o Tobia i pihaiiho ia ˈna, e ua na ô aˈera, Ua tiaia anaˈe te tahi alope i tera ra patu ofai ta ratou e patu aˈera, e marua ïa i raro. 4 E faaroo mai oe, e to matou Atua, i to matou vahavaharaahia mai; e faahoˈi oe i te faaino na ratou i nia i to ratou iho upoo, e tuu atu oe ia ratou ia pau i te fenua e pau ai ratou ra: 5 eiaha e tapoˈihia to ratou ino, eiaha e paraihia ta ratou hara i mua ia oe: ua faaooo hoi ratou i te feia patu ia riri. 6 Ua patu râ matou i taua patu ra; te patu atoa ra, a tiaatihia mai ai i te tahi pae ra; ua tae hoi te aau o te taata i taua ohipa ra.
7 Ite aˈera Sanabalata, e Tobia, e to Arabia, e te ati Amona, e to Asadoda, e ua patuhia te aua i Ierusalema, e te huru oti ra te mau vahi i parari, riri roa aˈera ratou; 8 ua amui aˈera ratou atoa, e tii mai e aro ia Ierusalema, ia ore taua ohipa ra. 9 Ua pure ihora râ matou i te Atua, e ua faataa i te feia faehau i te feia i patu i te rui e te ao, i te mǎtaˈu hoi ia ratou. 10 Ua na ô maira te tahi pae o Iuda, Ua rohirohi te feia hopoi i te hopoia, e te rahi nei te auaua; e ore teie nei patu e oti ia tatou ia patu ra. 11 E te na ô ra hoi te mau enemi, e ore ratou e faaroo e e ite, e roohia-noa-hia ˈtu e tatou, a taparahi ai tatou, e ore aˈera taua ohipa ra. 12 Ua haere maira te mau ati Iuda parahi i pihaiiho ia ratou ra, e ua ahuru te parauraa mai ia matou, Mai te mau vahi atoa ta ratou e parahi ra, ia haere mai ratou e rave ia tatou nei.
13 Ua faanoho ihora vau i te mau taata, i te vahi atea i raro i muri mai i te patu ra, e i te vahi i nia ˈˈe, ua faanoho vau ia ratou i to ratou mau fetii, ma te ˈoˈe, e te maehae, e te fana. 14 E oti aˈera te reira i te hiˈohia e te haamauhia e au ra, ua parau atura vau i te feia rarahi, e te mau tavana, e te taata atoa, Eiaha outou e mǎtaˈu ia ratou; e haamanaˈo ia Iehova, i te rahi e te mana, a aro ai outou ia ora to outou mau taeae, e ta outou mau tamarii, e ta outou mau tamahine, e ta outou mau vahine, e to outou mau fare. 15 Ite aˈera râ to matou mau enemi, e ua itea ia matou, e ua riro ta ratou parau ei mea faufaa ore i te Atua, ua hoˈi anaˈe atura matou i te patu, o te taata o ta ˈna ohipa e ati noa ˈˈe, 16 Mai reira mai â te tahi pae tavini o ˈu ra i te raveraa i te ohipa, e te tahi pae tei mau noa i te mau maehae, e te mau paruru, e te mau fana, e te mau ahu tamaˈi; e te feia tavana tei muri mai ïa i te utuafare ra o Iuda. 17 Te feia i patu i te patu ra, e te feia i hopoi i te hopoia, e te feia i faauta i nia iho, ua rave rima hoê noa i te ohipa, e te tahi rima tei rave i te mauhaa. 18 Te feia i patu ra, ua taamuhia ïa ˈoˈe i te tauupu ra, a rave ai i te patu ra. E o tei faaoto i te pu ra, tei pihaiiho ïa ia ˈu i te tiaraa.
19 Ua parau atura vau i te feia rarahi e te mau tavana, e te taata atoa ra, E ohipa rahi e te purara ê, e ua taa ê tatou i nia i te patu nei, tei te atea ê â vetahi. 20 Ei te vahi ra e ite ai outou i te oto o te pu ra, e horo mai outou i reira ia matou nei: na to tatou Atua e aro i ta tatou tamaˈi. 21 Ua ohipa ihora matou i taua ohipa ra: e na te tahi pae i tapea i te maehae mai te poipoi mai â e ia itea mai te fetia ra. 22 Ua parau atura vau i te mau taata i reira ra, E taoto te taata atoa e to ˈna tavini i roto i Ierusalema nei, ei tiai ia tatou nei i te rui, e ia ao a rave ai i te ohipa. 23 Aita aˈera vau, e tau mau taeae, e tau mau tavini, e te mau faehau i pee mai ia ˈu ra, aita aˈera matou i iriti i to matou ahu; tii atura te taata i te pape ma te mauhaa atoa i te rima ra.