Ezera

TE PARAU A DARIU, E TE HIERO I TE OTIRAA, E TE HAAMOˈARAAHIA.

6 Ua faatupu ihora te arii ra o Dariu i te hoê ture, e imi i roto i te piha vairaa parau, i te vahi i vaiihohia ˈi te taoˈa i Babulonia. 2 E itea ihora i Akemeta, i te fare o te arii i te fenua o te Medai, te hoê otaro parau e te parau atoa i roto, i te na ôraahia e: 3 Tei te matahiti matamua o te arii ra o Kuro: ua faatupu ihora te arii ra o Kuro i te hoê ture i te fare o te Atua i Ierusalema, Ia patu-faahou-hia taua fare ra, i te vahi ta ratou i hopoi i te tusia ra, e ia haamau-hua-hia te niu i taua fare ra; e ono ahuru te kubiti i te teitei, e ono ahuru hoi te kubiti i te aano. 4 Ia toru nanai ofai rarahi, e hoê hoi nanai raau apî: ei ǒ nei ei te fare o te arii nei te taoˈa i te hoo: 5 ia faahoˈihia hoi te mau taoˈa auro e te taoˈa ario no roto i te fare o te Atua ra, tei ravehia mai e Nebukanesa no roto i te hiero i Ierusalema, e ua hopoi mai i Babulonia nei, e hopoi faahou ïa i te hiero i Ierusalema, a tuu atu ai i roto i te fare o te Atua ra. 6 E tena na, e Tatanai, e tavana i tera pae pape, e o Setara-bozanai, e to outou atoa ra i te Apharasateha, i tera pae pape, a haere ê: 7 e vaiiho noa ˈtu i taua ohipa fare no te Atua nei, eiaha e faaorehia ˈtu; e vaiiho noa ˈtu i te tavana o te ati Iuda, e te feia paari ati Iuda ia faatia noa na i taua fare no te Atua nei i to ˈna ra vahi. 8 Teie hoi au a faatupu i te ture, e rave outou e tauturu atu i taua feia paari ati Iuda ra i te paturaa i taua fare no te Atua nei: no roto i te taoˈa a te arii ra, i tei aufauhia mai i tera pae pape, a rave ai i te moni a tuu atu ai i taua mau taata ra, eiaha ei taupǔpû. 9 E e haapao maite hoi i te hopoiraa ˈtu i ta ratou mau taoˈa hinaaro i te mau mahana atoa ra, i te puaatoro oni, e te mamoe oni, e te pinia mamoe, ei tusia taauahi, na te Atua no te raˈi; e te sitona, e te miti, e te uaina, e te hinu, i tei haapaohia e te feia tahuˈa i Ierusalema ra. 10 Ia hopoi ratou i te mau tusia hauˈa i te Atua o te raˈi, e ia pure hoi i te arii, e ta ˈna mau tamarii ia ora. 11 Teie hoi te hoê parau a ˈu, o te taata e ruri ê i teie nei ture, ia iritihia te raau no to ˈna iho fare, e ia faatiahia taua raau ra, a tarî ai i taua taata ra i nia iho; e ia riro noa ˈtu to ˈna fare ei puea. 12 E na te Atua, na tei haamau i to ˈna iˈoa i reira, e rave i te mau arii e te taata atoa ia pohe, ia rave to ratou rima, ia faahuru ê e ia faaore i te fare o te Atua i Ierusalema. Na ˈu na Dariu i haatupu i teie nei ture; ia etaeta te rave ia oti vave.

13 Ua rave ihora te tavana o teie nei pae pape o Tatanai, e o Setara-bozanai, e to ratou atoa ra, i ta te arii ra i ta Dariu i faaue maira, ua rave etaeta ihora ïa. 14 Ua rave ihora te feia paari ati Iuda ua patu, e ua tupu atura ta ratou i te tohu a Hagai peropheta ra, e ta Zekaria a Ido ra. Ua patu ihora ratou e oti roa aˈera, i te parau hoi a te Atua o Iseraela, e te parau hoi a na arii o Peresia a Kuro, a Dariu, e a Aretehasaseta ra. 15 Oti roa aˈera taua fare ra i te mahana toru o te marama ra o Adara, o te ono ïa o te matahiti i te hau o te arii ra o Dariu.

16 Ua haapao atura te tamarii a Iseraela, te mau tahuˈa, e te mau ati Levi, e te mau tamarii atoa i reva ra, i te pûpûraahia o te fare o te Atua nei ma te oaoa: 17 e ua hopoi atura i te pûpûraa i taua fare o te Atua ra hoê hanere i te puaatoro oni, e piti hanere i te mamoe oni, e maha hanere i te pinia mamoe: e no te taraehara na Iseraela atoa ra, hoê ïa ahuru ma piti i te puaaniho oni, ua faito i te taioraa i te mau opu atoa o Iseraela. 18 Ua haapao atura ratou i te faataaraa i te mau tahuˈa, e te mau ati Levi i to ratou ra mau pǔpǔ, i te raveraa i te ohipa a te Atua, i Ierusalema; mai tei papaihia i roto i te buka a Mose ra. 19 Haapao atura te mau tamarii i reva ê ra i te pasa i te mahana hoê ahuru ma maha i te marama hoê ra. 20 Hoê â hoi tamâraahia to te feia tahuˈa e te ati Levi, ua mâ atoa ïa, e ua patia i te pasa na te mau tamarii i reva ê ra, e na to ratou mau taeae te feia tahuˈa, e na ratou iho. 21 E te tamarii a Iseraela mai roto mai i te pau ra, e te feia atoa i faataa ê i te viivii o te fenua etene, ia imi ratou i te Atua o Iseraela ia Iehova, ua amu ïa, 22 e ua haapao i te oroa i te maa faahopue ore ra ma te oaoa, e rui hitu aˈera: na Iehova hoi ratou i faaoaoa mai, e ua faafariu mai i te aau o te arii o Asura ia ratou, ei faaetaeta mai i to ratou rima i te raveraa i te ohipa i te fare o te Atua, i te Atua o Iseraela.