Ezera
TE ENEMI O TE ATI IUDA I TE TIHOTIHORAA IA RATOU IA ARETEHASASETA RA.
4 Ite aˈera te mau enemi o Iuda e to Beniamina e te faatia ra to te pau i te hiero no te Atua o Iseraela no Iehova; 2 ua haere maira ratou ia Zerubabela e te feia raatira matahiapo ra, e ua parau atura ia ratou. E rave atoa tatou i tena na ohipa, te imi atoa nei hoi matou i to outou Atua mai ia outou atoa na: e ua hopoi matou i te tusia na ˈna mai te anotau mai â o te arii o Asura ra o Esarahadona, tei aratai mai ia matou i ǒ nei. 3 Ua parau atura râ Zerubabela, e o Iesua, e te mau raatira matahiapo atoa o Iseraela ra, Aita a outou i ǒ nei ia faatia i te fare o te Atua, na matou ihora e patu i te fare o te Atua o Iseraela o Iehova, tei faauehia mai matou e te arii ra e Kuro, te arii o Peresia. 4 Ua haaparuparu maira te feia fenua i te rima o to Iuda, e ua faahepo ia ratou i te paturaa. 5 E ua tarahu atu hoi i te feia parau ei patoi, ia ore ia tupu to ratou hinaaro, e hope roa aˈera to te arii o Peresia anotau to Kuro, e tae noa ˈtura i te hau o te arii o Peresia ra o Dariu. 6 E tae aˈera i te hau o Ahasueru, i te matamua o to ˈna hau, ua papai ihora ratou i te parau pari i to Iuda e to Ierusalema.
7 E tae aˈera i te anotau ia Aretehasaseta, ua papai ihora Biselama e o Miteradata, e o Tabeela, e to ratou atoa ra, i te arii o Peresia ia Aretehasaseta, i papai-parau-Arama-hia, e ua iritihia hoi i te reo Arama ra. 8 O Rehuma, te taata mana ra, e o Simisai papai parau, o tei papai i te hoê leta i te pariraa ia Ierusalema, i te arii ra ia Aretehasaseta, i na ôhia taua leta ra. 9 Ua papai ihora te taata mana ra o Rehuma, e o Simisai papai parau, e to ratou atoa ra; to Dina, to Apharasateha, to Tarepela, to Apharesa, to Areheva, to Babulonia, e to Susaneka, e to Dehava, e to Elama. 10 E te mau fenua i hopoihia mai e te taata rahi mana ra o Asenapera, e ua haaparahi i roto i te mau oire i Samaria, e to teie pae pape, e te tau mau i papaihia ˈi ra.
11 Teie te huru o taua leta ra ta ratou i hapono atu ia ˈna, i te arii ra ia Aretehasaseta. To oe nei mau tavini, te mau taata o teie pae pape, e te tau mau i papaihia ˈi ra. 12 Ia ite mai oe, e te arii e, o te mau ati Iuda i haere mai i ǒ nei mai ǒ na mai ia oe na, teie mai nei tei Ierusalema te patu faahou nei i te oire orure hau e te ino ra, ua haamauhia te niu i taua oire ra, e ua fatata i te patu i te aua. 13 Ia ite mai hoi oe, e te arii, e i faatiahia teie nei oire, e ia oti te aua, e ore ratou e horoa mai i te telo, e te taoˈa aufau, e te mau peu; iti ihora te taoˈa a te arii i haapaohia ra. 14 E teie nei, no ǒ na mai no te fare o te arii ra to matou maitai i te noaaraa; e ore hoi e tia ia matou ia hiˈo noa ˈtu i te arii i te tuu-haehaa-raahia, i hapono atu ai matou i teie nei parau ei faaite; 15 e ia imihia i roto i te parau papai a to mau metua. E itea ia oe i roto i taua parau papai ra, e ite oe e oire orure hau taua oire nei, e te hamani ino i te hui arii e te mau fenua; i roto i taua oire ra te parau orure hau mai tahito mai i te faatupuraahia; no reira hoi i pau ai taua oire nei. 16 Te faaite nei matou i te arii, e ia faatia-faahou-hia teie nei oire, e ia oti faahou te patu, aore roa o oe e tufaa i teie nei pae pape.
17 Ua hapono aˈera te arii i te leta ei motoiraa ˈtu i ta te taata mana ra i ta Rehuma, e ta Simisai papai parau, e to ratou atoa i parahi i Samaria, e to te feia i tera pae pape ra, Ia ora na, e te tau mau i papaihia ra. 18 Te leta i haponohia mai e outou ia matou nei, ua oti i te iritihia e ua taiohia mai ia ˈu nei. 19 E ua faaue aˈenei au e ua imihia, e ua itea hoi e, e oire hauti teie nei oire mai tahito mai, i te mau arii, e ua faatupuhia te hauti e te amui parau ino ra i roto i taua oire ra; 20 e arii mana anaˈe to Ierusalema, e tei ia ratou te hau e tae noa ˈtura i te tahi pae pape i te mau fenua atoa; e ua horoahia te telo, e te taoˈa aufau, e te mau peu atoa ra ia ratou. 21 E tena na, e faaite haere i te ture, e faaea taua mau taata na, eiaha taua oire ra e patu-faahou-hia, e ia tae atu na te tahi ture no ǒ nei atu ia ˈu nei. 22 E tena na, faaitoito, e rave i taua parau nei eiaha ia ore; a ino hoi te hui arii ra.
23 E ia taiohia te leta a te arii ra a Aretehasaseta i te aro o Rehuma, e Simisai papai parau, e to ratou atoa ra, haere etaeta ˈtura ratou i Ierusalema, i te mau ati Iuda ra, e ua faaore atura i ta ratou paturaa ma te puai e te mana. 24 Ore aˈera taua ohipa i te fare o te Atua i Ierusalema ra, Ore roa aˈera e tae noa ˈtura i te matahiti piti i te hau o te arii o Peresia ra o Dariu.