Paraleipomeno 2
E AUAHI NO TE RAˈI MAI, EI FAATIA I TE PURE A SOLOMONA.
7 E ia faaoti aˈera Solomona i ta ˈna pure, ua mairi maira te auahi no te raˈi mai, pau roa aˈera te tusia taauahi, e te mau tusia; î roa aˈera te fare i te hanahana o Iehova. 2 Aita aˈera te mau tahuˈa i ô i roto i te fare o Iehova, no te mea ua î te fare o Iehova i te hanahana o Iehova. 3 E ite aˈera te tamarii a Iseraela i te auahi i te mairiraa mai, e te hanahana o Iehova i nia taua fare ra, ua piˈo ihora to ratou mata i raro i te repo i nia i te patu ra, e ua haamori e ua haamaitai ia Iehova, na ô aˈera, E maitai to ˈna; e tia to ˈna aroha i te vai-maite-raa.
4 Ua hopoi atura te arii e te mau taata atoa i te tusia ia Iehova. 5 Ua hopoi atura te arii ra o Solomona i te tusia hoê taau ma piti i te tausani i te puaatoro, hoê hanere e piti ahuru i te tausani i te mamoe; i na reira te arii e te taata atoa i te haamoˈa i te fare o te Atua. 6 Te haapao ra te feia tahuˈa i ta ratou ravea: e te mau ati Levi ma te mau mea faaoto na Iehova ra, i hamanihia e te arii ra, e Davida ei haamaitairaa ia Iehova, no te mea e tia to ˈna aroha i te vai-maite-raa, a himene ai hoi Davida o ratou te haapao: e i mua mai ia ratou ra, o te mau tahuˈa ïa i te faaotoraa i te pu, e o Iseraela atoa i te tia paatoaraa e ati noa ˈˈe. 7 Ua oti hoi i te haamoˈahia e Solomona te vahi i ropu i te aumoa, i mua i te fare o Iehova: i reira hoi oia i te hopoiraa i te tusia taauahi, e te toâhua o te mau tusia no te maitai ra, no te mea aita aˈera e ô te mau tusia taauahi, e te mau tusia amu, e te toâhua i nia i te fata veo ra, i tei hamanihia e Solomona ra.
8 I reira hoi Solomona, e o Iseraela atoa, e feia rahi, mai te tomoraa i roto ia Hamata e tae noa ˈtura i te pape ra i Aiphiti, i te haapaoraa i te oroa e rui hitu aˈera. 9 Ia tae hoi i te rui vau ra, e apooraa ïa ta ratou: rui hitu atura to te haamoˈaraa i te fata ra, rui hitu hoi to te oroa. 10 E tae aˈera i te taau ma toru o te mahana i te marama hitu ra, ua tuu noa ˈtura oia i te mau taata ia haere noa na i te utuafare, ma te oaoa, e te rearea o te aau, i te mau maitai a Iehova i faaite mai ia Davida, e ia Solomona, e ia Iseraela atoa i to ˈna ra taata.
11 E oti aˈera te fare o Iehova ia Solomona, e te fare o te arii, e ua oti roa aˈera ia Solomona te mau mea atoa ta ˈna i manaˈo e rave, i te fare o Iehova, e to ˈna atoa ra fare.
12 Ua fa maira Iehova ia Solomona i te po, e ua parau maira ia ˈna, Ua faaroo vai i ta oe pure, e ua haapaohia e au teie nei vahi, ei fare tusia. 13 Ia opanihia e au te raˈi e aita ˈtura e ûa, e ia parau vau i te vava e amu i te fenua, e ia tuu atu vau i te maˈi i to ˈu ra mau taata; 14 ia faahaehaa mai to ˈu ra taata tei mairihia i to ˈu ra iˈoa, e ia pure, e ia imi mai i to ˈu nei mata, e ua fariu mai i ta ratou parau ino ra, ei reira vau e faaroo ai i nia i te raˈi, e faaore au i ta ratou haa, e e faaora vau i to ratou fenua. 15 E teie nei, e faaaraara ïa vau i tau mata, e faaroo vau i te pure i purehia i ǒ nei. 16 I teie nei, ua haapaohia e au e ua haamoˈahia e au teie nei fare, ia vai mau atu â to ˈu iˈoa i reira e a muri noa ˈtu; e ei reira hoi to ˈu mata e to ˈu aau e vai tamau maite atu ai. 17 Area o oe ra, ia na mua maite â oe ia ˈu i te haere, mai to metua a mai ia Davida, e ia rave oe i ta ˈu i parau atu ia oe ra, e ia haapao i ta ˈu mau peu e ta ˈu ra mau haapaoraa: 18 e haamau hoi au i to oe a terono i to oe ra basileia, mai ta ˈu â hoi i faaau i te parau i to metua ia Davida, a na ô ai au ra e, E riro te hoê o to oe a huaai ei tavana i nia ia Iseraela. 19 Ia fariu ê ra outou, e ia faarue mai i ta ˈu nei mau peu e ta ˈu nei mau parau i tuuhia ˈtu e au i mua ia outou, e ia haere â outou e ia haamori i te mau atua ěê, e ia tavini outou i te reira; 20 e taihitumuhia ratou e au i reira, i te fenua i horoahia e au no ratou; e teie nei fare i haamoˈahia e au i to ˈu iho nei iˈoa, e faarue-ê-hia ïa e au i reira e ia moe atu, e e tauaparauhia, e riro ei parauraa i te mau fenua atoa. 21 E teie nei fare e teitei nei, e riro ei maereraa na te taata atoa e na reira i te haere; e riro oia i te parau e, Eaha ra i na reira mai ai Iehova i te rave i teie nei fenua e teie nei fare? 22 Ei reira oia e parauhia ˈtu ai e, No te mea, ua faarue ratou i te Atua o to ratou mau metua ia Iehova, tei aratai mai ia ratou mai te fenua maira mai Aiphiti, e ua ati atu ratou i te mau atua ěê, e ua haamori ia ratou, e ua tavini atu ia ratou: i hopoi mai ai oia i teie atoa nei mau ino i nia ia ratou.