Paraleipomeno 2
TE AFATA I HOPOIHIA I ROTO I TE VAHI MOˈA RA.
5 Oti aˈera te mau ohipa i ravehia e Solomona no te fare o Iehova; e ua hopoi maira Solomona i te mau mea atoa i pûpûhia e tana metua e Davida; e te mau ario, e te auro, e te mau mea atoa ra, tei tuuhia e ana i roto i te pueraa taoˈa o te fare o te Atua.
2 Ua haaputu ihora Solomona i te feia paari o Iseraela, e te feia rarahi no nia i te mau opu ra, e te hui matahiapo o te tamarii a Iseraela, i Ierusalema, e tii e hopoi mai i te afata faufaa a Iehova, mai roto mai i te oire o Davida, oia hoi Ziona. 3 Ua haaputuputu maira to Iseraela i pihaiiho i te arii ra, i te oroa patiaraa tiahapa ra, oia te marama hitu ra. 4 Ua haere maira te feia paari atoa o Iseraela; ua rave ihora te ati Levi i te afata. 5 E ua hopoi maira ratou i te afata, e te tiahapa amuiraa, e te mau mea moˈa atoa i roto i te tiahapa, o tei hopoi-atoa-hia mai e te feia tahuˈa e te ati Levi. 6 E o Solomona hoi, e Iseraela atoa i te putuputu-atoa-raa i reira i mua i te afata, te hopoi ra i te mamoe e te puaatoro ei tusia, eita e tia ia taio i te rahi. 7 Ua hopoi maira te feia tahuˈa i te afata faufaa a Iehova, i roto i te vairaa ra, i te vahi parau aro o te fare ra, i te vahi moˈa roa, i raro aˈe i na pererau o te kerubi ra: 8 e hohora hoi na kerubi i te pererau na nia i te vairaa afata, e moe hoi te afata e na maurima i te kerubi. 9 E no te maoro o te maurima i itea-noa-hia ˈi te hopea i taua afata ra i mua ˈˈe i te vahi parauraa ra, eita râ e itea i rapae: e tei reira hoi te vairaa e tae roa aˈenei i teie nei mahana. 10 Aita o roto i taua afata ra maori râ na pǎpǎ ofai ra ta Mose i tuu i roto i Horeba ra, a faaau ai Iehova i te faufaa i te tamarii a Iseraela, a haere mai ai mai Aiphiti maira.
11 E tae maira te feia tahuˈa i rapae au mai i taua vahi moˈa ra: ua hope hoi te feia tahuˈa i itea i te haamoˈahia, aore hoi ratou i haapao i te pǔpǔ i reira: 12 e te mau ati Levi, te feia himene, no te pǔpǔ o Asapha, e to Hemana, e to Iedutuna, e ta ratou mau tamarii, e to ratou mau taeae, ma te ahu teatea maitai ra, e ma te sumebalo, e te kinura, e te nabala, i te tia-noa-raa i te pae i te hitia o te râ i te fata ra; e na tahuˈa hoê hanere e piti ahuru, ma te pu atoa i te faaotoraa: 13 ua amui aˈera te feia faaoto pu e te feia himene i te reo hoê, i te arueraa, e te haamaitairaa ia Iehova; e ia faateitei aˈera ratou i to ratou reo ma te pu, e te sumebalo, e te mau mea e faaotohia ra, i te arueraa ia Iehova, e te na ôraa e, E maitai hoi to ˈna; e tia to ˈna aroha i te vai-maite-raa; ua î maira taua fare ra i te ata, te fare o Iehova: 14 e aita ˈtura te feia tahuˈa e mau ia rave i te toroa i taua ata ra; ua î hoi taua fare o te Atua ra i te hanahana o Iehova.