Paraleipomeno 2
TE NUU O ASURA I TE PAURAA I TE MELAHI A TE ATUA RA.
32 E oti maitai aˈera teie nei mau parau, ua haere maira te arii o Asura o Senakeriba, e i roto ia Iuda: ua patia ihora i te puhapa e rave i na oire i faaetaetahia ra, parau aˈera o te noaa ia ˈna i te haru noa. 2 E ite aˈera Hezekia e, tera ˈˈe Senakeriba, e te opua ra oia e aro ia Ierusalema, 3 ua faaau aˈera oia i te parau i te hui raatira, e te feia aito, e opani i te pihaaraa mai o te pape, i rapae au mai i te oire: e ua rave atoa maira hoi ratou. 4 E feia rahi hoi tei putuputu mai, e ua opani atura ratou i te mau pape atoa, e te pape e tahe tia na ropu i te fenua ra, e ua na ô aˈera, Ia rahi anei hoi te pape a roohia mai ai e te mau arii o Asura ra? 5 Ua faaitoito ihora hoi oia, e ua patu faahou i te patu i marua i raro ra, e ua faatia i te pare i nia, e te tahi patu ê â no rapae au, ua faaetaeta ihora hoi oia ia Milo i roto i te oire o Davida, e ua hamani hoi i te maehae, e te paruru e rave rahi. 6 Ua haapao atura oia i te raatira no te tamaˈi i nia i te mau taata, e ua haaputuputu maira ia ratou i pihaiiho ia ˈna i te area i te uputa o te oire, e ua parau haamahanahana ˈtura oia ia ratou, na ô atura, 7 E faaetaeta, e ia rahi te itoito; eiaha e mǎtaˈu, eiaha e taiâ i te arii o Asura, e taua feia rahi atoa e pee ia ˈna ra: e mana rahi hoi to ˈna to tei ati mai ia tatou nei, i to taua feia atoa i ati mai ia ˈna ra: 8 e rima taata tei ia ˈna; ia tatou nei râ, o to tatou Atua ïa o Iehova, ei tauturu ia tatou e ei aro i ta tatou tamaˈi. Tiaturi maite aˈera te mau taata i te parau a te arii o Iuda ra a Hezekia.
9 E i muri aˈe i te reira, ua tono maira Senakeriba te arii o Asura i te mau taata no ˈna (area oia iho e te nuu atoa te aro ra ïa ia Lakisa) i Ierusalema, i te arii o Iuda ia Hezekia, e ia Iuda atoa ra i parahi i Ierusalema ra, na ô atura, 10 Te parau maira te arii o Asura o Senakeriba, Te tiaturi na outou i te aha, i parahi ai outou i roto i te pare i Ierusalema? 11 E ere anei o Hezekia tei parau ia outou, na to tatou Atua na Iehova e faaora ia tatou i te rima o te arii o Asura, ia pohe outou i te poia e te poihâ? 12 E ere anei o taua taata ra o Hezekia tei hopoi ê i te mau vahi teitei na ˈna e te mau fata, e ua parau ia Iuda e ia Ierusalema, i te na ôraa ˈtu e, Hoê a outou fata ia haamori a tutui ai i te mea noˈanoˈa i nia iho i te reira? 13 Aita outou i ite i tei ravehia e au e tau mau metua atoa i te taata atoa no te mau fenua ra? te tia ra te mau atua no taua mau fenua ra ia faaora i to ratou fenua i tau rima nei? 14 O vai to te mau atua o taua mau fenua i pohe i tau mau metua ra, i tia ˈi ia ˈna ia faaora i to ˈna taata i tau rima nei, a ora ˈi outou i to outou Atua i tau rima nei? 15 E tena na, eiaha outou e vare ia Hezekia, eiaha e aueue, eiaha e faaroo: aita hoi e atua to te mau fenua, e te mau basileia, i tia ia faaora i to ˈna taata i tau rima nei, e te rima hoi o tau mau metua ra, eaha e tia ˈi i to outou Atua ia faaora ia outou i tau rima nei? 16 E rahi roa maira hoi ta te mau tavini parau ino i te Atua ia Iehova, e tana tavini hoi ia Hezekia. 17 E ua papai hoi oia i te leta faaino i te Atua o Iseraela ia Iehova; i te faainoraa ˈtu ia ˈna, i te na ôraa ˈtu e, Mai te mau atua no te mau fenua ra aore i faaora i to ratou taata i tau rima nei, e ore atoa te Atua o Hezekia e faaora i to ˈna taata i tau rima nei. 18 Ua pii hua ˈtura ratou i te reo ati Iuda i te mau taata o Ierusalema i nia i te patu ra, ei haamataˈutaˈuraa, e ei faaahoaho; ia pau te oire ia ratou. 19 Ua faaino atura ratou i te Atua o Ierusalema, mai ia ratou atoa i faaino i te mau atua o tei fenua ěê, tei hamanihia e te rima taata nei.
20 E no te reira, ua pure ihora te arii ra o Hezekia, e te peropheta o Isaia a Amosa, e ua pii atura i nia i te raˈi. 21 Ua tono maira Iehova i te hoê melahi, pau ihora te feia aito atoa i pohe, e te feia rarahi, e te mau raatira o te nuu a te arii o Asura; ua hoˈi atura oia ma te mata haama i to ˈna iho fenua. E tae atura oia i roto i te fare o to ˈna ra atua, na to ˈna iho pue tamarii i fanau i taparahi ia ˈna i te ˈoˈe. 22 Ua ora ihora Hezekia e to Ierusalema atoa ia Iehova, i te rima o te arii o Asura o Senakeriba, e i te rima o te taata atoa, e ua tiai ia ratou ia ora e ati noa ˈˈe. 23 E feia rahi hoi tei hopoi mai i te taoˈa na Iehova i Ierusalema, e te taoˈa hoi na te arii o Iuda na Hezekia: e mai reira hoi, tura noa ˈtura oia i te mau fenua atoa ia hiˈo mai.
24 Tei taua anotau ra hoi to Hezekia poheraa i te maˈi, e maˈi pohe, e ua pure ihora oia ia Iehova: e ua parau maira oia ia ˈna, e ua tuu maira i te tapao ora ra. 25 Aita râ Hezekia i haapao maitai i taua maitai i horoahia mai no ˈna ra; teoteo aˈera râ te aau: i tupu ai te riri ia ˈna, e ia Iuda hoi e ia Ierusalema. 26 Ua faahaehaa ihora râ Hezekia i taua teoteo aau no ˈna ra, oia e to Ierusalema atoa; aita aˈera ratou i roohia mai e te riri o Iehova i taua anotau o Hezekia ra.
27 E taoˈa rahi, e te hinuhinu rahi ta Hezekia; e ua hamani oia i te vairaa ario, e te auro, e te ofai maitatai, e te raau noˈanoˈa, e te paruru, no te mau mea maitatai atoa ra: 28 e te fare vairaa no te sitona, e te uaina, e te hinu olive; e te vairaa hoi no te mau puaa e rave rahi, e te vairaa hoi no te mamoe. 29 Ua faatia hoi oia i te oire no ˈna iho; e rave rahi ta ˈna nǎnǎ mamoe, e te nǎnǎ puaatoro; e taoˈa rahi hoi ta te Atua i horoa mai na ˈna. 30 Ua opani ihora hoi taua taata ra o Hezekia i te pape i nia i Gihona, e ua tatai maite maira i te pae i te tooa o te râ i te oire o Davida: e ta Hezekia atoa i rave ra, ua tupu anaˈe ïa. 31 Area te mau vea ra, te hui rarahi i Babulonia ra, tei tonohia mai ia ˈna e ui i te semeio i ravehia i taua fenua ra, i vaiihohia ihora oia e te Atua, ei tamataraa ia ˈna, ia ite oia i te huru o to ˈna hoi aau.
32 E te toea o te parau a Hezekia, e te maitai no ˈna, inaha, ua papaihia ïa i roto i te orama a Isaia peropheta a Amosa ra, e i roto hoi i te buka a te mau arii o Iuda e o Iseraela. 33 Taoto ihora Hezekia i ǒ to ˈna ra mau metua, e ua tanu ratou ia ˈna i roto i te menema maitai a te mau tamarii a Davida; e ua faatura ˈtura to Iuda e to Ierusalema atoa ia ˈna i te poheraa ra. Monohia aˈera oia i te hau i te tamaiti ra ia Manase.