Paraleipomeno 2

E HAU INO TO AHAZA, E TO ˈNA ATI RAHI IA ARAMA.

28 Ua tae Ahaza i te taau i to ˈna matahiti i arii ai oia, hoê ahuru hoi ma ono o ˈna matahiti i te ariiraa i Ierusalema: aita râ oia i rave i te parau-tia i te aro o Iehova, mai tana tupuna ra mai ia Davida. 2 Ua haapao râ oia i te eˈa o te mau arii o Iseraela, e ua hamani i te idolo faatôhia na Baala. 3 E ua tutui oia i te mea noˈanoˈa i te peho o te tamaiti a Hinoma, e ua tutui i ta ˈna mau tamarii i te auahi, i te parau faufau hoi o te mau fenua, o tei hee ia Iehova i te aro o te tamarii a Iseraela ra. 4 Ua hopoi hoi oia i te tusia, e ua tutui i te mea noˈanoˈa i nia i te mau vahi teitei, e i nia i te mouˈa, ei raro aˈe i te mau raau marumaru atoa ra. 5 I tuu ai to ˈna Atua o Iehova ia ˈna i te rima o te arii o Arama ra; pohe atura oia, e rave rahi te taata i hopoi-tîtî-hia e ratou, e ua hopoi i Damaseko ra. E i tuua-atoa-hia hoi oia i te rima o te arii o Iseraela, e pau roa ˈtura oia i reira.

6 Pohe ihora hoi ia Peka a Remalia i Iuda, hoê hanere e piti ahuru i te tausani i te mahana hoê, e feia aito anaˈe; no te mea, ua faarue ratou i te Atua o to ratou mau metua ia Iehova. 7 E na te hoê taata puai no Epheraima, na Zikeri, i taparahi ia Maaseia, te tamaiti a te arii ra, e ia Azerikama, te tavana o te fare, e ia Elikana, i pihaiiho i te arii ra. 8 E na te tamarii a Iseraela i hopoi tîtî i to ratou mau taeae, e piti hanere i te tausani, i te vahine, e te mau tamaroa, e te tamahine; e ua rave maira i ta ratou taoˈa e mea rahi, e ua hopoi i taua taoˈa ra i Samaria. 9 I reira râ te hoê peropheta a Iehova, Odeda te iˈoa; e ua haere ihora oia e farerei i taua nuu ra aita i tae i Samaria ra, e ua parau atura ia ratou, Inaha, no te mea e riri to te Atua o to outou mau metua to Iehova ia Iuda, i tuu mai ai oia ia ratou i to outou na mau rima, e ua taparahi iria noa outou ia ratou, e ua tae roa to outou riri i nia i te raˈi ra. 10 E tena na, te opua na outou i te mau tamarii o Iuda e o Ierusalema e faariro ei tavini tane e ei tavini vahine no outou: aita anei e hara atoa to roto ia outou iho i to outou Atua ia Iehova? 11 E tena na, e faaroo mai na, e faahoˈi outou i tena na mau tîtî i ravehia mai e outou no roto i to outou mau taeae na: aore ra, e roohia mai outou e te riri rahi o Iehova. 12 O te tahi pae hui raatira no te mau tamarii a Epheraima, o Azaria a Iohanana, o Berekia a Mesilemota, o Iehizakia a Saluma, e o Amasa a Hadalai, ua tia maira i nia, ua patoi maira i taua feia mai te tamaˈi maira e ua parau maira ia ratou, 13 Eiaha outou e aratai mai i tena na mau tîtî i ǒ nei, a rahi ta matou hara i te aro o Iehova. Te hinaaro na outou i te faarahi mai i to matou ino e ta matou hara? ua rahi hoi ta matou hara, e te uˈana ra te riri ia Iseraela. 14 Ua faarue maira te feia mauhaa tamaˈi ra i te mau tîtî e te taoˈa, i mua i te aro o te hui raatira e taua feia rahi atoa ra. 15 Ua tia maira taua feia i parauhia ra, ua rave aˈera i te mau tîtî, e ua faaahu atura i te feia veve, no roto i taua taoˈa ra; ua faaahu hoi ia ratou, e ua faatamaa hoi, e ua faaamu e ua faainu, e ua faatavai hoi ia ratou, e ua faauta i te feia i paruparu ra i nia i te asini, e ua aratai i Ieriko, i te oire tamara ra, i to ratou ra mau taeae; e ua hoˈi atura ratou i Samaria.

16 I reira to taua arii ra to Ahaza tonoraa i te vea i te arii o Asura ia tauturu mai oia ia ˈna. 17 Ua haere faahou mai hoi te ati Edoma e ua tairi ia Iuda, e ua hopoi-ê-hia te tîtî. 18 Ua parahihia hoi te mau oire i raro ra e te Philiseti, e to te pae i apatoa i Iuda ra, e ua pau Bete-semesa, e o Aialona, e o Gederota, e o Soko e te mau oire rii atoa, e o Timina e te mau oire rii atoa, e o Gimezo atoa e te mau oire rii atoa; e te parahi ra hoi i reira. 19 Ua tuu haehaahia ihora Iuda e Iehova, na Ahaza, no te arii o Iseraela; ua paruparu hoi Iuda ia ˈna, ua rahi hoi ta ˈna hara ia Iehova. 20 Ua haere maira te arii o Asura o Tigelata-pilesera ia ˈna, aita râ oia i faaetaeta mai, e ati râ to ˈna ia ˈna. 21 Ua rave ihora hoi Ahaza i te tahi taoˈa no roto i te fare o Iehova, e no roto hoi i te fare o te arii ra, e ta te feia raatira, e ua hopoi na te arii no Asura ra; aita râ oia i turu mai ia ˈna.

22 E ia roohia oia e te ati ra, ua rahi roa ta ˈna hara ia Iehova i reira, o taua arii ra o Ahaza teie. 23 Ua hopoi oia i te tusia i te mau atua no Damaseko, o tei tairi mai ia ˈna ra; ua na ô aˈera hoi oia, No te mea, ua tauturu mai te mau atua o te mau arii o Arama ra ia ratou, e hopoi au i te tusia ia ratou, ia tauturu mai hoi ratou ia ˈu. Riro atura râ ratou ei pohe no ˈna, e ia Iseraela atoa. 24 Ua haaputuputu maira Ahaza i te mau mea atoa o te fare o te Atua ra, e ua tapǔpû hoi i taua mau mea atoa i te fare o te Atua ra, e ua opani i te mau uputa o te fare o Iehova, e ua hamani hoi i te fata na ˈna iho i te mau poro aroâ i Ierusalema. 25 E ua hamani oia i te vahi teitei anaˈe i te mau oire atoa o Iuda, ei tutuiraa mea noˈanoˈa na te mau atua ěê ra, faariri atura i te Atua o to ˈna ra mau metua, ia Iehova.

26 E te toea o ta ˈna parau e te haerea atoa no ˈna, o tei mua e tei muri, inaha, ua papaihia i roto i te buka a te mau arii o Iuda e o Iseraela. 27 Taoto ihora Ahaza i ǒ to ˈna ra mau metua, e tanuhia ˈtura e ratou i roto i te oire ra o Ierusalema; aita râ ratou i hopoi ia ˈna i roto i te mau menema o te mau arii o Iseraela; e monohia aˈera oia i te hau i te tamaiti ra ia Hezekia.