Paraleipomeno 2
TE HAU O ABIA, E TO IEROBOAMA PAURAA IA ˈNA.
13 E tae aˈera i te ahuru ma vau o to te arii ra to Ieroboama matahiti, i arii ai Abia i nia ia Iuda. 2 E toru o ˈna matahiti i te ariiraa i Ierusalema. O Mikaia te iˈoa o to ˈna metua vahine, e tamahine na Uriela i Gibea ra. E tamaˈi hoi ta Ieroboama raua a Abia. 3 Ua haamau ihora Abia i te aro, e nuu taata tamaˈi anaˈe ta ˈna, e maha hanere i te tausani, e feia maitihia: ua haamau ihora hoi Ieroboama i te aro e rave ia ˈna, e vau ïa hanereraa i te tausani, e feia maitihia, o te mǎtau ore anaˈe.
4 Ua tia ˈtura Abia i nia i te mouˈa ra o Zemaraima tei te mouˈa ra o Epheraima, e ua na ô atura, A faaroo mai na, e Ieroboama, e Iseraela atoa hoi; 5 aita outou i ite e, na te Atua no Iseraela na Iehova i horoa mai i te basileia ra ia Iseraela ia Davida e no ˈna roa ˈtu, no ˈna e no ta ˈna mau tamarii, ei parau faaauhia ma te miti ra? 6 E inaha, o Ieroboama a Nebata, e tavini no Solomona a Davida ra, ua tia mai ïa e ua amui i te parau i to ˈna ra fatu. 7 E ua amui atoa mai ia ˈna te taata taiata e te haapao ore, o tei faaitoito e rave ia Rehoboama a Solomona ra, te vai apî ra Rehoboama i reira, e te itoito ore hoi o te aau, e aita aˈera oia i mau ia patoi atu. 8 E tena na, te manaˈo na outou, e pau te basileia a Iehova i te rima o te mau tamarii o Davida. E feia rahi â hoi outou; e tena atoa na kafa auro, ta Ieroboama i hamani ei atua no outou. 9 E ere anei ua faarue outou i te feia tahuˈa no Iehova, te mau tamarii a Aarona e te ati Levi e ua faariro noa iho nei outou i te taata ei tahuˈa na outou mai ta te mau fenua ěê ra? e ua haere anaˈe mai te taata e haamoˈa ia ˈna iho ma te puaatoro oni apî hoê e na mamoe oni e hitu, e riro ïa ei tahuˈa na te mau mea e ere i te atua ra. 10 Area matou nei, o Iehova ïa to matou Atua, e aita aˈenei matou i faarue ia ˈna: e te mau tahuˈa na ˈna tei rave i te ohipa na Iehova ra, e tamarii ïa na Aarona, e te rave nei hoi te mau ati Levi i ta ratou. 11 E te tutui nei ratou i te mau ahiahi atoa nei e te mau poipoi atoa nei i te tusia taauahi na Iehova, e te mea noˈanoˈa ra: e te pane o te aro nei, te faanaho maite nei i nia i te airaa-maa auro maitai ra; e te faaitoito nei i te vairaa-lamepa auro ia tutuihia te mau lamepa i te mau ahiahi atoa nei: te haapao nei hoi matou i tei faaitoitohia mai e to matou Atua, e Iehova; area outou ua faarue ïa ia ˈna. 12 E inaha, teie iho te Atua tei ia matou, ei raatira no matou, e te tahuˈa atoa na ˈna, ma te pu anaˈe ei faaoto atu ia outou. E te mau tamarii a Iseraela e, eiaha outou e aro mai i te Atua o to outou mau metua ra ia Iehova; e ore ïa e tupu.
13 Ua faauehia râ e Ieroboama te taoto ia na muri mai ia ratou: tei mua mai hoi ratou ia Iuda, e tei muri mai hoi te taoto. 14 E ia hiˈo ati Iuda i muri, inaha, tei mua te tahi aro e tei muri te tahi: au pii atura ratou ia Iehova, e ua faaoto ihora te mau tahuˈa i te mau pu. 15 Ua umere ihora to Iuda; te umere noa ra to Iuda, pau ihora Ieroboama i te Atua e Iseraela atoa i te aro o Abia e o Iuda. 16 Fati atura te tamarii a Iseraela i te aro o Iuda; e ua tuu maira te Atua ia ratou i roto i to ratou rima. 17 Ua taparahi atura Abia e te mau taata atoa no ˈna ia ratou, e pau rahi atura; e pae hanere i te tausaniraa i te taata aito no Iseraela tei mairi pohe roa i reira ra. 18 Vi atura te tamarii a Iseraela i reira; aito atura te tamarii a Iuda, no te mea, te tiaturi ra ratou i te Atua o to ratou ra mau metua ia Iehova. 19 Ua tipapa ˈtura Abia ia Ieroboama, e riro maira ia ˈna eie nei pue oire, o Betela, e to reira mau oire rii, e o Iesana, e to reira mau oire rii, e o Epheraima e to reira mau oire rii. 20 Aita hoi Ieroboama i etaeta faahou i to Abia ra anotau, tairihia ihora hoi oia e Iehova e pohe roa aˈera.
21 Tupu atura râ Abia i te etaetaraa, e ua faaipoipo atura i na vahine hoê ahuru e ma maha, e fanau maira hoi a ˈna pue tamaroa hoê taau e ma piti, e na tamahine hoi hoê ahuru e ma ono. 22 E te toea o te parau ia Abia, e ta ˈna haapaoraa, e ta ˈna mau parau, ua papaihia ïa i roto i te buka a te peropheta ra a Ido.