Paraleipomeno 1
TE HAMANI MAITAI O HIRAMA IA DAVIDA.
14 Ua tono maira Hirama te arii o Turia ra i te vea ia Davida, ma te raau arezi e te feia tarai ofai, e te tahuˈa tarai raau, ei faatia i te fare no ˈna. 2 E ite atura Davida e ua papu oia ia Iehova ei arii no Iseraela, e ua faateitei-roa-hia to ˈna basileia no to ˈna taata no Iseraela.
3 Ua rave ihora Davida i te vahine i Ierusalema, e ua fanau mai â ta ˈna tamarii tamaroa e te tamahine. 4 Tei te iˈoa o na tamarii ta ˈna i fanau i Ierusalema; o Samua, e o Sobaba, e o Natana, e o Solomona. 5 O Ibehara, e o Elisua, e o Elepaleta. 6 E o Noga, e o Nephega, e o Iaphia. 7 E o Elisama, e o Eliada, e o Eliphaleta.
8 E ite aˈera te Philiseti e, ua faatahinuhia Davida ei arii i nia ia Iseraela atoa ra, ua haere anaˈe maira te Philiseti e imi ia Davida. Ite aˈera hoi Davida, ua haere atura e aro ia ratou ra. 9 Tae maira hoi taua mau Philiseti ra, e apǐ aˈera ia ratou taua peho ra o Rephaima. 10 Ua ui atura Davida i te Atua, na ô atura, E haere anei au e rave i te Philiseti, e horoa mai anei oe ia ratou i tau rima? Ua parau maira Iehova ia ˈna, A haere, a rave, e horoa vau ia ratou i to rima na. 11 Ua haere atura oia i Baala-perazima; pau ihora ratou ia ˈna i reira. Ua na ô aˈera Davida, Ua amaha tau mau enemi ia ˈu i te Atua, mai te pape e amaha ra: mairi ihora i te iˈoa o taua vahi ra ia Baala-perazima. 12 E no te mea, ua vaiihohia to ratou mau atua idolo i reira, ua faaue atura Davida, ama ˈtura ratou i te auahi.
13 Ua haere maira hoi te Philiseti, e ua apǐ faahou ia ratou taua peho ra o Rephaima. 14 Ua ui atura Davida i te Atua; ua parau maira te Atua ia ˈna, Eiaha ratou e tipapahia; e fariu ê râ oe ia ratou a na ô mai ai te rave ia ratou e na te pae uru mabere ra. 15 E ia faaroo oe i te aheheraa i te auru o taua mau mabere ra, a haere ai oe a rave ai: ua reva hoi te Atua ua na mua ia oe e rave i taua nuu Philiseti ra. 16 Ua na reira hoi Davida i ta te Atua i parau mai ia ˈna ra: pau ihora taua nuu Philiseti ra, mai Gibeona mai e tae noa ˈtura i Gazera ra. 17 Tui atura te roo o Davida e ati noa ˈˈe te mau fenua atoa; ua tuu ihora Iehova i te mǎtaˈu i roto i te aau o to te mau fenua atoa ia ˈna.