Te mau arii 2
O NAAMANA I TE ORARAA I TANA MAˈI RA E LEPERA.
5 O Naamana raatira rahi o te nuu o te arii o Arama ra, e taata rahi oia i to ˈna ra fatu, e te tura, no te mea ua horoa mai Iehova i te ora no Arama ia ˈna. E taata itoito hoi oia, e lepera râ. 2 Te hoê ra mau pǔpǔ taata no Arama, i haere noa ra ratou e ua rave mai i te hoê potii iti no Iseraela mai ei tîtî; te tavini ra oia i te vahine a Naamana. 3 Ua parau atura oia i tana fatu vahine iho, Ahiri tau fatu i tae i te peropheta i Samaria ra! e ora hoi tana maˈi ra e lepera ia ˈna. 4 Ua haere ihora Naamana i roto, e ua faaite atura i tana fatu, na ô atura, Te na ô maira te potii iti no te fenua mai o Iseraela. 5 Ua parau maira te arii o Arama ra, A haere, e haere hua i reira, e na ˈu e papai i te leta i te arii o Iseraela. Reva ˈtura oia, e ua hopoi atoa i na taleni ario hoê ahuru, e ono tausani sekela auro, hoê hoi ahuru i te ahu. 6 Ua hopoi atura oia i taua leta ra i te arii o Iseraela, te na ô ra taua leta ra, Ia tae atu teie nei leta ia oe na, e faaora oe i tau tavini ia Naamana i tana maˈi lepera ra; inaha ua tono hoi au ia ˈna ia oe na. 7 E oti aˈera taua leta ra i te taiohia e te arii o Iseraela, ua hahae ihora i to ˈna ahu, e ua na ô aˈera, E Atua anei hoi au nei, e tei ia ˈu anei te pohe e te ora, i tono mai ai teie nei taata ia ˈu nei e faaora i te taata i te lepera nei? E teie nei, haamanaˈo maitai iho na, te imi nei teie taata i te hara ei pariraa mai ia ˈu.
8 Ite aˈera râ Elisaia te taata no te Atua e, ua hahae te arii o Iseraela i to ˈna ahu, ua tono aˈera oia i te vea i te arii ra, na ô aˈera, Eaha oe i hahae ai i to ahu na? Tuu mai ia Naamana i ǒ nei ia ˈu nei, e ite hoi oia e, e peropheta tei Iseraela nei. 9 Ua haere maira Naamana ma te mau puaahorofenua, e ma te pereoo, e ua tiai maira i te uputa fare o Elisaia ra. 10 Ua tono maira Elisaia i te vea ia ˈna, na ô maira, A haere a hopu, e ia hitu hopuraa i Ioridana, e hoˈi faahou mai to oe huru mau, e mâ oe i reira. 11 Riri aˈera râ Naamana, haere atura, e ua na ô aˈera, Inaha, i manaˈo hoi au e, e haere mai oia i rapae au ia ˈu nei, a tia mai ai, a tiaoro atu ai i to ˈna Atua ia Iehova, a rave mai ai i te vahi maˈi ra; e ora ˈtura. 12 E ere anei o Abana e o Pharapara, na pape Damaseko ra, tei hau i te maitai i te mau pape atoa o Iseraela? eita anei e tia ia hopu vau i reira a mâ ˈtu ai? Ua fariu aˈera oia, haere atura ma te riri. 13 Ua faafatata maira râ te hoê tavini no ˈna, na ô maira, E tau paino e, ahiri anei ei parau rahi ta taua peropheta ra i parau mai ia oe, e ore anei oe e rave i te reira? a tae atu ai i tena na parau, A hopu, a mâ ˈtu ai? 14 Ua haere atura oia e ua hopu atura i Ioridana e a hitu aˈera hopuraa, ta te taata no te Atua hoi i parau maira; riro atura to ˈna iˈo mai to te tamarii apî ra, mâ ˈtura oia.
15 Ua hoˈi maira oia e to ˈna atoa ra mau taata i taua taata no te Atua ra, e ua haere ihora, ua tia maira i mua i tana aro: ua na ô maira, Inaha, ua ite atura vau e aore roa e Atua i te ao atoa nei, maori râ i Iseraela nei: e teie nei, teie ta ˈu parau iti ia oe na, e rave mai oe i te tahi taoˈa iti i to tavini nei. 16 Ua parau atura râ oia, Te ora nei Iehova, ta ˈu e tia noa i mua i tana aro, e ore au e rave. Ua mârô maira râ oia e rave; aita aˈera râ i tia ia ˈna. 17 Ua parau maira Naamana, Eita anei e tia ia oe ia ho-mai-hia mai i to tavini nei te tahi maa repo, e teiaha ˈi na asini e piti nei? e ore hoi to tavini e hopoi faahou i te tusia taauahi e te tusia atoa i te mau atua ěê maori râ ia Iehova anaˈe. 18 Teie râ te hoê mea, e faaore mai Iehova i ta to tavini nei hara: ia tae ra tau fatu i roto i te fare o Rimona haamori ai, e ia tiaturi oia i nia i tau rima nei, e ia piˈo hoi au i raro i roto i te fare o Rimona; ia piˈo râ vau i raro i roto i te fare o Rimona ra, e faaore mai Iehova i te hara a to tavini i reira. 19 Ua parau atura oia ia ˈna, A haere ma te ora. E aore aˈera oia i reva rea, 20 i na ô ai Gehazi taua tavini o te taata no te Atua ra o Elisaia, Inaha, ua faaherehere iho nei tau fatu i tera ra taata Arama, ia Naamana, aita aˈenei hoi oia i farii atu i ta ˈna i hopoi maira: te ora nei râ Iehova, e horo na vau ia noaa mai te tahi taoˈa na ˈu. 21 Ua tipapa ˈtura Gehazi ia Naamana. E ia hiˈo mai Naamana ia ˈna te pee maira, ua pou ihora oia mai nia mai i te pereoo e haere e farerei ia ˈna, e ua na ô atura, Te maitai na? 22 Ua na ô maira, Te maitai nei. I tonohia mai au e tau fatu, te na ô maira, Teie mai nei na taata apî no te mau pǐpǐ o te mau peropheta, mai te mouˈa mai mai Epheraima, ho mai na i te taleni ario hoê mai, e na ahu hoi e piti. 23 Ua parau maira Naamana, E rave mai oe i na taleni e piti. Ua mârô maira oia, e ua rave, ua ruuruu ihora i na taleni ario e piti i roto i na pute e piti, e na ahu hoi e piti, ua tuu atura i nia i na tavini o ˈna toopiti; e ua hopoi atura raua na mua ia ˈna. 24 Ia tae râ i te vahi moe, ua rave atura oia, e ua oomo aˈera i roto i te hoê fare; ua tuu atura i na taata ra, reva ˈtura. 25 Ua haere ihora oia i roto, tia noa ihora i mua i tana fatu. Ua na ô maira Elisaia ia ˈna, Mai hea mai oe, e Gehazi? Ua na ô atura oia, Aita to tavini i tae. 26 Ua na ô maira oia ia ˈna, E ere i reira atoa tau aau, a hoˈi mai ai taua taata ra mai nia mai i te pereoo e farerei ia oe ra? e au anei i teie nei ia rave i te ario, e ia rave i te ahu, e te ô olive, e te ô vine, e te mamoe, e te puaatoro, e te tavini tane, e te tavini vahine? 27 Area te lepera o Naamana e piri mai ïa i nia ia oe, e i nia i to oe ra huaai e a muri noa ˈtu. Haere atura oia i rapae mai mua mai i tana aro, ua leperahia mai te hiona ra.