Te mau arii 2

TE HAU MAITAI O UZIA RA, E TE PARAU NO TE HAU O ZEKARIA RA.

15 Tei te matahiti taau ma hitu o te arii o Iseraela o Ieroboama, i arii ai Azaria a Amazia, arii no Iuda ra. 2 Hoê ahuru o ˈna matahiti e ono tiahapa i arii ai oia, e pae ahuru e piti tiahapa o ˈna matahiti i te ariiraa i Ierusalema. O Iekolia te iˈoa o to ˈna metua vahine no Ierusalema. 3 Ua rave oia i te parau tia i te aro o Iehova, mai ta tana metua mai ta Amazia i rave i mutaaihora: 4 aita râ te mau vahi teitei i faaruehia; te hopoi noa ra te taata i te tusia, e te tutui noa ra i te mea noˈanoˈa i nia i te mau vahi teitei.

5 Tairihia ihora taua arii ra e Iehova, riro atura oia ei lepera, e tae noa ˈtura i te poheraa ra, e ua parahi i te tahi parahiraa ê. E te tamaiti o te arii ra o Iotama, tei nia ïa i taua utuafare ra, i te haavaraa i te taata o taua fenua ra. 6 E te toea o te parau a Azaria, e ta ˈna atoa i rave ra, e ere anei ua papaihia i roto i te buka, te parau no te mau mahana o te mau arii o Iuda? 7 Taoto ihora Uzia i ǒ to ˈna ra mau metua, e tanuhia ihora oia i ǒ to ˈna ra mau metua i roto i te oire o Davida; monohia aˈera oia i te hau i te tamaiti ra ia Iotama.

8 Tei te toru ahuru ma vau to te arii o Iuda to Azaria matahiti, i arii ai Zekaria a Ieroboama i nia ia Iseraela i Samaria, e a ono aˈera marama. 9 Ua rave oia i te parau ino i te aro o Iehova, mai ta te mau metua atoa no ˈna ra: aore oia i faarue i te mau hara a Ieroboama a Nebata ra, i hara ˈi Iseraela ra. 10 Ua amui aˈera Saluma a Iabesa i te parau rave ia ˈna, e ua taparahi ihora i mua i te aro o te taata, e pohe atura oia, riro aˈera te hau ia ˈna. 11 E te toea o te parau a Zekaria, inaha, ua papaihia ïa i roto i te buka, te parau no te mau mahana o te mau arii no Iseraela. 12 O te parau teie a Iehova i parau mai ia Iehu, a na ô mai ai ra e, E parahi to mau tamarii i nia i te terono o Iseraela, e ia tae i te maha o te ui ra. Riro atura hoi i reira.

13 Tei te matahiti e toru ahuru ma iva to te arii o Iuda to Uzia, i arii ai Saluma a Iabesa, hoê o ˈna marama i te ariiraa i Samaria. 14 Ua haere ihora hoi Menahema a Gadi i Samaria, mai Tireza ˈtu, ua tairi ihora ia Saluma a Iabesa i Samaria, e pohe atura, riro aˈera hoi te hau ia ˈna iho. 15 E te toea o te parau a Saluma, e te parau amui i ravehia e ana ra, inaha, ua papaihia i roto i te buka, te parau no te mau mahana o te mau arii o Iseraela. 16 Ua rave ihora Menahema ia Tephesa, e pau ihora, e to roto atoa ra, e to reira hoi mau fenua mai Tireza mai; no te mea, aita ratou i iriti i te mau uputa ia ˈna: no reira oia i rave ai; ua rave hoi oia i te mau vahine hapu ua atore.

17 Tei te toru ahuru ma iva to te arii o Iuda to Azaria matahiti, i arii ai Menahema a Gadi, i nia ia Iseraela, hoê ahuru o ˈna matahiti i te ariiraa i Samaria ra. 18 Ua rave oia i te parau ino i te aro o Iehova: aita oia i faarue i te mau hara a Ieroboama a Nebata i hara ˈi Iseraela ra, e mure noa aˈera to ˈna aho. 19 Ua haere maira te arii no Asura o Pula, e rave i taua fenua ra, ua hopoi atura Menahema i na taleni ario hoê tausani na Pula, ia tauturu mai oia ia ˈna, e ia papu te hau i tana rima. 20 Ua titau atura Menahema i taua moni ra i nia ia Iseraela, i te feia taoˈa atoa ra, e pae ahuru i te sekela ario i te taata hoê, e hopoi i te arii o Asura. Hoˈi atura taua arii no Asura ra, aore aˈera i parahi mai i taua fenua ra.

21 E te toea o te parau a Menahema, e ta ˈna atoa i rave ra, e ere anei ua papaihia i roto i te buka, te parau no te mau mahana o te mau arii o Iseraela? 22 Taoto ihora Menahema i ǒ to ˈna ra mau metua; monohia aˈera te hau i te tamaiti ra ia Pekahia.

23 Tae aˈera i te pae o te ahuru o te matahiti o te arii o Iuda ra o Azaria ra, i arii ai Pekahia a Menahema i nia ia Iseraela, i Samaria; e a piti aˈera o ˈna matahiti i te ariiraa. 24 Ua rave oia i te parau ino i te aro o Iehova, aore oia i faarue i te mau hara a Ieroboama a Nebata ra i hara ˈi Iseraela. 25 O Peka râ a Remalia, te hoê raatira na ˈna ra, ua amui aˈera oia i te parau rave ia ˈna ra, oia, e na taata o Gileada e pae ahuru ra, taparahi ihora ia ˈna i Samaria, i roto i te vahi moe o to te arii ra fare, e ia Aragoba raua o Arie atoa ra: pohe roa aˈera oia, riro aˈera te hau ia ˈna iho. 26 E te toea o te parau a Pekahia, e ta ˈna atoa i rave ra, inaha, ua papaihia ïa i roto i te buka, te parau no te mau mahana o te mau arii o Iseraela ra.

27 Tae aˈera i te pae i te ahuru e ma piti o te matahiti o te arii o Iuda ra o Azaria, i arii ai Peka a Remalia i nia ia Iseraela, i Samaria; hoê taau aˈera o ˈna matahiti i te ariiraa. 28 Ua rave oia i te parau ino i te aro o Iehova; aore oia i faarue i te mau hara a Ieroboama a Nebata ra i hara ˈi Iseraela ra. 29 Tei te anotau o te arii o Iseraela o Peka, i tae mai ai te arii o Asura o Tigelata-pilesera, pau ihora Iiona, e o Abela-betemaaka, e o Ianoa, e o Kedesa, e o Hazora, e o Gileada, e o Galilea, e te fenua atoa o Naphatali, e ua hopoi tîtî ia ratou i Asura ra. 30 Ua amui aˈera Hosea a Ela i te parau rave ia Peka a Remalia, e ua tairi atura ia ˈna, e pohe roa aˈera, riro aˈera te hau ia ˈna iho, i te matahiti taau o Iotama a Uzia ra. 31 E te toea o te parau a Peka, e ta ˈna atoa i rave ra, inaha, ua papaihia ïa i roto i te buka, te parau no te mau mahana o te hui arii o Iseraela ra.

32 Tei te piti o te matahiti o te arii o Iseraela o Peka a Remalia, i arii ai Iotama a Uzia, i Iuda. 33 Tei te matahiti taau ma pae oia i arii ai; hoê ahuru ma ono o ˈna matahiti i te ariiraa i Ierusalema. O Ierusa te iˈoa o tana metua vahine, e tamahine na Zadoka. 34 Ua rave oia i te parau tia i te aro o Iehova; ua haapao atura oia i tana metua i ta Uzia i rave ra. 35 Aita râ i faaruehia te mau vahi teitei: te hopoi noa ra te taata i te tusia, e te tutui ra hoi i te mea noˈanoˈa i nia i taua mau vahi teitei ra. Na ˈna hoi i patu i te uputa teitei o te fare o Iehova.

36 E te toea o te parau a Iotama, e ta ˈna atoa i rave ra, e ere anei ua papaihia i roto i te buka, te parau no te mau mahana o te mau arii o Iuda ra? 37 Tei taua anotau ra to Iehova haamataraa i te tono i te arii o Arama ra ia Rezina, e ia Peka a Remalia, ei rave ia Iuda. 38 Taoto ihora Iotama i ǒ to ˈna ra mau metua, e tanuhia iho i ǒ to ˈna ra mau metua i roto i te oire o to ˈna ra tupuna o Davida: monohia aˈera te hau i te tamaiti ra ia Ahaza.