Te mau arii 2
Te mau arii, Buka piti
TE HAU O TE ARII O ISERAELA RA O AHAZIA.
1 E pohe atura Ahaba, ua orure ihora Moabi i te hau ia Iseraela. 2 I mairi na Ahazia i na roto i te haamaramarama i to ˈna piha i nia ra i Samaria, e ua maˈihia. Ua tono aˈera oia i te vea, e ua na ô atura ia ratou, Haere e ui ia Baala-zebuba, i te atua no Ekerona, i te oraraa vau i teie nei maˈi. 3 Ua parau maira te melahi a Iehova ia Elia Tisebi, A tia, a haere e ia farerei atu i te mau vea a te arii o Samaria, e parau atu ai ia ratou, E ere anei no te mea aita e Atua i Iseraela nei, i haere ai outou a ui ai i te atua no Ekerona ia Baala-zebuba? 4 E teie nei, te na ô maira Iehova, E ore oe e pou mai i raro i tena na roi ta oe e taoto na, e pohe mau râ oe. Haere atura Elia.
5 Ua hoˈi anaˈe maira na vea ia ˈna ra, ua ui atura oia ia ratou, Eaha hoi outou i hoˈi mai ai? 6 Ua parau maira ratou ia ˈna, Te tahi taata tei farerei mai ia matou, e ua na ô mai ia matou, A hoˈi, e parau atu i te arii i tono mai ia outou na, a na ô atu ai ia ˈna, Te na ô maira Iehova, E ere anei no te mea aita e Atua i Iseraela nei i tono ai oe i te vea e ui i te atua o Ekerona ia Baala-zebuba? E tena na, e ore oe e pou mai i raro i tena na roi ta oe e taoto na, e pohe mau râ oe. 7 Ua ui atura oia, Eaha te huru o taua taata i haere mai e farerei ia outou na, tei parau mai hoi ia outou i taua parau na? 8 Ua parau maira ratou ia ˈna, E ahu huruhuru to ˈna, e ua tatuahia to ˈna tauupu i te taura iri puaa. Ua na ô maira, O Elia Tisebi. 9 Ua tono aˈera te arii i te hoê raatira pae ahuru, e to ˈna pǔpǔ, e pae ahuru ra. Ua haere atura oia ia ˈna ra: e inaha, te parahi ra oia i nia i te mouˈa. Ua parau atura oia ia ˈna, E te taata no te Atua e, te na ô maira te arii, E pou mai na oe i raro. 10 Ua parau maira Elia i taua raatira pae ahuru ra, E taata vau no te Atua ra, e riro i te mairi mai te auahi no nia i te raˈi, pau ihora oe e to mau taata e pae ahuru ra. Ua mairi maira te auahi no te raˈi mai, pau ihora oia, e na taata atoa no ˈna e pae ahuru ra. 11 Ua tono faahou atura te arii i te tahi raatira pae ahuru, e to ˈna pǔpǔ e pae ahuru ra. Ua parau atura oia ia ˈna, E te taata o te Atua na, te na ô maira te arii, E pou etaeta mai oe i raro nei. 12 Ua na ô maira Elia ia ˈna, E taata vau no te Atua ra, e riro i te mairi mai te auahi no te raˈi mai, pau ihora oe e to mau taata e pae ahuru ra. Ua mairi maira te auahi no ǒ i te Atua ra no te raˈi mai, pau ihora oia e na taata atoa no ˈna e pae ahuru ra.
13 Ua tono atura te arii i te toru o te raatira pae ahuru, e to ˈna pǔpǔ e pae atoa ahuru. Ua haere atura te toru o te raatira pae ahuru ra i nia, ua haere hoi, ua tuu i te turi i raro i mua ia Elia ra, ua taparu atura, e ua na ô atura ia ˈna, E te taata no te Atua ra, teie ta ˈu parau ia oe, ia ora vau, e teie nei pue taata e pae ahuru, to mau tavini nei, ia ora atoa ia oe. 14 Inaha, ua mairi mai hoi te auahi no te raˈi mai, e pau ihora na raatira pae ahuru matamua e piti, e to raua tau pǔpǔ e pae atoa ahuru ra: e teie nei, ia ora vau ia oe. 15 Ua parau maira te melahi a Iehova ia Elia, A haere atoa i raro: eiaha e mǎtaˈu ia ˈna. Ua tia aˈera oia i nia, haere atura raua atoa i raro i te arii ra. 16 Ua parau atura oia ia ˈna, Te parau maira Iehova, No te mea, ua tono oe i te vea e ui i te atua no Ekerona ia Baala-zebuba, e ere anei no te mea aita e Atua i Iseraela nei, ei uiraa na oe? e tena na, e ore oe e pou mai i tena na roi ta oe e taoto na, e pohe mau râ oe.
17 Pohe ihora hoi oia, ta Iehova hoi i parau maira i te vaha o Elia ra. E no te mea aita o ˈna tamaiti, riro aˈera te hau ia Iehorama ra, i te piti o te matahiti o Iehorama a Iehosaphata arii no Iuda; 18 e te toea o te parau ia Ahazia ra, e te mau mea ta ˈna i rave ra, e ere anei ua papaihia i roto i te buka, te parau no te mau mahana o te hui arii o Iseraela ra?