Te mau arii 1
HIRAMA I TIPAPAHIA, E NA ˈNA I HAMANI I NA POU VEO E PITI RA.
7 Area i te faatiaraa Solomona i to ˈna iho fare, hoê ïa ahuru i te matahiti e toru tiahapa. E oti roa aˈera taua fare no ˈna ra.
2 Ua faatia aˈera i te fare no te uru raau i Lebanona ra. Hoê hanere kubiti i te maoro, e pae hoi ahuru kubiti i te aano, e toru ahuru i te teitei, i tuuhia i nia iho i na pou arezi e maha nanai, e na teˈa arezi i nia iho i taua mau pou ra. 3 E i tapoˈihia i nia iho i te arezi i nia i taua mau teˈa i tuuhia i nia iho i na pou e maha ahuru ma pae ra, hoê ahuru ma pae i te nanai hoê. 4 E toru hoi nanai haamaramarama, e taua nanai e toru ra, ua tiraha maite te tahi haamaramarama i te tahi. 5 E te mau uputa e te mau pou, i tarai orapahia ïa i taua mau haamaramarama ra; e ua tiraha maite te tahi haamaramarama i te tahi e toru atoa nanai.
6 Ua hamani ihora oia i te poretiko i te mau pou ra: e pae ahuru te kubiti i te maoro, e toru ahuru i te aano: tei mua te poretiko i taua na pou ra, e te mau pou, e te pǎpǎ meumeu tei mua ïa.
7 Mai reira hoi ua hamani ihora oia i te tahi poretiko no te terono ei reira oia haava ai i te taata, oia i parauhia ˈi, e poretiko haavaraa: e ua tapoˈihia i te arezi mai te tahi pae tahua e tae roa aˈera i te tahi pae.
8 E to ˈna iho parahiraa e parahi ai oia ra, e piha ïa tei muri mai i taua poretiko ra, hoê â huru ohipa, Ua hamani ihora hoi Solomona i te tahi fare no te tamahine a Pharao i taotohia e ana ra, hoê â hete e taua poretiko nei. 9 E ofai maitatai anaˈe taua mau fare nei, i taraihia, e faitohia, e ua ootihia i te ee, to roto e to rapae au, mai te niu mai e tae noa ˈtu i nia roa e i to rapae au atoa e tae noa ˈtu i te aumoa rahi ra. 10 E ofai maitatai hoi tei taua niu ra, e te rarahi, hoê ahuru kubiti i te ofai hoê, e vau kubiti i te hoê ofai. 11 E i nia ˈˈe i te reira, e ofai maitatai ïa, e e ofai taraihia, e te faitohia, e te arezi. 12 E te aumoa rahi i rapae au aˈe, e toru ïa nanai ofai tarai, hoê nanai teˈa arezi, no te aumoa i roto i taua fare o Iehova ra, e no te poretiko o taua fare ra.
13 Ua tono aˈera te arii ra o Solomona, ua aratai maira ia Hirama mai Turia mai. 14 E tamaiti na te hoê vahine ivi, no te opu o Naphatali, no Turia ra te metua tane, o tei ite ïa i te rave i te veo; ua î roa oia i te paari, e te ite, e te rave i te mau ohipa veo atoa ra. E ua haere maira oia i taua arii ra ia Solomona, e ua rave ihora i te mau ohipa na ˈna. 15 Ua faatô ihora oia i na pou veo e piti, hoê ahuru ma vau kubiti te teitei o te pou hoê: hoê ahuru e piti tiahapa i te kubiti te taura e ati ai te pou hoê ra. 16 Ua hamani ihora hoi oia i e piti tapoˈi veo faatôhia ra, e tuu i nia iho i taua na pou ra, e pae kubiti te teitei o te hoê tapoˈi, e pae kubiti i te hoê tapoˈi: 17 ua hamani ihora hoi oia i te upeˈa tore e te hei fifi, no taua na tapoˈi ra, i tei tuuhia i nia iho i na pou ra; e hitu o te hoê tapoˈi, e hitu hoi no te hoê tapoˈi. 18 Ua hamani ihora hoi oia i na pou, ma te nanai remuna e piti atoa ra e ati noa ˈˈe na nia iho i te ohipa upeˈa no na tapoˈi ra, ia vai maite ïa i nia i te auru o te pou ra; e ua na reira atoa hoi i te piti o te tapoˈi ra. 19 E na tapoˈi i nia iho i na pou ra, e maha ïa kubiti susena i roto i te poretiko i nia iho. 20 E i nia ˈˈe i te reira, i te vahi i hopue ai, i pihaii hoi te upeˈa i nia i te tapoˈi i vai i nia iho i na pou e piti ra, e pue nanai remuna ïa, e piti hanere i nia i te hoê tapoˈi, e piti hanere i nia i te hoê tapoˈi. 21 Ua faatia aˈera oia i na pou i roto i te poretiko o te hiero ra; ua faatia aˈera i te pou i te pae atau, mairi ihora i to ˈna iˈoa ia Iakina, ua faatia aˈera i te pou i te pae aui, mairi ihora i to ˈna iˈoa ia Boaza. 22 Ua tuu aˈera oia i te ohipa susena i nia iho i taua na pou ra: oti roa aˈera te ohipa pou ra.
23 Ua hamani ihora oia i te hoê farii-vai rahi faatô, te tahi hiti e tae noa ˈtu i te tahi hiti, hoê ahuru ïa kubiti: e mea porotaa maitai; e pae kubiti i te teitei; e toru ahuru i te kubiti i te taura e ati ai. 24 E i raro aˈe i taua hiti ra, e ponaraa ïa, hoê ahuru i te kubiti hoê; i te haaatiraa i taua farii-vai rahi ra; e piti nanai i taua pona ra, hoê â faatôraahia a faatôhia ˈi te farii-vai ra. 25 I nia na puaatoro oni hoê ahuru ma piti i te vaiihoraahia, o e toru ra i hiˈo mai ïa i te pae i apatoerau, o e toru hoi i hiˈo atu ïa i te pae i apatoa ra, o e toru hoi i hiˈo aˈe ïa i te pae i te tooa o te râ ra, e o e toru ra hoi e hiˈo aˈe ïa i te pae i te hitia o te râ ra: i te tuuraahia taua farii-vai rahi i nia ihora tei roto anaˈe na tohe o taua na puaa ra. 26 E taua farii-vai ra, hoê ïa rima i te meumeu, e te hiti ra mai te hiti auˈa ra ïa te huru i te hamaniraahia, ma te tiare susena ra. E piti tausani bato e î ai.
27 Ua hamani atoa hoi oia i na vairaa hoê ahuru, e veo; e maha kubiti te maoro i te vairaa hoê, e maha hoi kubiti i te aano, e toru kubiti te teitei. 28 Teie te huru o te ohipa i taua na vairaa ra; te vai ra na teˈa, o taua na teˈa ra tei ropu ïa i na hiti ra: 29 e taua na teˈa i ropu i na hiti ra, e liona ïa, e te puaatoro oni, e te kerubi: o tei nia i taua na hiti ra, i nia ˈˈe e i raro aˈe hoi i taua na liona e na puaatoro oni ra, e pue vahi tiaati maitai-roa-hia ïa. 30 E maha pereoo veo to te vairaa hoê, e na veo no roto ra. E tei na hiti e maha ra, o na tapono ïa, e tapono faatôhia i raro aˈe i te farii-vai ra, i te hiti o na tiaatiraa ra. 31 E te vaha ra tei roto ïa i te tapoˈi, hoê kubiti i te teitei; area te vaha i rapae au aˈe, hoê ïa kubiti, e kubiti vaehaa te piti, e mea porotaa, ua au i te ohipa o te vairaa ra: e i pihaiiho i te vaha ra ua otiotihia ïa, e maha aroâ, e ere i te mea porotaa, e to reira hoi mau teˈa. 32 E o raro aˈe i taua mau teˈa ra, o na pereoo e maha ïa; e ua haamauhia na veo ohuraa i roto i taua vairaa ra: e te teitei o taua pereoo ra, hoê ïa kubiti e kubiti vaehaa te piti. 33 E te ohipa i taua na pereoo ra mai te ohipa pereoo-tamaˈi ra te huru: o na veo ohuraa, e na oomoraa, e na hiti i rapae au aˈe; e te mau teˈa, e mea faatô-anaˈe-hia ïa. 34 E maha hoi tapono tei na hiti e maha i taua vairaa ra: e taua na tapono ra, no te vairaa mau iho ïa. 35 E to nia iho i taua vairaa ra, ua haaatihia ïa vahi, hoê afa kubiti te teitei, e tei nia mau iho i taua vairaa ra te mau amaa e te mau teˈa i te vairaa. 36 E tei nia te mau iri veo, i nia iho i te mau amaa ra, e i nia atoa i te hiti, ua ooti ihora oia i te kerubi, e te liona, e te tamara, i te vahi atea ra, e te mau tiaatiraa atoa e ati noa ˈˈera. 37 I na reira oia i te hamani i na vairaa hoê ahuru ra: hoê â faatôraa, hoê â faitoraa, hoê â huru.
38 Ua hamani ihora oia i na farii-vai hoê ahuru, e veo: e maha ahuru i te bato i te farii-vai hoê; e maha kubiti i te aano i te farii-vai hoê: tei nia iho te farii-vai hoê i na vairaa hoê ahuru e ati noa ˈˈe. 39 Ua tuu aˈera i na vairaa e pae ra i te hiti atau o te fare ra, ua tuu aˈera hoi i e pae i te hiti aui i taua fare ra: ua tuu aˈera i te farii-vai rahi i te hiti atau o taua fare ra i te pae o te hitia o te râ, e hiˈo tia ˈtu ai i te pae i apatoa ra.
40 Ua hamani atoa hoi Hirama i te mau farii-vai atoa, e te mau taipu, e te mau besini. Oti roa aˈera ia Hirama te mau ohipa atoa ta ˈna i rave na te arii ra na Solomona, no te fare o Iehova: 41 na pou ra e piti, e na auˈa no nia i na tapoˈi, e vai i nia i na pou e piti ra: e na upeˈa e piti, ei tapoˈi i na auˈa i vai i nia i na pou ra: 42 e maha hoi hanere i te remuna no na upeˈa e piti ra, e piti nanai remuna no te upeˈa hoê, ei tapoˈi i na auˈa no nia i te pou ra; 43 e na vairaa hoê ahuru ra, e na farii-vai hoê ahuru e vai i nia i taua na vairaa ra: 44 hoê hoi farii-vai rahi, e na puaatoro oni hoê ahuru ma piti i raro aˈe i taua farii-vai rahi ra; 45 e te mau pani, e te mau taipu, a te mau besini ra, taua mau mea atoa nei ta Hirama i hamani na taua arii ra na Solomona, no te fare o Iehova, e veo anaana anaˈe ïa. 46 Tei te vahi papu i Ioridana te faatôraahia e taua arii ra; i te vahi araea i te area i Sukota e Zaretana. 47 E vaiiho-noa-hia ihora taua mau mea atoa ra aore i faitohia; no te mea, aita ˈtura i itea te rahi o taua veo ra.
48 Hamani ihora hoi Solomona i taua mau mea atoa no te fare o Iehova ra: te fata auro ra, e te airaa-maa auro, i vaiihohia ˈi te maa o te aro ra. 49 E na vairaa-lamepa auro maitai ra ei te hiti atau e pae, ei te hiti aui e pae, i mua i te nao ra, e na tiare, e na lamepa, e na faahohoni auro; 50 na auˈa ra, e na paoti ra, e na besini ra, e na punu, e na farii-rehu auro maitai ra; e na hinere auro; no na uputa i te fare i roto, i te vahi moˈa roa ra, e no na uputa o te fare, oia hoi te hiero ra. 51 E hope aˈera te mau ohipa atoa no te fare o Iehova i ravehia e te arii ra e Solomona i te oti. Ua hopoi maira Solomona i te mau mea atoa i pûpûhia e ta ˈna metua e Davida; te ario, e te auro, e te mau auˈa, ua tuu aˈera i roto i te pueraa taoˈa no te fare o Iehova.