Te mau arii 1
TE HAU INO O ABIIAMA, E TE HAU MAITAI O ASA RA.
15 E tae aˈera i te ahuru ma vau o te matahiti i te hau o Ieroboama a Nebata, i riro ai Abiiama ei arii no Iuda. 2 E toru o ˈna matahiti i te ariiraa i Ierusalema. O Maaka te iˈoa o to ˈna metua vahine, e tamahine na Abisaloma. 3 Haapao atura oia i te mau hara atoa a tana metua, i tei ravehia e ana ra; aita hoi tana aau i au i to ˈna Atua ia Iehova ra, mai te aau o tana tupuna o Davida. 4 No Davida râ, ua horoa maira to ˈna Atua o Iehova i te tahi mori na ˈna i Ierusalema, e ia faateiteihia ta ˈna tamaiti i muri aˈe ia ˈna, ia mau te haapaoraa i Ierusalema: 5 no te mea, ua haapao Davida i te mea tia i te aro o Iehova, e aore i fariu ê i te mau parau atoa ta ˈna i parau mai ia ˈna ra e hope roa aˈera o ˈna pue mahana i te ao nei, maori râ i te parau ia Uria ati Heta ra. 6 E tamaˈi a ta Abiiama a Rehoboama e Ieroboama, e hope roa aˈera o ˈna pue mahana. 7 E te toea o te parau a Abiiama, e te mau mea atoa i ravehia e ana, e ere anei ua papaihia ïa i roto i te buka, te parau no te mau mahana o te hui arii o Iuda ra? E tamaˈi hoi ta Abiiama raua o Ieroboama. 8 Taoto ihora Abiiama i ǒ tana mau metua atoa ra; ua tanu ihora ratou ia ˈna i te oire o Davida; monohia aˈera oia i te hau i te tamaiti ra ia Asa.
9 E tae aˈera i te matahiti taau o te arii o Iseraela o Ieroboama, i riro ai Asa ei arii no Iuda. 10 A piti taau aˈera o ˈna matahiti hoê tiahapa i te ariiraa i Ierusalema. O Maaka te iˈoa o tana metua vahine, e tamahine na Abisaloma. 11 E parau tia ta Asa i te aro o Iehova, mai ta tana metua atoa ra mai ta Davida. 12 Hopoi ê atura oia i te mau pâiˈa i taua fenua ra, e ua faarue atura i te mau idolo i hamanihia e to ˈna ra mau metua. 13 E tana metua vahine, o Maaka, ua faaere oia ia ˈna i te hau, no te mea ua hamani oia i te tahi idolo faufau i roto i te vahi uru raau; faaorehia aˈera taua idolo e Asa ra, tuˈia ihora i te auahi i te pape ra ia Kiderona. 14 Aita râ i hope taua mau vahi teitei ra i te hopoi-ê-hia; ua tia râ to Asa ra aau ia Iehova e hope roa aˈera o ˈna pue mahana. 15 E ua hopoi maira oia i te mau taoˈa haamoˈahia e tana metua ra, e te mau taoˈa atoa i haamoˈahia e ana iho, te ario e te auro e te mau auˈa ra, i roto i te fare o Iehova.
16 E tamaˈi â ta Asa raua o Baasa, te arii o Iseraela, e hope roa aˈera to raua pue mahana. 17 Haere atura hoi te arii o Iseraela o Baasa e rave ia Iuda, e ua faaetaeta ihora ia Rama, ia ore te hoê taata ia tae noa ˈtu i te arii o Iuda ia Asa ra. 18 Ua rave ihora Asa i te ario e te auro i toe i te mau taoˈa i te fare o Iehova, e te mau taoˈa i te fare o te arii ra, e ua tuu atura i te rima o te mau tavini; ua hapono atura taua arii ra o Asa ia Benehada a Taberimona a Heziona ra, i te arii o Arama i parahi i Damaseko ra, na ô atura, 19 E faaau na tâua i te tahi faufaa na tâua, mai ta tau metua e to oe ra metua; inaha, te hapono atu nei au i te taoˈa na oe, i te ario e te auro; e tii mai oe e haamairi i te faufaa na oe i te arii o Iseraela ia Baasa ra, ia haere ê oia ra. 20 Ua faaroo maira Benehada i tana arii ra ia Asa, e ua faaue aˈera oia i te mau raatira o te nuu na ˈna ra e rave i te mau oire i Iseraela e pau ihora Iiona, e o a Dana, e Abela-bete-maaka, e Kinerota atoa, e taua fenua atoa ra o Naphatali. 21 E ite aˈera Baasa i te reira, ore aˈera e faaetaeta ia Rama, parahi ihora i Tireza. 22 Ua faaite aˈera taua arii ra o Asa i ta ˈna parau ia Iuda atoa ra; aore te hoê i vaiiho-hia: ua rave aˈera ratou i te mau ofai o Rama, e te raau, i patuhia e Baasa; ua rave ihora te arii o Asa i te reira, e ua patu ihora i Geba i ô Beniamina, e Mizepe. 23 Te toea o to mau ohipa atoa a Asa ra, e to ˈna puai, e te mau mea atoa i ravehia e ana, e te mau oire i faatiahia e ana ra, e ere anei ua oti ïa i te papaihia i roto i te buka, te parau no te mau mahana o te hui arii o Iuda ra? E tae aˈera i to ˈna ruhiruhiaraa ra, maˈihia ihora tana avae. 24 Taoto ihora oia i ǒ tana mau metua atoa, e tanuhia ihora i ǒ to ˈna ra mau metua i te oire o Davida; monohia aˈera oia i te hau i te tamaiti ia Iehosaphata.
25 E tae aˈera i te piti o te matahiti o Asa arii no Iuda ra, i arii ai Nadaba a Ieroboama i nia ia Iseraela, e a piti aˈera o ˈna matahiti i te ariiraa ia Iseraela. 26 Ua rave ihora oia i te ino i te aro o Iehova, haapao atura i te parau a tana metua, e ta ˈna hara i hara ˈi Iseraela ia ˈna. 27 E o Baasa a Ahia, no te utuafare o Isakara, ua orure aˈera i to ˈna hau; pohe ihora oia ia Baasa i Gibetuna no te Philiseti; ua ati hoi Gibetuna ia Nadaba, e ia Iseraela atoa ra. 28 Tei te toru o to Asa arii no Iuda matahiti i pohe ai oia ia Baasa, e riro aˈera te hau ia ˈna iho. 29 E riro aˈera oia ei arii, pau ihora ia ˈna te utuafare atoa o Ieroboama; aore roa a Ieroboama i faatoehia i te ao nei; mai te parau hoi a Iehova i parauhia mai e ana i te vaha o tana tavini e Ahia Silo ra: 30 no te hara a Ieroboama i ravehia e ana, e ta Iseraela i rave i te parau na ˈna ra: i te faaririraa i te Atua o Iseraela ia Iehova. 31 E te toea o te parau ia Nadaba, e ta ˈna atoa i rave ra, e ere anei ua papaihia ïa i roto i te buka, te parau no te mau mahana o te hui arii o Iseraela? 32 E tamaˈi â ta Asa raua o Baasa arii o Iseraela, e hope roa aˈera to raua pue mahana.
33 Tei te toru o to Asa arii no Iuda matahiti, i mahere ai Baasa a Ahia ei arii no Iseraela atoa i Tireza; hoê taau aˈera o ˈna Matahiti e maha tiahapa i te ariiraa. 34 Ua rave oia i to ino i te aro o Iehova, haapao atura i te parau a Ieroboama, e ta ˈna atoa mau hara i hara ˈi Iseraela ia ˈna.