Te mau arii 1

TE APOORAA A TE ATI ISERAELA I SEKEMA, E FAAARII IA REHOBOAMA.

12 Reva ˈtura Rehoboama i Sekema, ua hope roa hoi to Iseraela i te tae mai i Sekema e faaarii ia ˈna. 2 E ite aˈera Ieroboama a Nebata, i te parahiraa i Aiphiti ra, (i horo hoi oia i reira i te aro o taua arii ra o Solomona, e ua parahi atura Ieroboama i Aiphiti ra;) 3 ua tono aˈera ratou e tii ia ˈna. Ua haere maira Ieroboama e to Iseraela atoa, ua parau atura ia Rehoboama na ô atura, 4 Ua teiaha roa matou i te zugo a to metua: e tena na, e haamâmâ na oe i te peu a to metua, e te zugo teiaha ta ˈna i tuu mai i nia ia matou nei, a faaroo ˈtu ai matou ia oe. 5 Ua parau maira oia ia ratou, E haere na outou e ia rui toru ra, a hoˈi faahou mai ai ia ˈu nei. Reva ˈtura taua mau taata ra.

6 Ua ui aˈera te arii ra o Rehoboama i te mau taata paari e tia i mua i tana metua ia Solomona i te oraraa ra, ua na ô aˈera, E nahea ra vau ia parau atu i teie nei feia? 7 Ua parau maira ratou, na ô maira, Ia auraro oe i teie nei mau taata i teie nei mahana, e ia tuu atu i te parau ia ratou, e ia paraparau atu oe ia ratou, e ei parau maitai ta oe ia ratou, e riro ïa ratou i te auraro maite ia oe e a muri noa ˈtu. 8 Aore aˈera râ oia i haapao i te parau a taua feia paari i parau mai ia ˈna ra, e ua ui atura i te taata apî hoê â paari-atoa-raa e oia iho, e tia hoi i pihaiiho ia ˈna: 9 ua parau atura oia ia ratou, Eaha ta outou parau, ia parau atu tatou i teie nei feia, o tei parau mai ia ˈu ra e, A haamâmâ na oe i te zugo a to metua i tuu mai i nia ia matou nei? 10 Ua parau maira taua mau taata apî ra hoê â paari-atoa-raa e oia iho, na ô maira, E na ô atu oe i taua mau taata i parau mai ia oe ra, o tei na ô maira e, Ua faateimaha mai to metua i to matou zugo, e rave râ oe e haamâmâ; e parau ˈtu oe ia ratou, E rahi tau rima iti nei i te tauupu o tau metua. 11 E teie nei, ua faateimaha tau metua i te zugo i nia ia outou, ei ia ˈu te faarahi i taua zugo no outou na; i papai tau metua ia outou i te papai mau, e papai râ vau ia outou i te okerebe.

12 E tae aˈera i te rui toru, ua haere maira Ieroboama e te taata atoa ia Rehoboama ra, i ta te arii hoi i parau maira, a na ô mai ai ra e, E haere faahou mai ia tae i te toru o te mahana. 13 Ua parau iria ˈtura taua arii i te mau taata ra, aore aˈera i haapao i te aˈo ta te feia tahito i tuu mai ia ˈna ra; 14 i parau atura râ oia i ta te mau taata apî i aˈo mai, na ô atura, Ua faateiaha tau metua i te zugo i nia ia outou, e rahi râ ia ˈu; i papai tau metua ia outou i te papai mau, e papai râ vau ia outou i te okerebe. 15 Aore aˈera taua arii ra i faaroo i taua mau taata ra; te faariro nei Iehova i taua mea nei, ia tupu ta ˈna parau, ta Iehova i parau ia Ahia Silo ra, ia Ieroboama a Nebata ra.

16 E ia hiˈo aˈera to Iseraela atoa e aore taua arii ra i faaroo ia ratou, ua parau maira taua feia ra i te arii, na ô maira, Eaha ta matou faufaa ia Davida nei? aore ta matou e tufaa i te tamaiti a Iese nei; ei to outou utuafare, e Iseraela e; e teie nei e rohi i to utuafare, e Davida. Haere anaˈe atura Iseraela i to ratou utuafare. 17 Area te tamarii o Iseraela i parahi i te mau oire i Iuda ra, mahere atura te hau ia Rehoboama. 18 Ua tono aˈera taua arii ra o Rehoboama ia Adorama, no nia te taoˈa aufau ra; tui ihora to Iseraela ia ˈna i te ofai, pohe roa aˈera, ua faaitoito ihora taua arii ra o Rehoboama i te haere i nia i te pereoo, e horo i Ierusalema. 19 Orure ihora Iseraela i te hau i te utuafare o Davida, e tae roa aˈenei i teie nei mahana. 20 Ite aˈera hoi to Iseraela atoa e, ua hoˈi mai Ieroboama, ua tono aˈera i te vea e tii ia ˈna e haere mai i taua apooraa ra, e ua faaarii ia ˈna i nia ia Iseraela atoa: aore roa e taata i pee i te utuafare o Davida, maori râ te opu o Iuda anaˈe ra.

21 E tae aˈera Rehoboama i Ierusalema, ua haaputu maira oia i te utuafare atoa o Iuda, e te opu o Beniamina, hoê hanere e vau ahuru i te tausani i te taata i maitihia, e aro tamaˈi anaˈe ïa, ei aro i te utuafare o Iseraela, e faahoˈi mai i te hau ia Rehoboama a Solomona ra. 22 Ua tae maira râ te parau a te Atua i te taata no te Atua ra ia Semaia, na ô maira, 23 E parau atu i te arii o Iuda ia Rehoboama a Solomona ra, e te utuafare atoa o Iuda raua o Beniamina ra, e te toea o te taata o te mau opu atoa ra, e na ô atu, 24 Te parau maira Iehova, Eiaha outou e tae, eiaha e aro i to outou mau taeae, i te tamarii a Iseraela: e hoˈi te taata atoa i te utuafare; na ˈu hoi taua parau nei. Ua faaroo aˈera ratou i taua parau a Iehova ra; e ua hoˈi ratou, ua haere i te utuafare, ta Iehova hoi i parau maira.

25 Ua faatia aˈera Ieroboama i te oire ra ia Sekema, i te mouˈa ra o Epheraima, e ua parahi hoi i reira; e ua haere atura oia ua faatia aˈera ia Peniala. 26 Te ua ô noa ra Ieroboama i roto i to ˈna ihora aau, Ei teie nei e hoˈi ai te basileia i te utuafare o Davida: 27 ia tae teie nei mau taata i Ierusalema, e ia hopoi i te tusia i te fare o Iehova i reira, e riro i te hoˈi faahou te aau o teie nei feia i te fatu mau ra ia Rehoboama, i te arii o Iuda ra, ua taparahi ihora ratou ia ˈu, a hoˈi faahou atu ai i te arii o Iuda ia Rehoboama ra. 28 Ua faaau ihora te arii i te parau, e ua hamani ihora i na kafa auro e piti, e ua na ô atura i to Iseraela, Ohipa rahi ta outou i te haere-noa-raa i Ierusalema: inaha to atua, e Iseraela e, o tei aratai mai ia oe mai te fenua maira mai Aiphiti. 29 Ua tuu ihora oia i te hoê i Betela, e ua vaiiho ihora i te hoê i Dana. 30 Riro atura taua mea ra ei hara: haere anaˈe atura te mau taata e haamori i te hoê i ǒ i Dana roa ra. 31 Ua hamani ihora oia i te fare moˈa i te vahi teitei; e ua faariro atoa i te taata rii ei tahuˈa, e ere i to te mau tamarii a Levi ra. 32 Ua haapao atura Ieroboama i te oroa, i te vau o te marama, i te mahana hoê ahuru e ma pae, mai te oroa i haapaohia i Iuda ra: e ua hopoi oia i te tusia i nia i te fata ra. Na reira atoa oia i Betela ra, i te hopoiraa i te tusia na na kafa i hamanihia e ana ra; e ua haaparahi oia i te feia tahuˈa i Betela no te mau vahi teitei ta ˈna i hamani ra. 33 Ua hopoi oia i te tusia i nia i te fata i faatiahia e ana i Betela ra, i te mahana hoê ahuru ma pae i te vau o te marama, tei imihia e to ˈna iho aau; e ua haapao oia i te oroa na te tamarii a Iseraela: e ua hopoi oia i te tusia i nia i te fata, e ua tutui i te mea noˈanoˈa.