Samuela 2
TE OPUA RA DAVIDA E FAATIA I TE FARE NO TE ATUA, E UA TIA TAUA OPUA RA.
7 E papu atura to te arii ra parahiraa i to ˈna ra fare, e ua horoa mai Iehova i te hau no ˈna i to ˈna ra mau enemi e ati noa ˈˈe, 2 ua parau atura te arii i te peropheta ra ia Natana, A hiˈo na, te parahi nei au i roto i te fare arezi, area te afata o te Atua te parahi nei ïa i roto i te paruru. 3 Ua parau atura Natana i te arii, E haere, e rave i ta oe e manaˈo na; tei ia oe hoi Iehova.
4 Ua tae maira râ te parau a Iehova i taua rui ra ia Natana, na ô maira, 5 A haere, a parau atu i tau tavini ra ia Davida, Te parau maira Iehova, E faatia mai â oe i te hoê fare no ˈu ei parahiraa? 6 Aita hoi au i parahi i te fare mai ia ˈu â i aratai mai i te tamarii a Iseraela mai Aiphiti mai â, e tae roa aˈenei i teie nei mahana, i hahaere noa na vau na roto i te puhapa e na roto i te sekene. 7 I roto atoa i taua mau mea atoa ra, ta ˈu i hahaere noa, e te tamarii atoa o Iseraela, i parau anei hoi au i te mau haava ia Iseraela ta ˈu i parau atu e tiai i to ˈu mau taata ra ia Iseraela, i na ô atu anei hoi au e, Eaha outou i ore i faatia ˈi i te tahi fare arezi na ˈu? 8 E teie nei, e parau hua ˈtu oe i tau tavini ia Davida, Te na ô maira te Atua sabaota o Iehova, I rave mai au ia oe mai te fare mamoe mai â, mai te pee haerea i te mau mamoe, ei tavana no nia iho i to ˈu nei mau taata ia Iseraela: 9 e ei pihai-atoa-iho vau ia oe i to oe atoa ra mau haerea, e ua tâpû-ê-hia e au to mau enemi atoa. E na ˈu hoi e faariro i to oe ra iˈoa ia rahi, mai te iˈoa atoa o te feia rarahi i te ao nei. 10 E haapao hoi au i te hoê vahi no to ˈu ra mau taata no Iseraela, e na ˈu ratou e tanu i reira, e vai mau atu â ratou i to ratou ra vahi mau, e eiaha roa ia hauti faahou; eiaha hoi te taata hauti ia hauti faahou atu ia ratou, mai tei a mutaaihora; 11 mai ia ˈu â i tuu i te mau haava i nia iho i to ˈu ra mau taata ia Iseraela. E horoa hoi au ia oe ra ia parahi noa oe, i to oe ra mau enemi. Te faaite atu nei hoi Iehova ia oe e na ˈna e patu i to fare na.
12 Ia hope roa hoi to oe ra pue mahana, e ia taoto atoa oe i to oe ra pue metua, e faatia ˈi au i to oe ra huaai i muri aˈe ia oe ra, no to oe iho na opu, e na ˈu e haamau i to ˈna ra hau. 13 Na ˈna e faatia i te hoê fare no to ˈu nei iˈoa, e na ˈu e haamau i to ˈna terono i to ˈna ra basileia e a muri noa ˈtu. 14 Ei metua vau no ˈna, e ei tamaiti oia no ˈu. Ia rave oia i te hara ra, na ˈu oia e aˈo atu i te papai taata nei, mai tei tairihia te tamarii a te taata nei: 15 area to ˈu nei aroha, e ore roa ïa vau e iriti ê atu i te reira ia ˈna, mai ia ˈu i na reira ia Saula i ta ˈu i tuu ê atu i mua ia oe ra. 16 E to oe na fare e to oe ra basileia, e mau ïa i mua ia oe ra: to oe ra terono, e mau ïa e a muri noa ˈtu. 17 Haapao atura Natana i teie nei mau parau, e teie nei orama, i te parauraa ˈtu ia Davida.
18 Ua haere ihora taua arii ra o Davida i roto i te sekene, ua parahi ihora i mua ia Iehova, na ô aˈera, O vai au nei, e te Fatu, e Iehova! eaha hoi to ˈu nei utuafare i aratai mai ai oe ia ˈu e tae roa aˈenei i teie nei mahana? 19 E no te mea, e iti â te reira ia oe, e tau Atua, e Iehova, ua parau mai â oe i te fare o to tavini e a muri noa ˈtu. O ta te taata nei anei ïa peu, e tau Atua, e Iehova? 20 E nahea ˈtu hoi Davida ia oe ra? ua ite hoi oe, e tau Fatu, e Iehova, i to tavini nei. 21 No ta oe ra parau e no to oe ra aau i na reira ai oe i te rave i teie nei mau parau rarahi, i ta oe hoi i faaite mai i to tavini nei. 22 E teie nei, e rahi oe, e tau Atua, e Iehova: aita hoi o oe e faito, aita ˈtu hoi Atua o oe anaˈe ra; mai ta matou hoi i faaroo noa i to matou iho nei tariˈa. 23 O vai hoi ïa fenua i te ao nei e au i to oe na mau taata ia Iseraela nei, ta te Atua i tii hoo ei taata no ˈna iho, e ei faarahi i to ˈna ra iˈoa, ei rave hoi i te mau peu rarahi e te mataˈutaˈu, no to oe ra fenua, na mua i to mau taata, i tei hoohia e oe na no oe iho, mai Aiphiti maira, i te mau fenua e i to ratou mau atua atoa ra? 24 Ua haamauhia e oe to mau taata na o Iseraela ei taata no oe e a muri noa ˈtu; e ua riro hoi oe, e Iehova, ei Atua no ratou. 25 E teie nei, e te Atua, e Iehova, o te parau i parauhia iho e oe i to tavini nei, e i to ˈna ra utuafare, e haamau roa ïa e a muri noa ˈtu, e rave hua hoi i ta oe i parau iho nei. 26 Ia haamaitaihia hoi to oe ra iˈoa e a muri noa ˈtu, ia na ôhia e, O Iehova sabaota, o te Atua ïa no Iseraela; e ia mau hoi te utuafare o to tavini o Davida i mua ia oe ra. 27 Ua parau mai hoi oe i to tavini, e Iehova sabaota, e te Atua no Iseraela e, e patu vau i to fare: i faaitoito ai hoi to tavini nei i te pure i teie nei pure ia oe na. 28 E teie nei, e tau Atua, e Iehova, o oe anaˈe te Atua mau, e parau mau hoi ta oe parau, e ua faaite mai hoi oe i teie nei maitai no to tavini nei: 29 e teie nei, e haamaitai mai oe i te fare o to tavini nei, ia vai maitai â i mua ia oe na, o oe hoi, e tau Atua, e Iehova, tei parau mai e ia maitai roa te fare o to tavini i te maitai no ǒ mai ia oe ra e a muri noa ˈtu.