Samuela 2
TE FAAORE NEI IOABA I TE OTO O DAVIDA, E FAAHOˈI RA I TE ARII I IERUSALEMA.
19 E ua faaitehia ˈtura Ioaba, e inaha, te oto ra te arii te auê ra ia Abasaloma; 2 e ua faarirohia taua ora no ratou i taua mahana ra ei otoraa no te taata atoa: ite aˈera hoi te mau taata i taua mahana ra e te oto ra te arii i te tamaiti. 3 Ua haere eiâ noa ˈtura te mau taata i taua mahana ra, i roto i te oire, mai te taata e horo i te haama ia fati i te tamaˈi ra; 4 e ua purou te arii i te mata, e te oto pii noa ra te arii, E tau tamaiti e, e Abasaloma e! e Abasaloma e, e tau tamaiti, e tau tamaiti! 5 Ua haere atura Ioaba i roto i te fare, i te arii ra, e ua na ô atura, Ua haama to mau tavini ia oe i teie nei mahana, o tei faaora iho nei ia oe, e i to mau tamaroa e to mau tamahine, e to mau vahine, e to mau vahine tavini; 6 o oe aore i au atu i to oe ra mau taua, i au atura râ oe i to oe ra mau enemi. Ua faaite hua mai hoi oe i teie nei mahana, e e ore oe e haapao mai i te feia rarahi ia oe nei, e to mau tavini: ua ite iho nei hoi au, ahiri te ora nei Abasaloma, e o matou nei tei pau i te pohe, e mea tia ïa ia oe i teie nei mahana. 7 E teie nei, a tia i nia, a haere e haamahanahana i te aau o to mau tavini, te tǎpǔ nei au ia Iehova, e ia ore oe ia tae ra, e ore roa te hoê taata e toe ia oe i teie nei po: e ino rahi hoi te reira ia oe, i te mau ino atoa i roohia ˈi oe ra, e mai to itiraa mai â. 8 Ua tia maira te arii ua parahi maira i te uputa. Faaitehia ˈtura te mau taata atoa, e inaha, te parahi maira te arii i te uputa. Ua haere maira te taata atoa i te arii ra. Ua fati anaˈe hoi Iseraela atoa i to ˈna fare, i to ˈna fare.
9 Ua faaino ihora Iseraela ratou ratou iho, na ô aˈera, I faaora iho nei hoi te arii ia tatou i to tatou enemi, e te rima hoi o te Philiseti, e teie nei ua hee iho nei hoi oia ia Abasaloma. 10 E o Abasaloma ra hoi, o tei faatahinuhia ïa e tatou no nia ia tatou nei, ua pohe ïa i te tamaˈi. E teie nei, eaha outou i ore i parau ai i te arii e faahoˈi mai?
11 Ua tono atura te arii ra o Davida i te vea, i na tahuˈa ra ia Sadoka raua o Abiatara ra, i te na ôraa ˈtu e, A parau atu i te feia rarahi o Iuda ra, Eaha outou i faatautau ai i te faahoˈiraa mai i te arii i to ˈna ra fare? o tei tae roa aˈenei te parau a Iseraela atoa i te fare o te arii ra? 12 o to ˈu ra hoi mau taeae, o outou ïa, o to ˈu ïa ivi, o to ˈu ïa iˈo: eaha hoi outou i faatautau ai i te faahoˈi mai i te arii ra? 13 E parau atoa ˈtu ia Amasa, O to ˈu ïa ivi e o to ˈu ïa iˈo o oe; ia na reira mai â te Atua ia ˈu nei, e ia rahi mai â, ia ore oe ia faarirohia e au ei raatira no te nuu i mua ia ˈu, ei mono aˈe ia Ioaba, e a muri noa ˈtu. 14 Riro maira te aau o te ati Iuda atoa ra mai te aau o te taata hoê ra; i tono ai ratou i te vea i te arii ra i parau ai e, E hoˈi mai oe e to mau tavini atoa ra. 15 Ua hoˈi maira te arii e ua tae i taua pape ra o Ioridana. E ua haere maira Iuda i Gilagala, ia farerei i te arii ra, e aratai i te arii i tera pae Ioridana.
16 E o Simei a Gera, e ati Beniamina i Bahurima, haere oioi atura oia e to Iuda atoa ra ia farerei i te arii ra ia Davida. 17 E na ati Beniamina hoê tausani atoa; o Ziba atoa, e tavini no te utuafare o Saula, e na tamarii hoê ahuru e ma pae na ˈna ra, e na tavini o ˈna hoê taau ra; e ua na mua ratou i taua arii ra i te haere, i taua pape ra o Ioridana. 18 E faaneehia ˈtura te hoê eˈa ei faauta mai i to te utuafare o te arii e ei raveraa i ta ˈna atoa i hinaaro ra. E tipapa ihora Simei a Gera ra i raro i mua i te aro o te arii ia ˈna i tae mai i te tahi pae; 19 e ua na ô maira oia i te arii, Eiaha tau fatu e huri mai i ta ˈu nei hara i nia ia ˈu nei, eiaha hoi oe e manaˈo i te rave ino a to tavini nei, i te mahana a reva mai ai tau fatu ra te arii nei, mai Ierusalema maira, o te inoino hoi to te arii na aau: 20 ua ite hoi to tavini nei e, ua hara vau: e teie nei, inaha, o vau to te utuafare o Iosepha i na mua mai i teie nei mahana ia farerei atu i tau fatu i te arii ra. 21 Ua parau maira te tamaiti a Zeruia ra o Abisai, na ô maira, Eiaha Simei ia taparahihia i taua hara na ˈna nei, e oia i faaino i tei faatahinuhia e Iehova ra? 22 Ua parau atura Davida, Eaha ta ˈu parauraa ˈtu ia outou, e te mau tamarii a Zeruia, ia riro mai anei hoi outou ei enemi no ˈu i teie nei mahana? e pohe anei hoi te hoê taata o Iseraela i teie nei mahana? e ere anei tei ite au e o vau te arii o Iseraela i teie nei mahana? 23 Ua parau atura te arii ia Simei, E ore oe e pohe. Ua tǎpǔ atura te arii ia ˈna.
24 Ua haere maira taua mootua o Saula ra o Mephiboseta ia farerei i te arii ra; aita i rapaau i tana avae, aore hoi i faanehenehe i te taa, aore hoi i uhi i te ahu, mai te mahana mai â i reva ˈi te arii ra e tae noa aˈera i te mahana i hoˈi mai ai ma te hau. 25 Ia ˈna hoi i haere mai mai Ierusalema mai e ia farerei i te arii ra, ua parau atura te arii ia ˈna, Eaha oe i ore i pee mai ai ia ˈu ra, e Mephiboseta? 26 Ua parau maira oia, E tau fatu, e te arii, i vare iho nei au i tau tavini: ua parau hoi to tavini nei e, A faauta na i te hoê parahiraa no ˈu i nia i te asini, ei parahiraa no ˈu, e haere au i te arii ra; no te mea e pirioi to tavini nei: 27 ua pari haavare ra oia i to tavini nei ia oe, e tau fatu, e te arii; e au ra tau fatu, te arii, i te melahi a te Atua; e rave oe i ta oe e hinaaro ra: 28 no te pohe anaˈe to te utuafare atoa o tau tupuna, i mua ia oe, e tau fatu, e te arii: e ua haaparahi hoi oe i to tavini nei i ropu atoa i te feia i amu i ta oe ra amuraa; e tia anei hoi ia ˈu ia parau faahou atu â i te arii? 29 Ua parau atura te arii ia ˈna, Eaha hoi oe i faahiti faahou mai ai i ta oe parau? teie ta ˈu parau, E rave orua o Ziba e tufa i taua fenua ra. 30 Ua parau maira Mephiboseta i te arii, E rave atoa ˈtu oia inaha, ua tae mai oe, e tau fatu, e te arii, i to oe ra utuafare ma te hau.
31 Ua haere maira Barazilai i Gileada mai Rogelima mai, e aratai i te arii i te tahi pae Ioridana, ua aratai atura oia ia ˈna i te tahi pae Ioridana. 32 Ua ruhiruhia roa taua taata ra o Barazilai, ua tae i te vau o te ahururaa o te matahiti; i faaamu noa na oia i te arii, ia ˈna i parahi i Mahanaima; e taata taoˈa rahi hoi oia. 33 Ua parau atura te arii ia Barazilai, Mai haere atoa tatou, e na ˈu oe e faaamu i Ierusalema. 34 Ua parau maira Barazilai i te arii, Mai te aha ra te maoro o to ˈu nei aho, a tae atoa ˈtu ai mâua o te arii i Ierusalema? 35 ua tae au i te vau o te ahururaa o to ˈu nei matahiti i teie nei mahana; e ite anei hoi au i te maitai e te ino? e ite anei hoi to tavini nei i ta ˈu e amu nei e ta ˈu e inu nei e tia anei hoi au ia faaroo i te pehe tane e te pehe vahine? eaha e tia ˈi ia haapeapea ˈtu to tavini nei ia oe, e tau fatu, e te arii? 36 E tuu iti noa aˈe na oe i to tavini nei ia haere atoa na vau i te tahi pae i teie nei Ioridana mâua atoa o te arii: eaha oe i na reira ai i te faautuaraa mai ia ˈu nei, e te arii? 37 A tuu ai oe i to tavini nei ia hoˈi noa na, ia pohe atu vau i to ˈu ra oire, i pihaiiho i te tanuraa o tau metua tane a tau metua vahine ra, a hiˈo na râ i to tavini nei ia Kemehama, oia te haere atu i to tere, e tau fatu, e te arii; a rave atu ai oe i ta oe e hinaaro ia ˈna. 38 Ua parau atura te arii, o Kemehama te haere o mâua atoa, e o ta oe e hinaaro ra, o ta ˈu ïa e rave ia ˈna; e o ta oe e hinaaro ia ˈu nei, o ta ˈu ïa e rave ia oe ra. 39 Ua haere anaˈe ihora te mau taata atoa i te tahi pae i Ioridana. E tae atura te arii i te tahi paeau, ua hôˈi aˈera te arii ia Barazilai e ua faaora ˈtura ia ˈna; hoˈi ihora oia i to ˈna ra utuafare. 40 Reva ˈtura te arii i Gilagala, e Kemehama atoa i te haere-atoa-raa; e to Iuda atoa i te aratairaa i te arii, e te tahi pae o to Iseraela atoa.
41 Ua haere atoa maira to Iseraela atoa i te arii ra, ua parau maira, Eaha ra to matou mau taeae o to Iuda nei i rave eiâ noa mai ai ia oe, e ua aratai mai i te arii, e to ˈna atoa ra utuafare, e te mau taata atoa o Davida, i teie pae Ioridana? 42 Ua parau atura to Iuda atoa ra i to Iseraela, No te mea, e ati rahi to te arii ia matou nei; eaha hoi outou i riri ai i te reira? I amu na anei hoi matou i ta te arii maa, e e taoˈa anei ta ˈna i ho mai na matou nei? 43 Ua parau maira to Iseraela i to Iuda, na ô maira, Auahuru matou i te atiraa ˈtu i te arii, e ati rahi to matou ia Davida i to outou; eaha ihora hoi outou i vahavaha mai ai ia matou nei, aore aˈera e faaau atoa mai i te parau ia matou nei, e e faahoˈi mai i te arii? E uˈana rahi râ to te parau a to Iuda i ta to Iseraela.