Samuela 2

TE PARI HAAVARE A ZIBA RA, E TE PARAU INO A SIMEI IA DAVIDA.

16 E mairi iti noa maira te upoo o te mouˈa ra, inaha, ua farerei noa maira te tavini o Mephiboseta ra o Ziba ia ˈna, ma na asini ra e piti ma te parahiraa atoa ra, e na pane hoi e piti hanere, e na pueraa vine hoê hanere, e na pueraa suke hoê hanere, e na pueraa suke hoê hanere, e hoê hoi hue uaina. 2 Ua parau atura te arii ia Ziba, Eaha te reira? Ua parau maira Ziba, no te mau taata o te arii ra na asini ei parahiraa; e na pane, e na maa ra, ei amuraa ïa na te mau tamarii ra; e te uaina ra, ei inuraa ïa na te feia i paruparu i te haerea i te medebara ra. 3 Ua parau atura te arii, Teihea te tamaiti a to fatu ra? Ua parau maira Ziba i te arii ra, Inaha, tei Ierusalema: te na ô ra hoi oia, Auanei paha to Iseraela i faahoˈi mai ai i te basileia a tau metua ra. 4 Ua parau atura te arii ia Ziba, Inaha, tera mai ta oe tei mauhia e Mephiboseta ra. Ua tahopu ihora Ziba, na ô aˈera, Ia itehia mai au e oe, e tau fatu, e te arii e.

5 E tae atura te arii ra o Davida i Bahurima, inaha, ua puroro noa maira te hoê taata no te fetii o te utuafare o Saula, o Simei a Gera, ua haere maira oia ua faaino haere. 6 Ua taora maira oia i te ofai ia Davida, e te mau tavini atoa o te arii ra o Davida; e te mau taata atoa, e te feia aito atoa i te pae atau e te pae aui. 7 Ua na ô maira Simei i taua faainoraa no ˈna ra, E haere, e haere, e tena na taata taparahi taata e, e tena na taata ino: 8 te faahoˈi nei Iehova i te pohe atoa o te utuafare o Saula ia oe, i riro ai te hau ia oe ra; e te tuu nei Iehova i te basileia i te rima o to tamaiti o Abasaloma ra. E inaha, no to oe ra ino, e taata taparahi taata hoi oe.

9 Ua parau maira Abisai a Zeruia i te arii, Eaha ra hoi teie nei urî pohe i faaino mai ai i tau fatu, te arii nei, e tuu aˈe na oe ia ˈu e tii au e tairi mai i te afii iho. 10 Ua parau atura te arii, eaha ˈtu vau ia outou, e te mau tamarii a Zeruia? E vaiiho noa ia faaino noa mai na; peneiaˈe ua parau mai Iehova ia ˈna e, A faaino ia Davida, O vai ihora te parau atu e, Eaha oe i na reira ai? 11 E ua parau atura Davida ia Abisai, e tana mau tavini atoa, Inaha tau tamaiti nei, no roto ia ˈu iho nei, te titau mai nei ia ˈu: a tae ˈtu ai i teie nei taata ati Beniamina. E vaiiho noa ˈtu, e vaiiho noa ˈtu ia faaino noa mai na; ua parauhia mai oia e Iehova. 12 E riro Iehova i te hiˈo mai i to ˈu nei ati; e riro Iehova i te hopoi mai i te maitai no ˈu auanei i taua faaino no ˈna nei. 13 Te haere noa ra Davida e tana mau taata na te eˈatia, te haere atoa ra Simei na te tumu mouˈa na reira iho, ma te faaino â, e ma te taora i te ofai ia ˈna, e ma te titiri noa i te repo. 14 E ua tae maira te arii e te mau taata atoa ra ua rohirohi, e ua tamaa ihora i reira.

15 Ua tae maira Abasaloma, e te mau taata atoa ra, e to Iseraela atoa i Ierusalema, e tei reira atoa Ahitophela. 16 Ua haere maira taua hoa o Davida ra, o Husai i Areki ra, ia Abasaloma, e ua na ô maira Husai ia Abasaloma. Ia ora te arii! ia ora te arii! 17 Ua parau atura Abasaloma ia Husai, O taua hamani maitai anei ïa i to hoa na? eaha oe i ore i pee ai i to hoa ra? 18 Ua parau maira Husai ia Abasaloma, Eiaha, o ta Iehova ra, e ta teie nei mau taata, e ta Iseraela atoa ra e haapao ra, oia to ˈu fatu, e ei ǒ na ra vau parahi ai. 19 E tena na ei ia vai ra hoi au, maori râ i te tamaiti no ˈna iho? mai ta ˈu â hoi i rave i mua i te aro o to metua na, e na reira atoa vau i mua i to oe na aro.

20 Ua parau atura Abasaloma ia Ahitophela, A faataa na i ta outou parau, i ta tatou e rave ra. 21 Ua parau maira Ahitophela ia Abasaloma, A haere na oe i roto i te mau vahine tavini a to metua i vaiihohia iho nei ei tiai i te utuafare nei; ite aˈera to Iseraela ia oe e ua ririhia oe e to metua na: etaeta aˈera te rima o te mau taata atoa i ǒ oe nei. 22 Ua hohora aˈera ratou i te fare ahu i nia iho i taua fare ra; ua tomo atura Abasaloma i roto i te mau vahine tavini a tana metua ra, i mua i te aro o to Iseraela atoa ra: 23 o taua aˈo a Ahitophela i aˈo maira, riro atura mai te mea e ui na i te parau a te Atua: o te huru atoa ïa i taua mau aˈo a Ahitophela ra, ia Davida e ia Abasaloma atoa ra.