Samuela 2

TE ARO RA IOABA IA RABA, TE RAVE RA DAVIDA I TE VAHINE RA IA BATE-SEBA.

11 E hope aˈera te matahiti, tae aˈera i te tau e haere ai te hui arii i te tamaˈi, ua tono aˈera Davida ia Ioaba e tana mau tavini, e ia Iseraela atoa; e ua pau roa te tamarii o Amona ia ratou, e ua aro atu ia Raba. Parahi atura râ Davida i Ierusalema.

2 E tae aˈera i te hoê ahiahi, ua tia aˈera Davida i nia mai nia mai i te roi ra, ua hahaere noa na nia i te tapoˈi fare o te arii ra: i reira to ˈna iteraa ˈtu i te hoê vahine te horoi ra ia ˈna iho; e vahine mata maitai taua vahine ra. 3 Ua tono aˈera Davida e ui i taua vahine ra. Ua na ô maira te tahi, E ere anei teie ïa Bate-seba te tamahine a Eliama, te vahine a Uria ati Heta ra? 4 Ua tono aˈera Davida i te vea, ua rave maira ia ˈna; ua tomo maira oia i roto ia ˈna ra, e ua taoto atura oia ia ˈna; e oti aˈera to ˈna tamâraa ia ˈna iho i to ˈna ra viiviiraa ra; ua hoˈi atura i to ˈna ra utuafare. 5 Ua tô ihora taua vahine ra, e ua tono maira ua faaite maira ia Davida, na ô maira, Ua hapu vau.

6 Ua tono aˈera Davida i te vea ia Ioaba, na ô atura, E tono mai na oe ia Uria ati Heta ra. Ua tono maira hoi Ioaba ia Uria ia Davida ra. 7 E tae maira Uria ia ˈna ra, ua ui aˈera Davida ia Ioaba, e te aha ra, e te aha ra te mau taata, e te aha ra te tamaˈi? 8 Ua parau atura Davida ia Uria, A haere i to fare, e horoi hoi i to avae. Ua haere ihora Uria i rapae au mai i taua fare o te arii ra, e te hopoihia ra te hoê maa maa na muri na te arii. 9 Taoto noa ihora râ Uria i te uputa o te fare o te arii ra, i ropu atoa i te mau tavini o to ˈna ra fatu, aita aˈera i haere i raro i to ˈna ra utuafare. 10 E ia faaitehia ra hoi Davida, ia na ôhia e, Aita aˈera te taata ra o Uria i tae i raro i to ˈna ra utuafare. Ua parau atura Davida ia Uria, E ere anei oe mai te eˈa mai? eaha ihora hoi oe i ore i tae ai i to fare na? 11 Ua parau maira Uria ia Davida, Te vai noa ra te afata, e o Iseraela, e o Iuda atoa i roto i te puhapa; e tau fatu ra hoi o Ioaba, e te mau tavini atoa o tau fatu, te puhapa noa ra i roto i te vahi atea; e tae anei hoi au i roto i to ˈu fare e amu i te maa, e inu hoi, a taoto ai i tau vahine? Te ora ra oe ra, e ore ïa vau e na reira. 12 Ua parau atura Davida ia Uria, Atira na oe i ǒ nei auanei, ananahi au e tuu atu ai ia oe na. Parahi noa ihora Uria i Ierusalema i taua mahana ra. 13 E ao aˈera, ua parau atura Davida ia ˈna, e ua faaamu ia ˈna i te maa, e ua faainu hoi ia ˈna i mua i tana aro e taero ihora oia: e ahiahi aˈera, haere atura oia e taoto i nia i ta ˈna roi e te mau tavini atoa o to ˈna ra fatu, aita aˈera râ i tae i to ˈna ra utuafare.

14 E ao aˈera, ua papai ihora Davida i te tahi leta ia Ioaba, ua tuu atura na Uria e hopoi. 15 Ua papai ihora oia i roto i taua leta ra, na ô aˈera, E tuu ia Uria i mua mau i te aroraa ra, a orai ai outou i muri ia tairihia oia, ia pohe. 16 E oti aˈera taua oire ra i te hiˈohia e Ioaba, ua tuu atura oia ia Uria i te hoê vahi ua ite oia e, e feia aito anaˈe ïa. 17 Ua tomo atura to te oire i rapae, ua aro ia Ioaba; mairi ihora te tahi pae taata, i te tahi pae i te mau tavini o Davida; e ua pohe ihora hoi Uria ati Heta atoa ra.

18 Ua tono aˈera Ioaba i te vea, ua faaite aˈera ia Davida i te mau parau atoa o te tamaˈi; 19 e ua aˈo atura i taua vea ra, na ô atura, Ia hope te mau parau tamaˈi i te parauhia ˈtu e oe i te arii ra, 20 ia tupu ra te riri o te arii ra, e ia parau mai oia ia oe e, Eaha hoi outou i faafatata hua ˈi i te oire a aro ai outou? aita outou i ite e e teˈa mai ratou i nia i te aua? 21 na vai hoi i taparahi ia Abimeleka, te tamaiti a Ierubeseta? e ere anei na te hoê vahine i titiri noa mai i te hoê maa ofai i nia ia ˈna mai nia mai i te aua ra; e pohe ihora oia i Tebeza? eaha outou i haere hua ˈi i pihaiiho i taua aua ra? e parau atu oe i reira, O to tavini atoa o Uria ati Heta, ua pohe atoa ïa.

22 Ua haere ihora taua vea ra, ua faaite atura ia Davida i te mau parau atoa i tonohia ˈtu ai oia e Ioaba ra. 23 Ua na ô atura taua vea ra ia Davida, Ua pau matou ia ratou; ua haere mai hoi ratou ia matou i roto i te ô ra, ua auauhia ra e matou e tae noa ˈtura i te tomoraa i te aua ra. 24 E na te feia teˈa i teˈa mai i to mau tavini i nia i te aua; e ua pohe te tahi pae i te mau tavini o te arii; e to tavini o Uria ati Heta ua pohe atoa ïa. 25 Ua parau atura Davida i te vea, E na ô atu oe ia Ioaba, Eiaha taua mea nei ia riro ei mea ino ia oe ra, te pohe noa nei â te taata i te ˈoˈe. E faaetaeta hua na i te rave i taua oire ra, e ia huri taere atu. E na reira i te faaitoito atu ia ˈna.

26 E ite aˈera te vahine a Uria e, ua pohe tana tane o Uria, ua oto ihora oia i tana tane. 27 E hope aˈera taua otoraa ra, ua tono aˈera Davida i te vea, ua aratai maira i tana utuafare, riro atura oia ei vahine na ˈna, e fanau maira hoi ta ˈna e tamaiti. E taua mea i ravehia e Davida ra, e mea ino ïa i mua i te mata o Iehova.