Genese

TE DILUVI I TE ROROMARAA I NIA I TE FENUA; O NOA I TE HAERERAA I RAPAE AU I TAUA PAHI RA.

8 Te manaˈo ra te Atua ia Noa, e i te mau mea ora atoa, e te mau puaa atoa i roto atoa i te pahi ra; e ua faafarara ihora te Atua i te hoê mataˈi na nia i te fenua ia pahee taua moana ra. 2 Opanihia ihora te tumu o te moana, e te mau uputa o te raˈi ra, e faaorehia ihora te ûa rahi no te raˈi mai; 3 pahee maite atura taua moana ra mai nia ˈtu i te fenua nei, aita i faaea; e hope aˈera taua na rui hoê hanere, e pae ahuru ra, ua iti roa ihora taua moana ra. 4 E tae atura i te hitu o te marama ra, e te rui hoê ahuru ma hitu i taua marama ra, ua iri ihora taua pahi ra i nia i te mouˈa ra o Ararata. 5 Te iti noa ra taua pape ra, e tae roa aˈera i te ahuru o te marama ra; e itea ihora te upoo mouˈa i te mahana matamua o taua marama hoê ahuru ra.

6 E hope aˈera hoi na rui e maha ahuru ra, ua iriti aˈera Noa i te hoê haamaramarama i hamanihia e ana no taua pahi ra. 7 Ua tuu atura i te hoê oreba, tei maue atu, e ua maue mai, e pâpâ roa aˈera te pape i nia iho i te fenua nei. 8 E ua tuu atura hoi oia i te hoê uuairao, ia itea te oreraa o te pape i nia iho i te fenua; 9 aita râ o te uuairao tauraa i itea, hoˈi maira oia i te pahi ia ˈna ra, te vai noa ra hoi te pape i nia iho i te fenua e ati noa aˈe: ua faatoro atura oia i tana rima, rave atura, ume maira i roto i te pahi ia ˈna ra. 10 Ua tiai ihora hoi oia e rui hitu aˈera; ua tuu faahou atura i taua uuairao ra i rapae i te pahi; 11 ua hoˈi maira taua uuairao ra i te ahiahi ia ˈna ra, e inaha! e rau olive pofai-apî-hia tei te vaha: ite aˈera Noa e ua iti te pape i nia i te fenua ra. 12 Ua tiai ihora hoi oia e ia rui hitu â; e ua tuu atura hoi i te uuairao; e aore ïa i hoˈi faahou mai. 13 E tae aˈera i te ono o te hanere hoê tiahapa i te matahiti, i te rui hoê o te marama matamua ra, ua pâpâmǎrô aˈera te pape i nia i te fenua ra; ua iriti aˈera Noa i te tahua o te pahi ra, ua hiˈo ihora, e inaha, ua marô i nia iho i te fenua.

14 E tae aˈera i te piti o te marama, e te taau ma hitu o te rui i taua marama ra, ua marô te fenua. 15 Ua parau maira te Atua ia Noa, na ô maira, 16 A haere na i rapae i te pahi, o oe, to vahine, e to mau tamarii, e na vahine a to mau tamarii atoa ra; 17 e tuu atoa hoi i te mau mea ora atoa na e rave rahi te huru ra i rapae, i te mau manu pererau ra, e te mau puaa ra, e te mau mea atoa e nee haere i nia i te fenua ra; ia fanauˈahia i nia i te fenua na, e ia rahi ratou i nia i te fenua na. 18 Ua haere ihora Noa i rapae, e ta ˈna mau tamarii, e ta ˈna vahine, e te vahine a na tamarii na ˈna ratou atoa ra. 19 E te mau manu avae maha, e te mau mea e nee haere ra, e te mau manu pererau, e te mea e nee haere i nia i to fenua nei, i to ratou ra mau huru, ua haere anaˈe ïa i rapae, mai roto mai i taua pahi ra. 20 Ua faatia ihora Noa i te fata na Iehova; e ua rave ihora i to te mau puaa viivii ore ra, e te mau manu viivii ore atoa ra, ua pûpû atura i te tusia taauahi i nia i taua fata ra. 21 Hoˈi ihora Iehova i te hauˈa noˈanoˈa ra; e ua na ô aˈera Iehova i roto i tana aau, E ore roa te fenua e ino faahou ia ˈu, i te taata nei; ino noâ te manaˈo o to te taata aau mai to ˈna tamarii-rii-raa mai â; e ore hoi au e tairi faahou i te mau mea ora atoa, mai ta ˈu i rave iho nei: 22 i teie nei râ, te vai nei te fenua, e vai atoa mai te tau tanuraa, e te ootiraa, te toetoe, e te mahanahana, te auhune, e te poia, te ao, e te po, eita e ore.