Genese

TE OTORAA IA IAKOBA, E TO ˈNA TANURAAHIA, TO IOSEPHA HAAMAHANAHANARAA I TA ˈNA MAU TUAANA.

50 Ua tipapa ihora Iosepha i nia i te mata o tana metua, oto noa ihora, e ua hôˈi atura ia ˈna. 2 Ua faaue atura Iosepha i tana mau tavini i te feia miri ra e miri i taua metua no ˈna ra, e ua miri ihora te mau tahuˈa ia Iseraela. 3 E hope aˈera o ˈna pue mahana e maha ahuru ra (o na mahana ïa no te miriraa); ua oto ihora to Aiphiti ia ˈna e a hitu aˈera ahururaa o te mahana. 4 E hope roa aˈera taua mau mahana otoraa ia ˈna ra, ua parau atura Iosepha i to te utuafare o Pharao, na ô atura, I tiahia mai au e outou na, teie ta ˈu parau ia outou, e parau atu outou ia Pharao, e faaite atu, 5 e ua faatǎpǔ mai tau metua ia ˈu, na ô maira, Inaha! teie au a pohe, ei roto i to ˈu iho menema oe huna ˈi ia ˈu, i ta ˈu i ô no ˈu iho i te fenua ra i Kanaana: e teie nei e tuu aˈe na oe ia ˈu e haere au i nia, e huna i tau metua tane, e na ˈu e hoˈi mai: 6 ua na ô maira Pharao, A haere i nia, a huna i to metua tane, i ta ˈna i faatǎpǔ mai ia oe ra.

7 Haere atura Iosepha i nia e huna i tana metua tane; e te mau tavini atoa o Pharao i te haere-atoa-raa, te feia rarahi no to ˈna ra utuafare, e te feia rarahi no taua fenua atoa ra no Aiphiti; 8 e to te utuafare atoa o Iosepha, e tana mau taeae, e to te utuafare o te metua tane iho; o te mau tamarii anaˈe ra, e te mau mamoe, e te mau puaatoro te vaiihohia i te fenua ra i Gosena. 9 O te mau pereoo atoa hoi i te haere i nia, e te feia puaahorofenua atoa ra, e tiaa rahi roa hoi ratou. 10 E tae atura ratou i te alona o Atada, i tera pae i te pape ra i Ioridana, i reira to ratou otoraa, e otoraa rahi roa; e otohaa ta Iosepha i faatupu i reira i to ˈna metua, e rui hitu aˈera. 11 E ite aˈera to taua fenua ra, o te ati Kanaana, i taua otoraa i te alona o Atada ra, ua na ô aˈera ratou, E otoraa rahi roa tera ˈˈe ta to Aiphiti ra. I parauhia ˈi taua vahi i tera pae Ioridana ra, o Abela-miziraima. 12 Ua rave maite atura taua mau tamarii a Iakoba ra i ta ˈna i poroi mai ia ratou ra: 13 ua hopoi maite hoi ta ˈna mau tamarii ia ˈna i te fenua ra i Kanaana, e ua huna hoi ia ˈna i roto i te ana i te aua i Makapela, i pihai iho i Mamera ra, i tei hoohia e Aberahama ma te aua atoa ia Epherona ati Heta ra, ei tanuraa taata.

14 E oti aˈera to ˈna metua tane i te hunahia e ana, ua hoˈi maira Iosepha i Aiphiti; oia e tana mau tuaana, e te feia i haere atoa i nia i te hunaraa i taua metua tane no ˈna ra.

15 E ite ihora te mau tuaana o Iosepha ra, e ua pohe roa to ratou metua tane, ua na ô aˈera ratou, E riro paha Iosepha i te tairoiro mai ia tatou, e i te tahoo mai i ta tatou hamani ino ia ˈna ra, 16 Ua tono aˈera ratou i te hoê ia Iosepha ra, e parau atu e, I aˈo mai to metua tane ia matou a pohe ai ra, na ô maira, 17 e na ô atu outou ia Iosepha, E faaore mai oe i te hapa a to mau tuaane nei, e to ratou ino: ua hamani ino hoi ratou ia oe. E teie nei, teie ta matou parau ia oe, e faaore mai oe i te hara a te mau tavini o te Atua o to metua tane ra: ua oto ihora Iosepha i ta ratou na reiraraa mai ia ˈna ra. 18 Haere atura hoi tana mau tuaana, tipapa ihora i raro i mua i tana aro, na ô atura, Inaha, ei tavini anaˈe matou no oe: 19 ua parau maira Iosepha ia ratou, Eiaha e mǎtaˈu; tei ia ˈu anei ta te Atua? 20 o ta outou i opua ei ino no ˈu ra, o ta te Atua ïa i opua ei maitai; ia tupu ia ˈna ta tatou e ite nei, oia te taata atoa nei e rave rahi i te oraraa i teie nei mahana: 21 e teie nei, eiaha e mǎtaˈu: na ˈu outou e faaamu, e ta outou mau tamarii atoa. Na reira ˈtura oia i te haamahanahana ia ratou, e ua parau maite atu ia ratou ma te aroha.

22 Parahi noa ihora Iosepha i Aiphiti, oia, e te utuafare atoa o tana metua: hoê atura hanere e hoê ahuru tiahapa to Iosepha matahiti. 23 Ua ite hoi Iosepha i to Epheraima mau mootua: e te tamarii atoa a Makira a Manase ra, i nia ratou i te humaha o Iosepha i te paariraa.

24 Ua parau atura Iosepha i te mau taeae no ˈna ra, Teie au a pohe; e ite mai râ te Atua ia outou, e na ˈna outou e aratai mai ǒ nei atu, e i nia roa i te fenua ta ˈna i tǎpǔ mai e, no Aberahama, e no Isaaka, e no Iakoba. 25 Ua faatǎpǔ atura Iosepha i te mau tamarii a Iseraela, na ô atura, E ite mai te Atua ia outou, e na outou e hopoi atoa i to ˈu nei pera i nia mai ǒ nei atu. 26 Pohe ihora Iosepha, hoê atura hanere e hoê ahuru tiahapa o ˈna matahiti; e ua miri ihora ratou ia ˈna, e ua tuu atura i roto i te piha i Aiphiti ra.