Genese

HAERE ATURA ISAAKA I GERARA; TE AˈO ATURA E TE HAAMAITAI ATURA TE ATUA IA ˈNA.

26 Roohia ihora taua fenua ra i te oˈe, eiaha te oˈe matamua i tupu i te anotau ia Aberahama: haere atura Isaaka i Gerara, i te arii o te Philiseti ia Abimeleka ra. 2 Ua fa mai hoi Iehova ia ˈna ra, e ua parau mai e, Eiaha e haere i raro i Aiphiti, e parahi râ oe i te fenua ta ˈu e faaite atu ia oe nei, 3 e parahi oe i teie nei fenua, ei pihai-atoa-iho hoi au ia oe, e e haamaitai atu vau ia oe; e horoa ˈtu hoi au i teie nei mau fenua no oe, e no to oe ra huaai; e e faatupu vau i te tǎpǔ i ta ˈu i tǎpǔ atu i to metua ra ia Aberahama: 4 e faarahi roa vau i to oe na huaai e mai te fetia o te raˈi ra te rahi, e e horoa vau i teie atoa nei mau fenua no to oe na huaai; e ei to oe na huaai e maitai ai te mau fenua atoa o teie nei ao; 5 no te mea, ua faaroo mai Aberahama i tau reo, e ua haapao i ta ˈu poroi, e ta ˈu parau, e tei faatupuhia e au, e ta ˈu ture. 6 Parahi ihora Isaaka i Gerara. 7 E ua ui maira te mau taata no taua vaehaa ra ia ˈna i te vahine na ˈna ra; ua parau atura oia, E tuahine oia no ˈu; mǎtaˈu hoi oia ia parau atu e, E vahine oia na ˈu; o te taparahihia oia e to reira ia Rebeka, e vahine mata aiai hoi oia. 8 E maoro aˈera oia i reira, te hiˈo noa maira taua arii o te Philiseti ra, o Abimeleka, na roto i te haamaramarama, e inaha, ite maira oia ia Isaaka i te hanihaniraa i ta ˈna vahine ra ia Rebeka. 9 Ua tii maira Abimeleka ia Isaaka, na ô maira, E vahine mau â na oe te vahine nei; eaha hoi oe i parau mai ai e, E tuahine oia no ˈu? Ua parau atura Isaaka ia ˈna, No te mea, i manaˈo vau e, e pohe paha vau ia ˈna. 10 Ua parau maira Abimeleka, Eaha teie ta oe i rave iho ia matou nei? e rave-noa-hia hoi ta oe vahine e te hoê o te mau taata nei, ahiri i rave, hara ihora matou ia oe i reira. 11 Ua aˈo atura Abimeleka i te mau taata atoa no ˈna ra, na ô atura, O te rave noa ˈtu i teie nei taata e i ta ˈna vahine, e taparahihia ïa.

12 Ua faaapu ihora Isaaka i taua fenua ra, e taihoê hanere ta ˈna i noaa i te huero hoê i taua matahiti ra: ua haamaitai mai hoi Iehova ia ˈna. 13 E rahi atura ta ˈna, e tupu noa ˈtu ra i te rahiraa, e riro atura oia ei taata rahi roa: 14 e nǎnǎ mamoe hoi ta ˈna, e te nǎnǎ puaatoro, e rave rahi hoi te tavini; e ua feii ihora te Philiseti ia ˈna. 15 E te mau apoo pape i ôhia e te mau tavini o to ˈna ra metua, i te oraraa o tana metua ra o Aberahama, na te mau Philiseti i faaîî e îî roa aˈera i te repo. 16 Ua parau maira Abimeleka ia Isaaka, E haere ê atu na oe; ua rahi roa ˈtura hoi oe ia matou nei.

17 Haere atura Isaaka, patia ihora i te tiahapa i te peho i Gerara ra, parahi ihora i reira. 18 Ua ô faahou ihora Isaaka i te mau apoo pape i ôhia e te mau tavini o tana metua ra o Aberahama; ia pohe hoi Aberahama i faaîîhia ˈi taua mau apoo pape ra e te Philiseti ra, e mairi ihora oia i te mau iˈoa ta tana metua i mairi ra. 19 Ua ô ihora te mau tavini o Isaaka i te apoo i taua peho ra, e itea ihora te pape pihaa. 20 Ua mârô maira te mau tiai puaa i Gerara ra i te mau tiai puaa a Isaaka, na ô maira, Na matou tena na pape. Mairi ihora oia i te iˈoa o taua apoo pape ra ia Eseka, no te mea, ua mârô mai ratou ia ˈna. 21 Ua ô faahou hoi ratou i te tahi apoo pape, e ua mârô maira hoi ratou i te reira; mairi ihora oia i te reira ia Setena. 22 Ua haere ê atura oia, e ua ô faahou i te tahi apoo pape â, aita râ ratou i mârô i te reira; mairi ihora oia i to te reira iˈoa ia Rehobota, ua na ô aˈera hoi oia, Ua ô tatou i teie nei ia Iehova, ia tupu tatou i te rahiraa i te fenua nei. 23 E mai reira hoi haere atura oia i Bere-seba; 24 e ua fa maira Iehova ia ˈna i taua rui ra, na ô maira, O vau te Atua o to metua ra o Aberahama: eiaha e mǎtaˈu tei pihai-atoa-iho vau ia oe, e e haamaitai atu vau ia oe, e faarahi au i to oe ra huaai no tau tavini no Aberahama. 25 Ua patu ihora oia i te hoê fata i reira, e ua pure ihora i te iˈoa o Iehova, e ua patia ihora i to ˈna tiahapa i reira; e ua ô ihora te mau tavini no Isaaka i te apoo pape i reira.

26 Ua haere maira Abimeleka, e te hoa iho o Ahuzata, e te raatira rahi o te nuu na ˈna ra, o Phikola, ia ˈna mai Gerara maira. 27 Ua parau atura Isaaka ia ratou, Eaha outou i haere mai ai i ǒ nei ia ˈu nei, te riri mai nei hoi outou ia ˈu, e ua tiavaru mai outou ia ˈu? 28 Ua na ô maira ratou, Ite hua aˈenei matou e, tei ia oe Iehova; e teie nei, te parau nei matou e, ei tǎpǔ ta tatou, o matou, e o oe; e faaau na matou i te tahi faufaa ia oe na; 29 e mai ia matou aore i hauti noa ˈtu ia oe, e o te hamani maitai anaˈe ra ta matou ia oe, ua tuu hau noa aˈenei matou ia oe, e tena na, ua haamaitaihia mai oe e Iehova, eiaha atoa oe e hamani ino noa mai ia matou nei. 30 Ua rave ihora oia i te faaamua na ratou, e ua amu ratou atoa ra e ua inu hoi i te pape. 31 Tia aˈera ratou i nia i te poipoi roa, ua tǎpǔ ihora ratou te tahi pae e te tahi pae; ua tuu atura Isaaka ia ratou ia haere na, reva ˈtura ratou ma te hau. 32 Ua haere maira te mau tavini o Isaaka i taua mahana ra, ua parau maira ia ˈna i te hoê apoo pape i ôhia e ratou ra; na ô maira ia ˈna, Ua itea te pape ia matou. 33 Mairi ihora i te reira ia Seba. I parauhia ˈi taua oire ra i teie nei e, o Bere-seba te iˈoa.

34 A maha ˈtura ahururaa to Esau matahiti, ua faaipoipo atura oia i te tamahine a Beeri ati Heta ra ia Iudita, e te tamahine a Elona ati Heta ra ia Basemata. 35 Riro atura raua ei faatupu i te ino ia Isaaka raua o Rebeka.