Genese

TO SARA PUE MATAHITI E TO ˈNA POHERAA, E TE TANURAA I TE HOORAAHIA RA.

23 O to Sara pue matahiti i te oraraa nei, hoê ïa hanere, e piti ahuru, e hitu tiahapa; te mau matahiti no Sara i te oraraa nei. 2 Pohe ihora Sara i Kiriata-araba (oia Heberona nei), i te fenua ra o Kanaana. Ua haere maira hoi Aberahama i te otohaa ia Sara e oto ia ˈna.

3 Ua tia aˈera Aberahama i nia, i ta ˈna vahine i pohe ra, ua parau atura i te ati Heta ra, na ô atura, 4 E taata ê au nei e te purutia i roto ia outou na; ho mai na i te tahi tanuraa taata no ˈu i roto ia outou na, e tanu na vau i tau vahine i pohe nei ia moe atu. 5 Ua parau maira te ati Heta ia Aberahama, na ô maira ia ˈna, 6 A faaroo mai na, e to matou tavana e, e taata rahi roa hoi oe i roto ia matou nei; ei roto i te hoê menema maitai i ǒ matou nei huna ˈtu ai oe i to vahine i pohe na; e ore roa te hoê o matou nei e pipiri i to ˈna ihora menema ia huna ˈˈe oe i to vahine i pohe ra i roto. 7 Ua tia aˈera Aberahama i nia, e ua piˈo ihora oia i raro i mua i te aro o te feia fenua i te ati Heta ra, 8 ua parau atura oia ia ratou, na ô atura, Ia tia ia outou ia huna ˈtu vau i tau vahine i pohe nei ia moe atu, a faaroo mai outou ia ˈu; e parau maitai atu outou ia Epherona a Zohara ia ˈu, 9 ia tuu mai oia i te ana no ˈna i Makapela i te hopea mai o te aua na ˈna ra no ˈu; e ho mai oia i te reira ei hoo i te moni e au ra, e ia hoo na maite ei tanuraa taata no ˈu i ǒ outou nei. 10 Te parahi ra Epherona i roto i taua mau ati Heta ra, e ati Heta hoi Epherona, e ua parau maira ia Aberahama, e te faaroo atoa maira te mau ati Heta atoa i tomo na te uputa i roto i te oire no ˈna ra, na ô maira, 11 Eiaha na, e tau tavana e, e faaroo mai na ia ˈu, inâ, taua aua nei, e te ana atoa i roto ra, te horoa ˈtu nei au no oe; i mua atoa i te aro o tau nunaa atoa nei ta ˈu nei horoaraa ˈtu no oe: a tanu i to vahine i pohe na. 12 Ua piˈo ihora Aberahama i raro i mua i te aro o te feia fenua: 13 ua parau atura oia ia Epherona, ua ite atoa te mau taata atoa o taua fenua ra, na ô atura, Ia tia ia oe, teie ta ˈu parau, e faaroo mai na oe ia ˈu; e hopoi atu vau i te moni na oe i taua fenua na; e rave mai hoi oe, a huna ˈtu ai au i tau vahine pohe nei i reira. 14 Ua parau maira Epherona ia Aberahama, na ô maira ia ˈna. 15 E tau tavana, a faaroo mai na ia ˈu; e hoo na na sekela ario e maha hanere i teie nei fenua; eaha râ hoi te reira ia tâua nei? a huna i to vahine pohe na. 16 Ua faaroo atura Aberahama ia Epherona; ua faito atura Aberahama i te ario na Epherona, ta ˈna i faaite maira, e ua ite atoa te mau ati Heta ra, e maha hanere sekela ario, i te moni ravea e te feia hoo ra.

17 Faariro-mau-hia ihora taua aua a Epherona i Makapela, i tei faito atoa i Mamera ra, na Aberahama ei taoˈa na ˈna: o te aua, e te ana i roto ra, e te mau raau atoa i roto i taua aua ra, e tei te hiti atoa e ati noa ˈˈe, 18 i mua i te aro o te ati Heta, e te feia atoa i na te uputa i te tomo i roto i te oire no ˈna ra. 19 E i muri aˈe i te reira, ua huna ihora Aberahama i ta ˈna vahine ia Sara i roto i te ana i te aua i Makapela, tei faito atoa i Mamera ra, (oia hoi Heberona ra,) i te fenua ra o Kanaana. 20 I haamau-papu-hia ihora hoi e te ati Heta taua aua ra, e te ana i roto ra, ei tanuraa taata na Aberahama.