Genese

TE FAATIA FAAHOU NEI TE ATUA I TA ˈNA FAUFAA IA ABERAMA, TO ˈNA IˈOA I FAAHURU-Ê-HIA.

17 E tae aˈera i te iva o te ahururaa e ma iva o to Aberama matahiti, ua fa maira Iehova ia Aberama ra, na ô maira, O vau te Atua mana hope ra; e na mua oe i tau aro ma te hapa ore ta oe. 2 I faaau na vau i te faufaa ia oe, e e faarahi roa ˈtu vau ia oe. 3 Ua tipapa ihora Aberama i raro te mata; e ua parau faahou maira te Atua ia ˈna, na ô maira, 4 Inaha, te faaau nei au i ta ˈu nei faufaa ia oe na, e e riro oe ei metua no te mau fenua e rave rahi. 5 E ore roa hoi e parau-faahou-hia o Aberama to oe iˈoa, e Aberahama râ to oe iˈoa; no te mea, e faariro vau ia oe ei metua no te mau fenua atoa e rave rahi. 6 E faarahi roa vau ia oe, faariro vau ia oe ei fenua atoa, e ei hui arii atoa te fanau ia oe. 7 E haamau maite au i ta ˈu nei faufaa ia oe, e to oe ra huaai a muri aˈe, e hope noa ˈtu to ratou mau ui, ei faufaa mauraa roa ra: e ei Atua vau no oe, e no to oe ra huaai e a muri noa ˈtu. 8 E te fenua ta oe e parahi taata ê noa na, o Kanaana taatoa ra, ta ˈu ïa e ho atu ei parahiraa mau no oe, e no to oe ra huaai a muri noa ˈtu; e ei Atua vau no ratou.

9 E ua parau maira te Atua ia Aberahama, E haapao oe i ta ˈu nei faufaa, o oe, e to oe huaai a muri atu, e hope roa ˈˈe to ratou mau ui. 10 Teie hoi ta ˈu nei faufaa na tatou, o vau, e o outou, e to oe huaai a muri atu, ta outou e haapao: O ta outou mau tamarii tamaroa atoa ra, e peritomehia ïa. 11 O te iri i mua ra ta outou e peritome i to outou na tino, ei tapao no te faufaa ia tatou nei. 12 Te mau tamarii tamaroa atoa i ǒ outou na, e peritomehia ïa, ia tae i te rui vau ra, e tae noa ˈtu i to outou mau ui atoa ra; o tei fanau i to outou iho fare, e tei hoohia i te moni i te taata ê ra, e ere i te huaai no oe ra. 13 O tei fanau i to oe iho fare, e tei hoohia i te moni na oe ra, ia peritomehia e tia ˈi; ia vai â ta ˈu ra faufaa i nia i to outou tino, ei faufaa mou ore. 14 E te tamaiti peritome-ore-hia ra, o tei ore i peritomehia i te iri i mua i to ˈna ra tino, e faataa-ê-hia oia i to ratou ra; ua hapa te faufaa na ˈu nei ia ˈna i reira.

15 E ua parau maira te Atua ia Aberahama, Area o to vahine ra, o Sari eiaha oe e parau i to ˈna iˈoa ia Sari, o Sara râ to ˈna iˈoa: 16 e e haamaitai au ia ˈna, e e horoa vau i te tahi tamaiti no oe ia ˈna, e e haamaitai atoa vau ia ˈna: e riro hoi Sara ei metua no te mau fenua, e e hui arii atoa te fanau ia ˈna no te mau fenua. 17 Ua tipapa ihora Aberahama i raro te mata, ua ata ihora, na ô aˈera i roto i to ˈna aau, E fanau anei te tamaiti ta tei hanere to ˈna matahiti? e e hapû anei Sara o tei tae i te iva o te ahururaa o to ˈna ra matahiti? 18 Ua parau atura Aberahama i te Atua, Ia ora hoi Isemaela i mua i to aro na e! 19 Ua parau maira te Atua, E tamaiti mau ta to vahine ta Sara e fanau na oe, e na oe e mairi i to ˈna iˈoa ia Isaaka; e haamau vau i ta ˈu nei faufaa ia ˈna, e to ˈna ra huaai a muri atu, ei faufaa mauraa roa. 20 Ia Isemaela ra, ua faaroo atoa vau ia oe; inaha, e haamaitai au ia ˈna e e faarahi au i ta ˈna, e ia rahi roa oia ia ˈu; e hui arii ta ˈna e fanau tino ahuru e toopiti tiahapa, e e faariro vau ia ˈna ei fenua rahi atoa. 21 E haamau râ vau i ta ˈu nei faufaa ia Isaaka, ta Sara e fanau na oe, ia tae i teie nei marama i te matahiti i mua nei. 22 Faaoti aˈera te Atua i ta ˈna parau ia ˈna, reva ˈtura i nia, faarue maira ia Aberahama.

23 Ua rave ihora Aberahama i ta ˈna tamaiti ia Isemaela, e tei fanau atoa i to ˈna ra utuafare, e tei hoohia i ta ˈna ra moni, te mau taata atoa no te utuafare no Aberahama, peritome ihora i te iri i mua o to ratou ra tino, i taua mahana ra, ta te Atua i parau mai ia ˈna ra. 24 A iva aˈera ahururaa o Aberahama matahiti e iva tiahapa peritomehia ˈi te iri mua o to ˈna ra tino. 25 E ta ˈna tamaiti hoi o Isemaela, hoê aˈera o ˈna ahuru e toru tiahapa i te matahiti i peritomehia ˈi to ˈna iri mua o to ˈna ra tino. 26 Hoê o raua mahana i peritomehia ˈi, o Aberahama, e ta ˈna tamaiti ra, o Isemaela. 27 E te mau taata atoa no to ˈna ra fare, o tei fanau i to ˈna ra utuafare, e tei hoohia i te moni i te taata ê ra, i peritome-atoa-hia ïa.