Genese

ABERAMA I TE FAAITOITORAAHIA E TE ATUA, E TAMAITI TEI FAAITEHIA MAI NA ˈNA.

15 E muri aˈe i te reira, o te reo maira o Iehova ia Aberama i te orama ra, i te na ôraa mai e, Eiaha e mǎtaˈu, e Aberama, o vau to oe paruru; e ta oe utua rahi roa. 2 Ua parau atura Aberama, E te Fatu, e Iehova, eaha ta oe e ho mai no ˈu, teie hoi au a pohe ma te tamarii ore, e te tiaau no to ˈu nei utuafare, o Eliezera nei ïa no Damaseko ra. 3 E ua na ô atura Aberama, Inaha hoi au, aita o ˈu e huaai ho-mai-hia mai e oe, e inaha, e riro te hoê tamaiti i fanau i to ˈu nei utuafare ei taata aiˈa no ˈu. 4 E inaha, o te reo maira o Iehova ia ˈna, na ô maira, E ore teie taata e riro ei taata aiˈa no oe, e riro râ te hoê taata no roto i to oe iho opu ei taata aiˈa no oe. 5 Ua aratai aˈera oia ia ˈna i te vahi atea, na ô maira, A hiˈo na to mata i nia i te raˈi, a taio na i te mau fetia, i te tiaraa ia oe ia taio. E ua na ô maira oia ia ˈna, Oia atoa to oe na huaai. 6 Ua faaroo atura Aberama ia Iehova; e ua faariro atura oia i te reira ei parau-tia na ˈna. 7 E ua parau maira oia ia ˈna, O vau o Iehova, o tei aratai mai ia oe mai Ura mai, mai ô te Kaladaio ra, e horoa i teie nei fenua ei parahiraa no oe na. 8 Ua parau atura râ oia, E te Fatu, e Iehova, eaha te mea e ite ai au e, e noaa ia ˈu? 9 Ua parau maira oia ia ˈna, A putô mai i te hoê puaatoro ufa matahiti toru ra, e te hoê puaaniho ufa matahiti toru ra, e te hoê mamoe pae matahiti toru ra; e te hoê uupa, e te tahi uuairao. 10 Ua hopoi maira oia i taua mau mea atoa ra ia ˈna ra, ua vahi ihora na ropu e piti vehea, tuu ihora i te tahi vehea i te tahi pae, e te tahi vehea i te tahi pae, e faito aˈera; area na manu ra, aita oia i vahi i te reira. 11 E ia tau mai te mau manu taehae i nia iho i taua mau puaa ra, ua tiahi atura Aberama. 12 E te mairi atura te mahana i raro, roohia ihora Aberama i te taoto rahi; e inaha! i roohia atoa ihora oia i te horiri, e te pouri rahi. 13 Ua parau maira oia ia Aberama, E riro mau to oe huaai ei purutia i te fenua no vetahi ê, e haafao mai taua fenua ra ia ratou, e e hamani ino mai, e e maha atoa hanere i te matahiti, ia ite mai hoi oe. 14 Area taua fenua e haafao ia ratou ra, na ˈu ïa faautua ˈtu; e muri aˈera, e haere ê mai ïa ratou ma te taoˈa rahi. 15 E reva râ oe i ǒ to mau metua ra ma te hau; ia ruhiruhia roa oe e tanuhia ˈi. 16 E ia tae i te maha o te ui e hoˈi mai ai ratou i ǒ nei; aita hoi i navai roa te hara a te ati Amori ra. 17 E mairi atura te mahana, e pouri atura, inaha, e au auahi mai to te umu ra, e te rama ura tei na ropu i taua na apaapa puaa ra. 18 Ua fafau ihora Iehova i te faufaa ia Aberama i taua mahana ra, na ô maira, E horoa vau i teie nei fenua no to oe ra huaai, e moti i te pape i Aiphiti e tae noa ˈtu i te pape rahi ra o Eupharate, 19 te fenua o te ati Keni, e to te Kenizi, e te Kadamoni, 20 e te ati Heta, e te Perezi, e te ati Raphai, 21 e te ati Amori, e te ati Kanaana, e te ati Geregasi, e te ati Iebusi ra.