Genese
TE HUAAI O NOA RA, TE MAU TAMARII A IAPHETA, TE MAU TAMARII A HAMA RA.
10 O te huaai teie o te tamarii a Noa ra; o Sema, o Hama, e o Iapheta: ta ratou tamarii i fanau i muri aˈe i te diluvi ra.
2 O ta Iapheta ra tamarii tamaroa, o Gomera ïa, e o Magoga, e o Medai, e o Iavana, e o Tubala, e o Meseka, e o Tirasa. 3 E o ta Gomera tamarii tamaroa, o Asekeneza ïa, e o Riphata, e o Togarama. 4 E o ta Iavana tamarii tamaroa, o Elisa ïa, e o Taresisa, e o Kitima, e o Rodanima. 5 No teie nei feia to te mau fenua i motu ê ra, to ratou reo ê, e to ratou fetii ê, to ratou fenua ê.
6 E o ta Hama tamarii tamaroa, o Kusa ïa, e o Mizeraima, e o Phuta, e o Kanaana. 7 E o ta Kusa tamarii tamaroa, o Seba ïa, e o Havila, e o Sabata, e o Raama, e o Sabateka; e ta Raama tamarii tamaroa, o Seba ïa, e o Dedana. 8 Fanau aˈera ta Kusa o Nimeroda; riro atura oia ei taata mana i te ao nei: 9 e taata rahi haharu hoi oia i mua i te aro o Iehova: oia tei parauhia ra e, mai ia Nimeroda haharu rahi i mua i te aro o Iehova ra. 10 E te tupuraa o to ˈna ra basileia, o Babela ïa, e o Ereka, e o Akada, e o Kalane, i te fenua ra o Sinara. 11 Mai reira hahaere atura oia i Asura, faatia ihora i te oire ra ia Nineve, e te oire ra ia Rehobota, e Kala, 12 e Resina i ropu i te area i te oire rahi ra o Nineve, e o Kala ra. 13 To Mizeraima ra huaai, o te ati Luda ïa, e te ati Anami, e te ati Lehabi, e te ati Naphetuhi, 14 e te ati Phaturesi, e te ati Keseluhi, no ˈna te ati Philiseti, e te ati Kaphatori.
15 Fanau aˈera ta Kanaana o Sidona, o ta ˈna ïa matahiapo, e o Heta, 16 e te ati Iebusi, e te ati Amori, e te ati Geregasi, 17 e te ati Hevi, e te ati Araki, e te ati Sini, 18 e te ati Aravadi, e te ati Zemari, e te ati Hamati; e muri aˈera, purara ê atura te mau fetii ati Kanaana ra. 19 E to te ati Kanaana otia, mai Sidona ïa, ia haere tia i Gera ra, e Gaza ra; a haere tia ˈtu ai i Sodoma, e Gomora, e Adama, e Zeboima, e tae noa ˈtu i Laasa.
20 O ta Hama eie pue tamarii, to ratou mau fetii, to ratou reo, to ratou fenua, e to ratou nunaa.
21 E e tamarii atoa ta Sema, ta te tuaana o Iapheta, e metua hoi no te mau tamarii atoa a Ebera ra. 22 Ta Sema pue tamarii tamaroa ra, o Elama ïa, e o Asura, e o Araphakesada, e o Luda, e o Arama. 23 E ta Arama tamarii tamaroa, o Uza ïa, e o Hula, e o Getera, e o Meseka. 24 E fanau aˈera ta Araphakesada, o Sala; fanau aˈera ta Sala, o Ebera. 25 Fanau aˈera ta Ebera pue tamarii tamaroa toopiti: o Pelega te tahi i te iˈoa, no te mea tei to ˈna ra anotau te ootiraahia te fenua nei: e o Iokatana te iˈoa o to ˈna tuaana. 26 Fanau aˈera ta Iokatana o Alemodada, e o Selepha, e o Hazaramaveta, e o Iera, 27 e o Hadorama, e o Uzala, e o Dikela, 28 e o Obala, e o Abimaela, e o Seba, 29 e o Ophira, e o Havila, e o Iobaba. Na Iokatana anaˈe ïa tamarii. 30 E te otia o to ratou parahiraa ra, mai Mesa ˈtu ïa e tae noa ˈtura i te mouˈa ra o Separa, i te pae i te hitia o te râ ra. 31 O ta Sema eie pue tamarii, to ratou mau fetii, e to ratou reo, to ratou mau fenua, e to ratou nunaa.
32 O na fetii hoi eie o na tamarii a Noa ra, i to ratou ra fanauraa, i to ratou ra mau fenua; e ia ratou ra te taaraa te mau nunaa o te ao nei i muri aˈe i te diluvi ra.