Sabudu, 18 ya Abriri
Kana munhu akaita citema, tino mubetseri.—1 Juau 2:1.
Cisananguro cinokosha maningi cekuti munhu wese angakwanisa kuita, ngece kudzipira kuna Djehovha uye Kumuseenzera pamwepo no hama dzedu. Djehovha anoda kuti anhu ese aite izvona. Ngei? Djehovha anoda kuti tigare shamwari dzake uye tirarame nokusikaperi. (Dhe. 30:19, 20; Aga. 6:7, 8) Asi Djehovha aabambidziri kuti munhu amuseenzere. Iyena anosiya kuti munhu umwe na umwe asanangure zvaacaita. Hino kana Mukristu akabhabhatidzwa akatama kutondowedza mutemo wa Djehovha uye oita citema cakakura? Kana iyena akatama kucinyuka, anodikana kubviswa mu ungano. (1 Ako. 5:13) Kunyazi izvona zvikaitika, Djehovha anoetsera no mwoyo wese kuti munhu uya anonga aita citema ahwirire Kaari. Zvezvirokwazvo, ici ndi cimwe ce cikonzero cakakura cakaita kuti Djehovha atipase rusudzunuro—kuti zviite nyore kurekererhwa ke ashaishi anocinyuka. Djehovha ndi Mwari ano rudo uye anoda maningi kuti ashaishi acinyuke.—Zak. 1:3; Aro. 2:4; Tig. 4:8. w24.08 paji. 14 mandi. 1-2
Biningu, 19 ya Abriri
Kana mwoyo wako ukagara no ungwaru, mwoyo wangu ucapfara.—Zvie. 23:15.
Panguwa yaakatara muphostori Juau tsamba yake yocitatu, anhu anganani aiedza kubararisa fundiso dzokunyepa uye eciita kuti muoneke dambudziko mu ungano. Asi zvinopfadza ngezve kuti amweni airumbwa “ecihamba mu cokwadi.” Awona aizwira Djehovha uye airumbwa “ecihamba maererano no mitemo yake.” (2 Juau 4, 6) Anarume aya akatendeka aipfadza maningi haiwa basi mwoyo wa Juau asiwo wa Djehovha. (Zvie. 27:11) Tingafundei? Kugondeka kunounza mupfaro. (1 Juau 5:3) Ngo muezaniso, isusu tinopfara maningi nge kuziya kuti tinopfadza mwoyo wa Djehovha. Djehovha anopfara maningi paanotiona tecikwanisa kuramba miedzo ye nyika ino uye tozwira mitemo yake. Ngirozi kudenga dzinopfarawo maningi ndizvo. (Ruka 15:10) Isusu tinopfarawo maningi patinoona hama dzedu dzecirumbwa dzakatendeka. (2 Ate. 1:4) Nyika ya Sathani paicatsakatiswa isusu ticagara no mupfaro we kuziya kuti takwanisa kugara takatendeka kuna Djehovha dakara kumugumo. w24.11 paji. 12 mandi. 17-18
Ciposi, 20 ya Abriri
Umwe na umwe aadikani kurumbwa ecipsvaka zvakamunakira basi, asi zvakanakirawo amweni.—1 Ako. 10:24.
Hino mungatora nguwa yakareba kudini meciongora munhu ngece kure musati mamubvunza kuti muri kumupfarira? Kana imwimwi mukareketa nokukasika zvicaita kuti munhuwo arangarire kuti imwimwi muri munhu unoreketa zviro asikazi kurangarira. (Zvie. 29:20) Asi, kana mukanonoka maningi zvingaita kuti munhuwo arangarire kuti imwimwi amucizii camuri kuda maka-maka kana munhuwo aakuziya kuti imwimwi muri kumuda. (Mup. 11:4) Musakanganwe kuti imwimwi amudikani kugara no rugondo rokuti mucacata no munhuwo musati maenda kooreketa naye. Asi munodikana kugara no rugondo rokuti imwimwi makagadzirira kucata uye kuti munhuwo uno mawara amuri kuda. Uye kana imwimwi mukaziya kuti pano munhu ari kumudai? Kana imwimwi musikamudi nyasai kudjekesa no maitiro enyu. Zvaizonga zvakashata kamuri kuita kuti munhuwo arangarire kuti imwimwi munomudawo nepoo imwimwi amuna mazwiro awona.—Aef. 4:25. w24.05 mapaji. 22-23 mandi. 9-10