EBIKAGUZO KURUGA OMU BASOMI BAITU

Nkooku kyolekerwe omu Abagaratiya 4:24, biragaano ki bibiri omukwenda Paulo ebi akaba naabazaaho?

Omukwenda Paulo akabazaaho enkoragana Ibburahimu ei akaba aine na Saara hamu na Hagara. Akagamba ati: “Ebintu binu by’akokurorraho habwokuba abakazi banu, nibamanyisa ebiragaano bibiri.” (Bag. 4:22-24) Kara, Abakaiso ba Yahwe baateekerezaaga ngu ebiragaano binu bibiri bikaba nibimanyisa ekiragaano eky’Ebiragiro n’ekiragaano ekihyaka. Baitu, hanyuma y’okweyongera kwekibiija kurungi enkarra zinu, nitwikiriza ngu enkarra zinu nizimanyisa ekintu ekirukwahukana. Nikisobora kuba ngu Paulo akaba naamanyisa ekiragaano ekya Ibburahimu hatali ekiragaano ekihyaka. Zinu nizo zimu ha nsonga habwaki yagambire ati.a

Paulo akalengesaniza omukazi omuzaana ow’arukwetwa Hagara, n’Orusozi Sinai. (Bag. 4:25) Hagara akaba naamanyisa ekiragaano ky’Ebiragiro ebyahairwe ha Rusozi Sinai omu mwaka gwa 1513 Y.A. (Kurug. 19:5, 6) Abayudaaya bakaba bali bantu abatahikiriire, nahabweki, baali batasobora kworobera Ebiragiro ebi kikumi ha kikumi. Nahabweki, ekiragaano eki kyaijukyaga Abaisaleeri ngu bakaba bali bairu b’ekibi. Ebiragiro ebi byakukoonyiire Isaleeri kumanyirra Masiya, habwokuba nuwe muntu wenka ayaakusoboire kuhondera Ebiragiro ebi kikumi ha kikumi. Masiya obu yahaireyo obwomeezi bwe obuhikiriire, kikasobozesa abantu abatahikiriire kuruga omu bwiru bw’ekibi n’okufa. (Bag. 3:19, 24, 25) Yesu obu yamazire kuhikiiriza ekigendererwa kya Ruhanga, Ebiragiro byali bitakyayetaagwa.—Bar. 10:4.

Paulo akalengesaniza Hagara na Saara, ‘omukazi ow’obugabe’ ayazaire “kuraba omu murago.” (Bag. 4:23) Omurago ogu gukaba ekiragaano kya Ibburahimu. (Bag. 3:29; 4: 28, 30) Yahwe akakora ekiraagano eki na Ibburahimu. Yahwe akabazaaho ekiragaano kinu omu Okubanza 22:18 ati: “Kandi omu baijukuru [ba Ibburahimu] amahanga gona agomu nsi numwo galiherwa omugisa; baitu ohuliire iraka lyange.”

Ekiragaano eki ekyakozerwe na Ibburahimu kikongeraho ekyererezi ha murago gwe ogu yakozere omu Edeni. (Kub. 3:15) Kikooleka ngu “oruzaaro” orwaraganiziibwe rwakurugire omu ruzaaro rwa Ibburahimu. Paulo akasoborra ngu “oruzaaro” runu rwali nirumanyisa Yesu Kristo. Baitu abo ‘abali ba Kristo,’ 144,000 abarukwija kulema na Yesu omu Bukama bwe, na bo bali kicweka ky’oruzaaro oru orw’embaganiza. (Bag. 3:16, 29; Kus. 14:1-3) Kuhikirra kw’omurago gwa Ruhanga hali Ibburahimu, nikiija kurugirramu abo abahuliiriza kandi bakoorobera Yesu Kristo emigisa.

Habwaki Paulo yakozeseze “ebintu binu [eby’akokurorraho]”? Akooleka ngu Abayudaaya ab’omu kasumi ke, baakwikaire nk’abairu, nka Hagara, kakuba baagumiizeemu nibahondera Ebiragiro. Baitu kakuba baikiriize “oruzaaro” orukuru orwa Ibburahimu, Yesu Kristo, n’abo baakulekiirwe kuruga omu kibi nka Saara. Baakutungire obugabe kuruga omu kibi n’okufa. (Yoh. 8:32-34) Kakuba bataraikiriize Yesu Kristo, baakuferiirwe ekigendererwa ekikuru eky’ekiragaano eky’Ebiragiro, ekikaba kiri ky’okubahikya hali Kristo.

Baingi h’Abagaratiya Paulo abayahandiikiire bakaba batali Bayudaaya kandi bakaba batakabaga hansi y’Ebiragiro. Bamu h’Abayudaaya bakaba nibagonza Abakristaayo abatali Bayudaaya boorobere Ebiragiro, otwaliiremu n’okusarwa. Paulo akasoborra kurungi ngu kyali kitali ky’amagezi bo kuba ‘abairu’ b’Ebiragiro habwokuba bakaba bafookere ira “b’obugabe” habw’okwikiriza Kristo.—Bag. 5:1, 10-14.