Musa Akacwamu Kuramya Yahwe

Eka ya Yakobo obw’ekaba eri omu ihanga lya Misiri, bakamanywa nk’Abaisareri. Hanyuma ya Yakobo na Yusufu kufa, Misiri ekatunga Faraho omuhyaka. Akatiina muno habwokuba Abaisareri bakaba nibeyongera omu muhendo kukira Abamisiri. Nahabweki Faraho onu omuhyaka, akafoora Abaisareri bairu. Akabahambiriza kukora amatafali n’okukora muno omu misiri yabo. Abamisiri obu bayongeraga kubonabonesa Abaisareri nibagonza kubamaraho, omuhendo gw’Abaisareri gwayeyongeraga kukanya. Faraho obuyaboine omuhendo gwabo nigweyongera bweyongera, akaragira abaana b’Abaisareri boona abarazarwaga bali boojo, baitwe. Nosobora kutekereza ha mulingo Abaisareri batiinire muno?

Omukazi Omwisareri ayayetwaga Yokebedi akazaara omwana omwojo omurungi muno. Kusobora kumulinda batamwita, akamuta omu kigega yakisereka omu Kyambu Nilo. Munyaanya arukwetwa Miryamu akaikara haihi nukwo arole ekirabaho.

Muhara wa Faraho obuyaizire ha kyambu kwoga, akarora ekigega ha maizi. Obu yakisukwire, akasangamu omwana kandi y’amukwatirwa embabazi. Miryamu akamukaguza ati: ‘Wakugondeze nkuserurre omukazi arukusobora kukukonyera kurolerra omwana onu?’ Muhara wa Faraho obuyaikiriize, Miryamu akagenda yaleta Yokebedi nyina mwana wenyini. Muhara wa Faraho akamugamba ati: ‘Twara omwana onu omurolerre nukwo ndakusasuraga omusaara.’

Omwana obuyakuzire, Yokebedi akamuleta hali muhara wa Faraho, ayamurukire ibara lya Musa kandi yamukuza nka mutabani we. Musa akakura nk’omubiito kandi yatungaga buli kimu kyona ekiyagonzaga. Baitu Musa atebwe Yahwe. Akaba akimanyire ngu abazaire be tibali bantu b’ihanga lya Misiri baitu Baisareri. Kandi akacwamu kuramya Yahwe.

Obu yahikize emyaka 40, Musa akacwamu kukonyera abantu be. Obu yarozere omusaija wa Misiri n’atera omwiru Omwisareri, Musa akatera omusaija wa Misiri yamwita. Musa akaziika omutumbi omu musenyi. Faraho obu yakyetegeriize, akagonza kwita Musa. Baitu Musa akairuka yagenda omu nsi ya Midiani. Yahwe akamurolerra obwakaba ali omu nsi enu.