Malyamu Nuwe Nyina Ruhanga?
Eky’okugarukamu kuruga omu Baibuli
Nangwa, Baibuli teyegesa ngu Malyamu nuwe nyina Ruhanga, kandi tegamba ngu Abakristaayo basemeriire kumuramya rundi kumutamu ekitiinisa eky’amaani.a Teekerezaaho ebintu binu:
a Amadiini maingi geegesa ngu Malyamu nuwe nyina Ruhanga. Gamubazaaho ‘nk’Omukama-Omukazi-Wiguru’ rundi nka Theotokos, ekigambo eky’Oruyonaani ekimanyisa “Omuzaire-wa-Ruhanga.”
● Malyamu atagambe ngu nuwe nyina Ruhanga. Baibuli esoborra ngu akazaara “Omwana wa Ruhanga,” hatali Ruhanga wenyini.—Marako 1:1; Luka 1:32.
● Yesu Kristo atagambe ngu Malyamu nuwe nyina Ruhanga kandi ngu asemeriire kuheebwa ekitiinisa eky’embaganiza. Ekindi, Yesu akahabura omukazi ayarozere omulimo gwa Malyamu ogw’okuzaara Yesu nk’ogw’embaganiza muno obuyamugambiire ati: “Okukira, banyina omugisa abarukuhurra ekigambo kya Ruhanga nibakikwata!”—Luka 11:27, 28.
● Ebigambo “Nyina Ruhanga” hamu na “Theotokos” (Omuzaire-wa-Ruhanga) tibirukusangwa ahantu hoona omu Baibuli.
● Omu Baibuli, ebigambo “Omukama-Omukazi-Wiguru” tibimanyisa Malyamu, baitu bimanyisa ruhanga omukazi ow’ebisuba ayaramibwaga Abaisaleri abakafiiri. (Yeremiya 44:15-19) “Omukama-Omukazi-Wiguru” n’asobora kuba akaba ali Ishtar (Astarte), ruhanga omukazi ow’Abababuroni.
● Abakristaayo abaakara bataramye Malyamu, kandi batamutemu ekitiinisa eky’embaganiza. Omunyabyafaayo omu nagamba ngu Abakristaayo abaakara “bakanga okuramya okw’ebisuba kandi nibasobora kuba baatinaga ngu kuha Malyamu ekitiinisa ekitamusemeriire kyakwolekere ngu batandikireho okuramya kwa ruhanga omukazi.”—In Quest of the Jewish Mary.
● Baibuli egamba ngu Ruhanga aikaireho kuruga kara na kara. (Zabuli 90:1, 2; Isaya 40:28) Nk’oku Ruhanga atarabaire n’entandikwa, tasobora kuba na nyina. Kwongerraho, Malyamu akaba atasobora kuhimba Ruhanga omu nda ye; Baibuli eyoleka kurungi ngu n’iguru tasobora kulihikamu.—1 Ekyabakama 8:27.
Malyamu—Nyina Yesu hatali “Nyina Ruhanga”
Malyamu akazaarwa ali Muyudaaya, kandi akaba ali mwijukuru w’Omukama Daudi. (Luka 3:23-31) Akaheebwa omugisa ogw’embaganiza kuruga hali Ruhanga habw’okwikiriza kwe n’okuheereza Ruhanga n’omutima gwe gwona. (Luka 1:28) Ruhanga nuwe yamukomeremu kuba nyina Yesu. (Luka 1:31, 35) Uwe na musaija we Yusufu bakazaara abaana abandi.—Marako 6:3.
N’obukiraaba ngu Baibuli eyoleka ngu Malyamu akafooka mwegeswa wa Yesu, ebirukumukwataho ebimanyirwe bike muno.—Engeso Ezabakwenda 1:14.
Habwaki abamu bagamba ngu Malyamu nuwe nyina Ruhanga?
Obwakaiso nibwoleka ngu abantu bakatandika kuramya Malyamu ekyasa ekyakana obukikaba kiri haihi kuhwaho. Omu kasumi ako, Ediini y’Abakatuliki niyo yafookere nkuru omu bulemi bwa Rooma. Ekyarugiremu, abaingi abakaba bali bakafiiri bakefoora Bakristaayo. Ekindi, ediini y’abakatuliki ekaba ekurakuraniize n’enyegesa ey’obusatu ey’etarukusigikirra ha byahandiikirwe.
Enyegesa ey’Obusatu ekaleetera baingi omu diini enu kumalirra nibagamba ngu Yesu obw’araaba ali Ruhanga, Malyamu asemeriire kuba nuwe nyina Ruhanga. Omu mwaka gwa 431 Y.A.K, orukurato rw’ekeleziya omu Efeso rukarangirra omu butongole ngu Malyamu nuwe “Nyina Ruhanga.” Enyikiriza ey’okuramya Malyamu ekeyongera hanyuma y’okwikarra kw’Orukurato runu omu Efeso. Abakafiire obubaayeyongiire kutaaha omu keleziya, ebisisani bya Malyamu Empikiire bikatandika kukozesebwa mpora mpora omu kiikaro ky’ebisisani by’abaruhanga baabo abarukugaba oruzaaro nka Atemi (Abarooma oubayetaga Diana) hamu na Isis.
Omu mwaka gwa 432 Y.A.K., Papa Sixtus III akaragira ngu ekeleziya eyombekwe omu Roma nk’akokurorraho ak’okutamu ekitiinisa “Nyina Ruhanga.” Ekeleziya enu ekombekwa haihi n’ekiikaro nambere hakaba hali yekaru ya ruhanga w’Abarooma ow’oruzaaro arukwetwa Lucina. Omu h’abahandiiki b’ebitabu akabazaaho ekeleziya enu ‘nk’akokurorraho ak’orutekerro akarukwoleka ngu obukatuliki bukatandikaho okuramya Malyamu omu kiikaro kya ruhanga ow’ebisuba ow’arukwetwa Lucina.’—Mary—The Complete Resource.