Abakaiso ba Yahwe Baikiririza omu Ndagaano Enkuru?

Ego. Abakaiso ba Yahwe baikiriza ngu Baibuli yoona ‘ekahandiikisibwa Ruhanga kandi n’egasa.’ (2 Timoseo 3:16) Eki nikitwarramu Endagaano Enkuru n’Endagaano Empyaka, nk’oku baingi bakira kuzeeta. Ebicweka binu ebya Baibuli Abakaiso ba Yahwe bakira kubyeeta Ebyahandiikirwe eby’Oruheburaniya n’Ebyahandiikirwe eby’Oruyonaani. Omu mulingo ogu, twetantara kuleetera abantu kutekereza ngu ebicweka ebimu ebya Baibuli bikahwa ha mulembe rundi tibikyali bikuru.

Habwaki Abakristaayo nibetaaga Endagaano Enkuru n’Endagaano Empyaka?

Omwoyo ogurukwera gukaterekereza omukwenda Paulo kuhandiika ati: “Byona ebyahandikirwe ira, bikahandikwa obwokwegesa itwe.” (Abarumi 15:4) Nahabweki omu Byahandiikirwe eby’Oruheburaniya harumu obutumwa oburukutugasira. Eki nikitwarramu ebintu ebyabaireho ebitusemeriire kumanya hamu n’obuhabuzi obusobora kutukonyera omu bwomeezi.

• Ebintu ebyabaireho ebiturukwetaaga kumanya. Ebyahandiikirwe eby’Oruheburaniya nibibazaaho omu bwijwire nk’oku ebintu byahangirwe n’omulingo omuntu yagwire omu kibi. Kakuba ebintu ebi bitarahandiikirwe, twakubaire tutaine eby’okugarukamu ebirukunanura eby’ebikaguzo nka: Tukaruga nkaha? Habwaki abantu bafa? (Okubanza 2:7, 17) Ekindi, Ebyahandiikirwe eby’Oruheburaniya nibibazaaho enkoragana ya Ruhanga n’abantu abaatungire okusemererwa n’emitalibaine nk’eyaitu.—Yakobo 5:17.

• N’obuhabuzi obusobora kutukonyera omu bwomeezi. Ekitabu eky’Omugambizi n’Enfumo ebiri kicweka ky’Ebyahandiikirwe eby’Oruheburaniya birumu obuhabuzi n’amagezi agatukonyera omu bwomeezi obwa buli kiro kandi ebitahwa ha mulembe. Birumu amagezi agasobora kutukonyera kuba n’amaka agarumu okusemererwa (Enfumo 15:17), omulingo tusobora kuba n’entekereza ey’ehikire obukirukuhika ha mirimo (Enfumo 10:4; Omugambizi 4:6), n’omulingo ensinganto basobora kukozesa emyaka yabo ey’obuto kandi bakatunga okusemererwa (Omugambizi 11:9–12:1).

Ekindi, nitusobora kugasirwa omu kusoma Ebiragiro bya Musa ebirukusangwa omu Torah (ebitabu bitaano ebirukubanza omu Baibuli). N’obukiraaba ngu Abakristaayo tibakyali hansi y’Ebiragiro binu, harumu emisingi ey’etukonyera kuba n’obwomeezi oburumu okusemererwa.—Ebyabalevi 19:18; Ekyebiragiro 6:5-7.