AGUSTO 31–SEBUTEMBA 6, 2026
EKIZINA 89 Hurra, Ote omu Nkora, Nukwo Otunge Emigisa
Taho Omutima Obu Oraaba Oli omu Nsorrokano
“Mwegendereze omulingo muhuliirizaamu.”—LUK. 8:18.
EBI TURAAYEGA
Nitwija kurora ensonga habwaki tusemeriire kwikara nituhuliiriza n’obwegendereza obu turukuba tuli omu nsorrokano, hamu n’omu enteekaniza ezindi ez’eby’omwoyo n’omulingo tusobora kukikora.
1-2. (a) Kasumi kanu, Yahwe ahikyaho ata abantu be ebyetaago byabo eby’omwoyo? (Zabbuli 23:1, 2, 5) (b) Biki ebi turukugenda kubazaaho ebirukukwata ha nsorrokano zaitu ez’ekitebe?
KASUMI kanu, Yahwe naatuha ebyokulya bingi eby’omwoyo. Hataroho kugurukyagurukya, nitwikirraniza na Daudi, ayagambire ati: “[Yahwe] nuwe mulisa wange; tindiseega.”—Soma Zabbuli 23:1, 2, 5.
2 Omulingo gumu Yahwe ogu atuhamu ebyokulya by’omwoyo, nugwo kuraba omu nsorrokano zaitu ez’ekitebe. Omu nsorrokano tweijukyamu ebintu ebi twayegere kara. Noobu tuba ‘tugumiire omu mananu aga twayegere,’ nitwetaaga kwikara nitwijukibwa. (2 Pet. 1:12) Baitu, obwire obumu obu ohurra ebintu omu nsorrokano ebi wayegereho kara emirundi nyingi, kikugumira kutaho omutima okahuliiriza? Ekicweka kinu nikiija kukukoonyera. Nitwija kubazaaho ensonga habwaki nitwetaaga kuhuliiriza n’obwegendereza omu nsorrokano. Nitwija n’okuroraomulingo abo abeebembera ensorrokano basobora kukoonyera abandi kubahuliiriza. Nitwija n’okubazaaho amagezi agasobora kutukoonyera kweyongera kuba bantu abarukuhuliiriza kurungi. Baitu leka tubanze twetegereze nooha aba naatwegesa obu tuba omu nsorrokano.
IJUKA NGU YAHWE NUWE ARUKUTWEGESA
3. Yahwe abaza ata na itwe, kandi abaheereza be bakozesa bata Ekigambo kye obu baba nibeegesa?
3 Yahwe abaza na itwe naakozesa Ekigambo kye, Baibuli. (2 Tim. 3:16, 17) Kandi eki Yesu akaba akimanyire. Akakozesa kurungi Ekigambo kya Ruhanga ekyaleetiire abo abakaba nibamuhuliiriza kukaguza bati: “Omusaija onu akamanya ata kurungi Ebyahandiikirwe kandi kunu ategesebwe omu masomero g’ediini?” (Yoh. 7:15) Abantu abakaba baine emitima enungi bakasemererwa obu baahuliire Yesu naasoborra Ekigambo kya Ruhanga. Abakristaayo ab’omu kyasa ky’okubanza nk’omukwenda Paulo na Apolo, na bo baajulizaaga omu byahandiikirwe obu baabaga nibahingisaniza ebiteekerezo n’abantu abandi. (Ebik. 17:2, 3; 18:24, 28) Itwe nk’Abakaiso ba Yahwe tukimanyire ngu ebi twegesa omu bitabu, broadcasts, embazo hamu na vidiyo bisigikirra ha Baibuli. Abantu ababaho omu nsorrokano omurundi gwabo ogw’okubanza, bakwatwaho omulingo abantu ba Yahwe bakozesaamu Baibuli omu nsorrokano zaabo. Abo ababa baine ebicweka omu nsorrokano, beegesa nibasigikirra ha Baibuli. Tibagarukira ha kusoma Baibuli kyonka, baitu bakoonyera buli omu kugyetegereza n’okumanya omulingo basobora kuteeka omu nkora eki erukugamba.—Luk. 24:32.
4. Ebigambo “hurra” na “huliiriza” nibimanyisa ki?
4 Ebigambo “hurra” na “huliiriza” bikira muno kukozesebwa omu Baibuli kumanyisa kworobera omuntu. Nahabweki, Yahwe obu abaza na itwe kuraba omu Kigambo kye tuli omu nsorrokano kandi tukeetegereza ebi agonza kitwanguhira kumworobera. Nitukigumya ngu kisemeza Yahwe obu tumuhuliiriza kandi tukateeka omu nkora ebi atwegesa.—Nfu. 27:11.
HABWAKI TUSEMERIIRE KUHULIIRIZA N’OBWEGENDEREZA OBU TUBA TULI OMU NSORROKANO?
5. Okugonza kwaitu hali Yahwe kutuleetera kukora ki? (Yohaana 4:23, 24; 1 Yohaana 5:3)
5 Tuhuliiriza omu nsorrokano, habwokuba tugonza Yahwe. (Mat. 22:37) Obu tweyongera kwega hali Yahwe, n’okugonza oku tumwiniire kweyongera. Okugonza oku kutuleetera ekihika eky’okugonza kumuhuliiriza, kumworobera, n’okumuramya omu mulingo ogusemeriire nkooku kyolekerwe omu Kigambo kye.—Soma Yohaana 4:23, 24; 1 Yohaana 5:3.
6. Bintu ki ebi twega omu nsorrokano zaitu ebirukukwata ha mulingo tusobora kukoonyeramu abantu abandi?
6 Tuhuliiriza omu nsorrokano, habwokuba tugonza abantu. (Mat. 22:39) Omu nsorrokano zaitu, Yahwe atwegesa omulingo tusobora kukoonyera ab’oruganda na banyaanya itwe hamu n’abantu abatakamumanyire. Ekyokurorraho, burocuwa Gonza Abantu Obafoole Abegeswa—etukoonyiire kukurakuraniza emiringo enungi ey’etugasira omu buhereeeza. Kikugumira kutandika kubaza n’abantu nookozesa embaza yaawe eya buli kiro? Obu kiraaba nukwo kiri, teeka omutima ha mulingo ab’oruganda na banyaanya itwe baha embazo zaabo omu kicweka ky’abeegi, ekibaho omu nsorrokano eza hagati omu wiiki.
7. Habwaki kikuru muno kwikara nituhuliiriza Yahwe?
7 Tuhuliiriza omu nsorrokano, habwokuba tugonza obwomeezi. Kworobera Ekigambo kya Ruhanga kitukoonyera kuba n’obwomeezi oburungi nkooku kyakoonyiire abahereeza be aba kara. (Bir. 32:44-47) Obu tuhuliiriza kurungi omu nsorrokano, tugarurwamu amaani, kandi eki kitukoonyera kugumiisiriza enyikara ezigumangaine n’okwikara tulindiriire ensi empyaka. (Bar. 8:25) Kuhuliiriza Yahwe kasumi kanu kikuru muno habwokuba tuli omu biro bya ha mpero kandi tusemeriire kwikara tuli bulindaara omu by’omwoyo.—Mat. 24:42-44; Kus. 1:3.
OMULINGO TUSOBORA KUKOONYERA ABANDI KUHULIIRIZA OMU NSORROKANO
8. Habwaki ab’oruganda abarukuha embazo basemeriire kusemezaamu omulingo beegesa?
8 Ab’oruganda abaha embazo kukira muno abaha embazo za boona, basemeriire kwikara nibasemezaamu omulingo babazaamu. Orubazo oruteekaniziibwe kurungi orukusigikirra ha Baibuli, nirusobora kukoonyera abatali Bakristaayo kwega amananu n’okukoonyera Abakristaayo kwikara omu mananu. Nahabweki, abo abaine ebicweka omu nsorrokano basemeriire kwijuka ngu ebicweka byabo nibisobora kukoonyera abantu abandi kukira nkooku barukuteekereza. Obu oraaba oine obujunanizibwa obu, teekerezaaho omulingo osobora kuta omu nkora amagezi ganu omu mbazo zaawe. Noobu kiraaba ngu amagezi ganu nigakoonyera muno abo abaha embazo za boona, nigasobora n’okukoonyera ogu weena ow’aine orubazo rundi ekicweka omu nsorrokano.—2 Tim. 4:2; Tit. 1:9.
9. Habwaki kikuru kuha orubazo orwanguhire kuhondera n’okwetegereza?
9 Bazaaho ensonga zaawe omu mulingo ogwanguhire kwetegerezebwa. Obu orukuba nooha orubazo, ogonza abantu bahondere kurungi ebi orukwegesa. Abarukukuhuliiriza nibasobora kuhuguka kakuba okozesa ebigambo ebigumangaine muno omu rubazo rwawe. Kiki ekiraakukoonyera kuha orubazo orukwetegerezebwa kurungi? Teekerezaaho emiringo enu: (1) Kurugira kimu ha kutandika, lengaho kwoleka ensonga enkuru ezi orukugenda kubazaaho omu rubazo rwawe. (2) Buli nsonga gibazeeho omu bwire bwayo kandi, culeeramu kake hanyuma y’okumara kubazaaho ensonga enkuru, kandi omu mulingo ogurukwetegerezebwa kurungi bazaaho ensonga enkuru erukwongeraho. (3) Bazaaho omu bugufu ensonga enkuru obu oraaba noomalirra.
10. Habwaki kikuru kugonza ensonga ezi orukugenda kubazaaho omu rubazo rwawe?
10 Gonza ensonga enkuru ezi orukugenda kwegesaaho omu rubazo rwawe. Obu oraagonza isomo orukugenda kwegesaaho omu rubazo rwawe, noija kulyegesaaho n’obutaagasi kandi abarukuhuliiriza na bo nibaija kukirora. (Nfu. 2:4, 5; Ebik. 4:20) Obu oraayecumiitirizaaho ensonga hamu n’ebyahandiikirwe ebiri omu rubazo rwawe nikiija kukukoonyera kutunga ensonga enkuru. Ow’oruganda kuruga omu United States ow’ali omu myaka 70, naakyaijuka orubazo oru yahuliire obu akaba akyali nsinganto, naagamba ati: “Ninkyaijuka omulingo ayahaire orubazo yatwekambisize kwecumiitirizaaho muno Ekigambo kya Ruhanga obu turukuba nitukisoma. Akabaza atarukutiina kandi yasoborra kurungi omulingo tusobora kukikora. Orubazo oru rukahindura obwomeezi bwange; rukakwataho omulingo naasomamuga Baibuli hamu n’enkoragana yange na Yahwe.”
11. Kiki eki osobora kukora kukoonyera abarukukuhuliiriza kugasirwa omu rubazo rwawe? (1 Timoseo 4:13-16)
11 Teekerezaaho ebyetaago ebyabarukukuhuliriiza kandi obakoonyere kumanya omulingo basobora kuteeka omu nkora ebi beegere. Omu kiikaro ky’okubazaaho ebintu ebimanyirwe muno, kozesa Ebyahandiikirwe kugarramu abarukukuhuliiriza amaani kandi obakoonyere kumanya omulingo basobora kuteeka omu nkora Baibuli eki erukugamba. Ekyokurorraho, omukwenda Paulo akagambira Timoseo ebi akaba asemeriire kukora kusobora kwikara haihi na Yahwe, obu akaba naakoonyera ab’oruganda na banyaanya itwe omu Efeeso. (Soma 1 Timoseo 4:13-16.) Teekerezaaho ebintu abarukukuhuliiriza ebi barukwetaaga, kandi obakoonyere kurora omulingo basobora kuteeka omu nkora ebi orukubeegesa.
12. Habwaki kirungi kubaza omu mulingo gwa buli kiro obu orukuba nooha orubazo rwawe?
12 Weerengeseemu orubazo rwawe omu iraka erikuhulirwa nukwo kikukoonyere kubaza nkooku obaza buli kiro obu oraaba nooruha. Obu oraabaza nkooku obaza buli kiro omu kiikaro ky’okuhandiika orubazo rwawe kandi okasoma kigambo ha kigambo, abo abarukuhuliiriza nikiija kubanguhira kukuhuliiriza n’okwetegereza ebi oru kubeegesa. Burocuwa Wekambire Okusoma n’Okwegesa: Egamba eti: “Baza nk’oku obaza buli kiro, kandi omu mulingo ogurukwoleka nk’oku orukwehurra h’abantu abarukukuhuliiriza na ha nsonga ey’orukubazaaho.” Obu oraabaza nkooku obaza buli kiro, abarukuhuliiriza nibaija kutaho omutima ha by’orukwegesa, bagonze kumanya ensonga ezi orukwegesaho, kandi kibeekambise n’okuziteeka omu nkora.
13. Habwaki abeegesa omu kitebe basemeriire kusaba obuhabuzi kuruga hali abo abamazire emyaka nyingi nibaheereza embazo? (Rora n’ekisisani.)
13 Saba ow’oruganda ow’amazire emyaka nyingi naaheereza embazo obukoonyezi. Eki noosobora kukikora ota? Noosobora kugonza kwoleka ow’oruganda ow’amazire emyaka nyingi naaheereza embazo, orubazo rwawe otakaruheeriize kandi hanyuma okozese obuhabuzi obu araakuha omu rubazo rwawe. Ekindi, musabe akuhuliirize obu oraaba nooyerengesaamu orubazo rwawe n’ekigendererwa eky’okukuha obuhabuzi nambere osobora kusemezaamu nk’omwegesa. (Nfu. 1:5) Nikisobora kutatwanguhira kumanya “nambere tusemeriire kusemezaamu,” nahabweki, ow’oruganda naasobora kukukoonyera kumanya omulingo osobora kubazaamu ensonga omu mulingo ogwanguhire kwetegerezebwa, ekiraakoonyera abarukukuhuliiriza kuta omu nkora ebi oru kubeegesa. Itwena nitugonza kufooka abeegesa abarungi, ekiraakoonyera abarukutuhuliiriza kwetegereza kurungi n’okuteeka omu nkora amananu agali omu Baibuli.a
Saba omuntu ow’amazire obwire naahereza embazo kukukoonyera kusemezaamu nk’omwegesa (Rora akacweka 13)
OMULINGO TUSOBORA KWEYONGERA KUFOOKA ABANTU ABARUKUHULIIRIZA KURUNGI
14. Habwaki tusemeriire kuba n’enteekereza nk’ey’omuhandiiki wa Zabbuli 119? (Zabbuli 119:24, 111, 167)
14 Nitwija kufooka abantu abarukuhuliiriza kurungi obu turaayeyongera kusiima okwijukibwa oku tutunga kuruga hali Yahwe. Nitwetaaga okwijukibwa kwa Ruhanga kusobora kugumira ebizibu ebi tukira kutunga omu busumi “obw’akabi kaingi kandi obugumangaine.” (2 Tim. 3:1) Kakuba obwire obumu twehurra ngu tuhuliire ebintu nibyo bimu emirundi nyingi, kirungi kuba n’enteekereza nk’ey’omuhandiiki wa Zabbuli 119 obukirukuhika ha kwijukibwa kwa Ruhanga.—Soma Zabbuli 119:24, 111, 167.
15. Nitusobora tuta kwikara nitusiima ebyokulya eby’omwoyo ebi tutunga omu nsorrokano zaitu?
15 Tusemeriire kuba n’enteekereza ey’ehikire obukirukuhika ha byokulya eby’omwoyo ebi tutunga nkooku Abaisaleeri bakaba baine kwikara baine enteekereza ey’ehikire, obukirukuhika ha manu Yahwe ei akaba naabaha omu irungu. (Kurug. 16:15, 31) Hataroho kugurukyagurukya, Abaisaleeri bakabanzakusiima habw’emanu. Yahwe nuwe yagibahaga, yanuraga kandi yabasobozesaaga kuba boomeezi, baitu akasumi kakahika baatamwa kulya emanu buli kiro. (Kubar. 21:5) Isomo ki eri turukwega?Titusemeriire kurora ebyokulya eby’omwoyo ebi tutunga nk’ebya buli kiro rundi ebirukwikara nibyegarukamu. Oihireho, tusemeriire, kukyetegereza ngu Yahwe nuwe Arukubituha. Tusemeriire kukiijuka ngu biteekaniziibwe ekitebe kya Yahwe n’obwegendereza. Tusemeriire kukiikiriza ngu ebi twega nibisobora kutukoonyera kukora encwamu enungi, n’okulinda obwomeezi bwaitu.—Nfu. 3:13, 16-18; Yoh. 17:3
16. Kiki ekikoonyiire abaheereza ba Yahwe abamazire emyaka nyingi nibamuheereza kwikara nibahuliiriza n’obwegendereza omu nsorrokano?(Rora n’akasanduuko “Amagezi agasobora kutukoonyera kuhuliiriza kurungi.”)
16 Nitusobora kufooka abantu abarukuhuliiriza kurungi kuraba omu kuhondera amagezi agatuhairwe. Weetegereze kiki ekikoonyiire ab’oruganda na banyaanya itwe abaheeriize Yahwe kumara akasumi kwikara nibahuliiriza n’obwegendereza omu nsorrokano. Ashley, ow’amazire emyaka erukuhingura omu 30 naaheereza Yahwe, naagamba ati: “Kuteekaniza kara ebi turukugenda kwega omu nsorrokano kinkoonyera kuhuliiriza kurungi n’obwegendereza. Obu mba ntateekaniize, kingumira kuha eky’okugarukamu kandi ebiteekerezo byange bihuguka.” József, ow’amazire emyaka 52 naaheereza Yahwe, naagamba ati: “Nyegondeza omu kuhuliiriza ebintu nibyo bimu emirundi nyingi obu tuba tuli omu nsorrokano. Obu mpurra embazo ezirukwahukana hamu n’eby’okugarukamu ebirukukwata ha isomo niryo limu, kinkoonyera kwega ebintu ebihyaka ebirukukwata ha isomo eri.” Ayongera agamba ati: “Kakuba ow’oruganda aba atali muhi w’embazo omurungi, nkira kuteeka omutima ha butumwa obu arukubazaaho kuruga omu Kigambo kya Ruhanga hatali ha mulingo arukubazaamu.”
17. Bintu ki ebi osobora kukora kusobora kuhuliiriza n’obwegendereza omu nsorrokano? (Rora n’ekisisani.)
17 Binu nibyo ebintu ebindi ebi osobora kukora kusobora kuhuliiriza n’obwegendereza omu nsorrokano. (1) Otalya muno otakagenzere omu nsorrokano, nukwo oyetantale kugwijagira. (2) Genda omu nsorrokano bukyali kara, nukwo otunge ahokwikarra ensorrokano zitakatandikire. (3) Ekyoma kyawe ekyakalimagezi, kiihemu iraka kandi otakiikiriza kukuhugura obu oraaba oli omu nsorrokano. (4) Teekerezaaho ebirukugenda kubazibwaho omu nsorrokano. (5) Teeka omutima hali ogu arukuha orubazo. (6) Handiika ensonga enkuru rundi teera obusisani obutaito oburukwihayo ensonga enkuru. (7) Teeka omutima ha byahandiikirwe ebirukusomwa kandi olengeho kurora omulingo birukukwatagana. (8) Weekaguze, ‘Ninsobora nta kukozesa ebi nyegere kukoonyera omuntu omu kitebe rundi omu buheereza?’ (9) Ha nsorrokano enkooto, rabamu kara puroguraamu y’ekiro eki, embazo eziraaheebwa, hamu n’ebyahandiikirwe ebikuru ebiri omu buli rubazo. (10) Teekaniza omutima gwawe kuraba omu kwikarra oculiire, n’okuteeka omutima ha bizina hamu n’obuzina obuli omu mulingo gwa vidiyo ebibaho puroguraamu etakatandikire.
Ikara noohuliiriza okwijukibwa kwa Yahwe, otarukwikiriza ekyoma kyawe ekyakalimagezi rundi esimu kukuhugura (Rora akacweka 17)
IKARA NOOHULIIRIZA YAHWE
18. Habwaki tusemeriire kugumizaamu nituhuliiriza n’obwegendereza omu nsorrokano?
18 Tusemeriire kwikara nituhuliiriza omu nsorrokano habwokuba obu tukikora, twikiriza Yahwe kutwebembera omu “mihanda eyokuhikirra.” (Zab. 23:3; 31:3) Nitwetaaga obuhabuzi obu tutunga nukwo tutahuguka kuruga ha muhanda nk’eryato eritwarwatwarwa omuyaga. Nahabweki, “mwegendereze omulingo muhuliirizaamu” kandi muteeke omu nkora obuhabuzi obu mutunga kuruga omu nsorrokano. (Luk. 8:18) Abo abahuliiriza Yahwe, nibaija kutunga okusemererwa hati hamu n’obwomeezi obutahwaho omu kasumi ak’omumaiso.—Zab. 119:2, 14.
EKIZINA 87 Ija! Ogarurwemu Amaani
a Kusobora kutunga amagezi agandi agarukukwata ha mulingo tusobora kusemezaamu nk’abahi b’embazo n’abeegesa, rora burocuwa Wekambire Okusoma n’Okwegesa hamu n’ekitabu Benefit From Theocratic Ministry School Education.