Omulingo Tusobora Kwikazaaho Obunywani n’Abakristaayo Bagenzi Baitu

1. Ninkaha nambere tusobora kusanga abanywani abarungi?

OBWOMEEZI omu biro binu ebya ha mpero bugumire muno. Baitu bweyongerra kimu kuguma, obutuba tutaine abanywani abarungi. Kinu na Yahwe akimanyire kandi niyo ensonga habwaki atuhaire omugisa ogw’okutunga abanywani abarungi kuruga omu baheereza be. Ka mugisa gw’amaani kutunga abanywani abarungi omu baheereza ba Yahwe! (Zab. 119:63) Tuli kicweka ky’eka erukuramiza hamu kandi eteeraniziibwe n’okugonza.

2. Nitugonza kuba banywani ba mulingo ki hali Abakristaayo bagenzi baitu?

² Nitwetaaga kumanya kurungi ab’oruganda na banyaanya itwe. Baitu nitugonza kubairra haihi kandi n’okuba abanywani abeesigwa. Tuli kicweka ky’eka ey’abantu abarukugonza Yahwe, hamu na Yesu kandi okugonza oku, kutuleetera kuba hamu omu bumu. (Yoh. 13:35) Baitu obunywani hamu n’Abakristaayo bagenzi baitu, tibwijaho bwonka. Obunywani nk’obu nibutwetaagisa kutamu amaani. Kandi habwokuba itwena tituhikiriire, obwire obumu nitusobora kutunga ebizibu.

3. Habwaki nikisobora kuguma kwikazaaho obunywani?

³ Amananu gali ngu, nikisobora kutwanguhira kuba banywani nfenanfe n’abantu abamu. Habwaki? Nitusobora kuba twine ebintu ebiturukugonza ebirukusisana, rundi twine emiringo erukusisana. Baitu nihasobora kuba haroho ab’oruganda na banyaanya itwe omu kitebe, abatutasobora kwikara tuli banywani hamu na bo. Obwire obumu, tutunga obuteetegerezangana hagati yaitu, kandi eki nikisobora kuleetera obunywani bwaitu kuceka. Obundi habwokuba tuba n’enteekereza ezirukwahukana, nitusobora kwehurra ngu twine ebintu bike ebiturukusisaniza ebisobora kutuleetera kuba banywani. Kandi obwire obumu obunywani bwaitu nibusobora kulengwa kakuba ow’oruganda rundi munyaanya itwe aba arwaire muno, rundi aine oburwaire obw’okwenuuba. Omu kicweka kinu, nitwija kurora omulingo ekyokurorraho kya Yesu kisobora kutukoonyera kwikazaaho obunywani noobu tutunga obuteetegerezangana. Baitu leka tubanze turole nkooku emiringo ey’Ekikristaayo esobora kutukoonyera kwikazaaho obunywani bwaitu hagati y’ab’oruganda na banyaanya itwe.

EMIRINGO EY’EKIKRISTAAYO ETUKOONYERA KWIKAZAAHO OBUNYWANI

4. Nitusobora tuta kugumya obunywani bwaitu?

⁴ Kusobora kwikazaaho obunywani bwaitu n’Abakristaayo bagenzi baitu, tusemeriire kubaserramu emiringo enungi. Kumara hamu obwire n’ab’oruganda na banyaanya itwe nikisobora kutukoonyera kurora emiringo yabo enungi. Omukwenda Paulo akaba aine ekihika eky’amaani eky’okuba n’Abakristaayo bagenzi be. Akahandiikira Abasesalonika ati: “Tukakora kyona ekirukusoboka kubarora maiso h’amaiso.” (1 Bas. 2:17) Ab’oruganda na banyaanya itwe baingi nibeehurra ngu omulingo ogurukukirayo ogw’okugumya obunywani, nugwo ogw’okumara obwire nibabaza hamu n’abanywani baabo maiso h’amaiso. Twine emigisa nyingi ey’okukora eki obu turukuba nitwejumbira omu buheereza, hamu n’omu nsorrokano ez’ekitebe n’enkooto. Baitu nitusobora kukizoora ngu kumara hamu obwire n’ab’oruganda na banyaanya itwe kyonka, nikisobora kutamaraho ebizibu ebisobora kusiisa obunywani bwaitu.

5. Kiki ekisobora kutukoonyera kwikazaaho obunywani bwaitu, obu haba haroho ebizibu ebisobora kubumaraho? Bazaaho ekyokurorraho. (Abakolosai 3:12)

⁵ Emiringo yaitu ey’Ekikristaayo neesobora kutukoonyera kugumya obunywani bwaitu obu harukuba haroho ekintu ekisobora kubumaraho. (Soma Abakolosai 3:12.) Obu tukurakuraniza emiringo nk’obwebundaazi, okugumiisiriza, embabazi, hamu n’okusaalirirwa abandi, kitukoonyera kusingura ebizibu ebisobora kumaraho obunywani bwaitu. Ekyokurorraho, nkooku orujegere rw’egaali rwetaaga kuteekwamu oilo nukwo rukole kurungi, na itwe nitwetaaga emiringo ey’Ekikristaayo kusobora kwetantara ebizibu ebisobora kusiisa obumu bwaitu. Hati, leka tubazeeho ebizibu eby’emiringo esatu, ebisobora kutulemesa kwikara tuli banywani n’ab’oruganda na banyaanya itwe. Obu turaaba nitubazaaho buli kizibu, nitwija kurora nkooku tusobora kwegera ha miringo ya Yesu nk’obwebundaazi, okugumiisiriza, embabazi, hamu n’omulingo gwe ogw’okusaalirirwa abandi, kandi kinu nikiija kutukoonyera kugumizaamu tuli banywani abarungi aba bantu abandi.

OBU MUTAIKIRRANIZA NA MUNYWANI WAAWE

6. Obutaikirraniza nibusobora buta kumaraho obunywani?

⁶ Habwaki eki kizibu? Obu habaho obutaikirraniza hagati y’abantu, buli omu aba naateekereza ngu enteekereza ye niyo ehikire. Ekyokurorraho, ab’oruganda babiri nibasobora kutaikirraniza ha mulingo guruupu yabo ey’obuheereza esobora kukora ekicweka kyabo eky’okutebezaamu. Kandi buli omu h’ab’oruganda abo naakigumya ngu enteekereza ye, niyo ehikire. Noorora nkooku ekizibu kisobora kweyongera, kandi kikamaraho enkoragana yabo? Buli omu naasobora kutandika kuteekereza nkooku nuwe ahikire omu kiikaro ky’okuteekerezaaho nkooku basobora kwikara bali banywani. Kakuba batabazaaho ekizibu eki n’okuserra omulingo ogw’okukigonjoora, nibaija kwikara baahuliirengana enzigu. Hanyuma y’akaire kake, nibasobora kutandika kwetantarangana, kandi hanyuma obunywani bwabo buhwaho, ebi byona nibisobora kubaho habw’obutaikirraniza ha nsonga entaito muno.

7. Yesu akageesa ata abeegeswa be, ngu obwebundaazi bukuru muno, obukirukuhika ha kumaraho obutaikirraniza?

⁷ Yegera ha bwebundaazi bwa Yesu. Yesu akeegesa abeegeswa be omulingo omukuru ogw’okumaraho obuteetegerezangana, kandi ogu nugwo, ogw’obwebundaazi. Abeegeswa be bakaba mazire akaire nibateera empaka omuli bo, nooha arukukira obukuru. Kusobora kumaraho enyehurra egi ey’ekaba eri omu mutima, Yesu akabasoborra ngu bakaba basemeriire kutwara abantu abandi nk’abarukubakira. (Mat. 20:25-28) Akaba naabeegesa omulingo basobora kuba beebundaazi. N’omu bwire bw’ekiro Yesu atakaisirwe, akaba ‘abateeriireho ekyokurorraho’ kuraba omu kunaabya ebigere byabo omu mulingo ogw’obwebundaazi—ekintu ekyakorwaga abaheereza. (Yoh. 13:3-5, 12-16) Omu mulingo ogu, akabooleka omulingo basemeriire kwikazaaho obunywani bwabo. Kakuba baikara nibarora abantu abandi nk’abarukubakira, nikiija kubanguhira kwikiriza enteekereza ez’abantu abandi noobu kiraaba ngu baine enteekereza ezirukwahukana. Kandi nibaija kwikara bali banywani nfenanfe, noobu kiraaba ngu baine enteekereza ezirukwahukana.

8. Obwebundaazi nibusobora buta kukukoonyera kwikazaaho obunywani n’Abakristaayo bagenzi baawe, obu habaho obutaikirraniza? (Abakolosai 3:13) (Rora n’ebisisani.)

⁸ Noosobora ota kwikazaaho obunywani? Obwebundaazi nibusobora kutukoonyera kutateeka omutima ha butaikirraniza obuleetwaho ensonga entaito n’okuganyira abantu abandi. (Soma Abakolosai 3:13.) Obu orukuba oli mwebundaazi, kikukoonyera kutabiihirwa obu habaho obutaikirraniza, kandi kibakoonyera kwikara muli banywani. (Zab. 4:4) Noobu orukuba obalize ebigambo ebitali by’embabazi, ijuka ngu haroho ebigambo ebi tubaza ebi tuhika tukayeijukya hanyuma. (Mug. 7:21, 22) Weekaguze, ‘Kulemera ha nteekereza yange ngu niyo ehikire, nikikira obunywani bwaitu?’ Noosobora kucwamu okaikiriza enteekereza ya mutaahi waawe. Noija kutunga obusinge omu mutima kakuba ensonga egi ocwamu kutagitaho omutima, rundi kwongera kugibazaaho omu kasumi ak’omumaiso.

9. Obwebundaazi buraakukoonyera buta kakuba obutaikirraniza bwikaraho? (Enfumo 17:9)

⁹ Obwebundaazi nibusobora n’okukukoonyera obutaikirraniza obu bwikaraho. Otalengaho kuteera empaka kwoleka ngu enteekereza yaawe niyo ehikire. (Soma Enfumo 17:9; 1 Kol. 6:7) Weeteereho ekigendererwa eky’okwikazaaho obunywani bwanyu. Ab’oruganda na banyaanya itwe baingi basoboire kukora ekintu kinu, kuraba omu kubaza n’ogu ou batungire na uwe obuteetegerezangana kugonjoora ensonga omu mulingo ogw’embabazi. (Zab. 34:14) Noosobora kugamba oti: ‘Twikaire tuli banywani kumara akasumi. Nitusobora kubazaaho ekibaihirehoga?’ Ikara oyeteekaniize kumugambira ngu ebaire nsobi yaawe, okimanyire nkooku kimusaalize, kandi hanyuma omusabe ekiganyiro. Kandi kakuba ow’oruganda rundi munyaanya itwe na uwe, akusaba ekiganyiro, ba mwebundaazi omuganyire. (Luk. 17:3, 4) Ijuka ngu ekigendererwa kyawe tikiri ky’okwoleka ngu nooha ahikire, rundi ow’ali omu nsobi. Baitu kiri ky’okumaraho obuteetegerezangana n’okwikazaaho obunywani bwanyu.—Nfu. 18:24.

OBU TURUKUBA TWINE ENTEEKEREZA N’ENYETWAZA EBIRUKWAHUKANA

10. Bintu ki ebisobora kugumanganiza obunywani kwikaraho?

¹⁰ Habwaki eki kizibu? Nikisobora kutugumira kuba banywani nfenanfe n’ab’oruganda na banyaanya itwe abaine enteekereza n’enyetwaza ebirukwahukana ha byaitu. Abamu nibasobora kuba baine obugeso oburukutubiihiza. Kandi abamu nibasobora kwetwaza omu mulingo oguturukuteekereza ngu nigubiihiza habwokuba omuntu ondi akabatwaza kubi kara, rundi bakakurra omu buhangwa oburukwahukana, rundi omu buhangwa nambere abantu batakira kubaza enyehurra zaabo, rundi obuhangwa nambere abantu bakira kugonza kubaza muno. Rundi nitusobora kuba nitwahukana habwokuba tugonza kuba muno omu bantu, kandi ondi, tarukukigonza.

11. Kiki ekyakoonyiire Yesu kwikazaaho obunywani bwe n’abo abakaba baine enyetwaza n’enteekereza erukwahukana hali eye?

¹¹ Yegera ha kyokurorraho kya Yesu eky’okugumiisiriza. Akaikazaaho obunywani n’abantu abakaba baine enyetwaza n’enteekereza ebirukwahukana hali ebye. Ekyokurorroho, omukwenda Yakobbo na Yohaana bakagonza kurorwa nk’abarukukira abandi, obu baasabire Yesu ebiikaro eby’amaani omu Bukama. (Mar. 10:35-37) Kwahukanaho na bo, n’obwebundaazi Yesu akalekaho ekiikaro eky’amaani n’ebitiinisa bye eby’omu iguru yaija omu nsi. (Baf. 2:5-8) Teekerezaaho omulingo enteekereza zaabo zikaba nizahukana. Baitu nabwo, Yesu akagumiisiriza Yakobbo, Yohaana, hamu n’abantu abandi.

12. Kiki ekyakoonyiire Yesu kugumiisiriza banywani be?

¹² Yesu tiyanihirramuga banywani be kwikara baine enteekereza ey’ehikire. Akaba akimanyire ngu Yakobbo na Yohaana eki baamusabire kyali nikyoleka omutima ogw’okugonza kukira abandi, ogukaba guli n’omu beegeswa abandi baingi. (Mar. 9:34) Yesu na uwe akaba akuliire omu buhangwa nk’obwabo. Omu buhangwa obu, kuba omu kiikaro eky’amaani kandi ekya haiguru kyatwarwaga kuba kintu ekirukukirayo obukuru. Nahabweki, akeetegereza enteekereza y’abeegeswa be, yabagumiisiriza, kandi atabanihirremu kuhindura ahonaaho enteekereza egi ey’ekaba ebakuliiremu kumara emyaka nyingi.—Mar. 10:42-45.

13. Okugumiisiriza nikwija kutukoonyera kuta kwikazaaho obunywani bwaitu? (Abefeeso 4:2)

¹³ Noosobora ota kwikazaaho obunywani bwawe n’abantu abandi? Ikara nookurakuraniza okugumiisiriza kuraba omu kukora kyona ekirukusoboka kugumiisiriza obugeso obw’abantu abandi oburukukubiihiza. (Nfu. 14:29) Buli omu hali itwe aine emiringo n’engeso ze ebirukwahukana haby’abantu abandi, nyingi ha ngeso ezi tiziri mbi, baitu nizisobora kubiihiza abandi. Nahabweki, tusiima muno abandi obu batugumiisiriza habw’engeso ezi. (Soma Abefeeso 4:2.) N’ekindi, tusemeriire kugumiisiriza abandi tubaleke nkooku bali. Ekyokurorraho, teekerezaaho nkooku kigumira omuntu ow’aine ensoni kumara obwire n’abantu hamu n’okubaza na bo. Ekindi, kitwetaagisa kugumiisiriza omuntu ow’agonza kwikara omu bantu, kandi ow’agonza kubaza muno. Titusobora kunihira buli muntu kuba munywani waitu nfenanfe, baitu tusemeriire kwikara nitwijuka ngu n’abantu abarukwahukana omu nteekereza n’enyetwaza nibasobora kukorra hamu kurungi.

14. Okugumiisiriza kwaitu nikwija kutukoonyera kuteeka omutima hali ki?

¹⁴ Okugumiisiriza nikwija kutukoonyera kuteeka omutima ha miringo enungi ey’ab’oruganda na banyaanya itwe. Obu turaakora eki, nikiija kutukoonyera kuleka kurora enyetwaza n’enteekereza ebirukwahukana hali ebyaitu kutulemesa kuba banywani n’abantu abandi. Ekyokurorraho, Yakobbo na Yohaana bakeegomba ebiikaro eby’amaani; baitu kandi enteekereza yabo egi ekaba neeyoleka ngu, nibaikiriza Obukama bwa Ruhanga buroho kwo. Yesu akeetegereza okwikiriza kwabo kandi yabasiima. Obu tuserra ebirungi omu banywani baitu, tuba nitwegera ha kyokurorraho kya Yesu, hamu na Ise, Yahwe.

15. Nooha asobora kutukoonyera kwikazaaho obunywani bwaitu n’abantu abarukwahukana hali itwe?

¹⁵ Ekirukukiraho obukuru, tusemeriire kusaba Yahwe atukoonyere kwikazaaho obunywani bwaitu n’abantu abatutarukusisana na bo omu nyetwaza n’enteekereza. Teekerezaaho enyikara ezigumangaine ezisobora kubaho kandi osabe Yahwe kara kukukoonyera kwikara oteekaine. Ijuka ngu Yahwe, Omuhangi waitu, naayetegereza ebizibu ebiruga omu kuba bantu abarukwahukana. Nahabweki, obu oraasaba, ikara nookigumya ngu Yahwe amanyire ebi orukwetaaga kusobora kwikara noogumiisiriza. Kandi obu oyehurra ngu okugumiisiriza kwawe nikulengwa, saba Yahwe akuhe omwoyo gwe ogurukwera gukukoonyere kuba n’okwetanga.—Luk. 11:13; Bag. 5:22, 23.

AB’ORUGANDA NA BANYAANYA ITWE OBU BARUKUBA NIBABONABONA

16. Bintu ki ebisobora kutubaho, ab’oruganda na banyaanya itwe obu barukuba nibabonabona?

¹⁶ Habwaki eki kizibu? Ab’oruganda n’abanyaanya itwe obu barukuba nibabonabona rundi beenuubire, nibasobora kubaza rundi kukora ebintu ebirukutubiihiza. Ekyokurorraho, nibasobora kugonza kuba bonka, kuleka kubaza na itwe, kubiihirwa bwangu, rundi nibakora ebintu ebi tutarukubanihirramu. (Yob. 6:2, 3) Nikisobora kuba ngu ab’oruganda na banyaanya itwe nibaraba omu bizibu ebi tutamanyire. Nahabweki, nikisobora kutabanguhira kwetwaza omu mulingo ogu turukubanihirramu.

17. Kiki eki orukwegera ha mulingo Yesu yatwaizeemu omusaija omufu w’amaiso, arukwetwa Batimayo?

¹⁷ Yegera ha kyokurorraho kya Yesu eky’embabazi n’eky’okusaalirirwa abandi. Yakwatirwaga abantu abarukubonabona embabazi kandi abasaalirirwa, otwaliiremu n’abo aba akaba atakatangaanahoga. Ekyokurorraho, teekerezaaho omulingo yatwaizeemu omusaija ow’akaba afiire amaiso arukwetwa Batimayo. Batimayo obu yahuliire ngu Yesu akaba naarabaho, akaleetaho akavuyo yatokera haiguru nukwo Yesu amurole. Abamu omu kitebe ky’abantu bakagambira Batimayo kuculeera. Baitu akaba naagonza muno Yesu amukize, nahabweki, akeeyongerra kimu kutoka. Hataroho kugurukyagurukya, engeso enu ekabiihiza abantu abamu. Baitu Yesu ‘akamukwatirwa embabazi,’ ekirukwoleka ngu akamusaalirirwa muno. (Mat. 20:34; Mar. 10:46-52) Akabaza na Batimayo omu mulingo ogw’embabazi, kandi yamusiima habw’okwikiriza kwe. Kandi Yesu omu mulingo ogw’ekyamahano, akaigurra amaiso ge.

18. Osemeriire kutwaza ota banywani baawe abarukubonabona? (1 Abasesalonika 5:14)

¹⁸ Noosobora ota kwikazaaho obunywani bwawe? Ba muntu ow’embabazi kandi arukusaalirirwa abandi. Emiringo egi enungi, niija kukukoonyera ‘kuhuumuza’ ab’oruganda na banyaanya itwe abarukubonabona rundi abeenuubire. (Soma 1 Abasesalonika 5:14.) Ijuka ngu omunywani ow’amananu aikara ayeteekaniize kukukoonyera kukira muno omu kasumi akagumangaine. (Nfu. 17:17) Omunywani wa mulingo ogu tagarukira ha kusaalirirwa abo abarukubonabona, baitu akora kyona ekirukusoboka kukoonyera abeenuubire, kuraba omu kubagambira ebigambo ebirukugarramu amaani, n’okubakoonyera omu miringo endi.

19. Nitusobora tuta kwoleka embabazi n’okusaalirirwa abantu abandi? (Rora n’ebisisani.)

¹⁹ Miringo ki emu ei tusobora kwoleka embabazi kandi tukasaalirirwa abandi? Amananu gali ngu, tosobora kumaraho obusaasi obw’Omukristaayo mugenzi waawe. Baitu noosobora kulengaho kwetegereza omulingo arukwehurra n’ebintu ebi arukurabamu. (Mat. 7:12; 1 Pet. 3:8) Muhuliirize kurungi, obu arukuba naakugambira ebi arukurabamu. Obu kiraaba kisemeriire, lengaho kukozesa ebigambo ebiraamugarramu amaani. (Nfu. 12:25) Weerinde kuteekereza ngu omanyire buli kimu ekirukukwata ha nyikara yabo, kandi kunu tobimanyire. (Nfu. 18:13) Lengaho kumugumiisiriza kandi otamunihirramu bingi.—Bef. 4:32.

20. Noogonza kuba munywani wa mulingo ki?

²⁰ Itwena tutwara obunywani obuba hagati yaitu n’Abakristaayo bagenzi baitu nk’ekintu eky’omuhendo. Baitu tusemeriire kwijuka ngu, habwokuba tituhikiriire, obwire obumu twetwaza omu mulingo ogu tutasemeriire kwetwazaamu. Baingi hali itwe turabire omu nyikara ezitanguhire ezikwasireho muno obwomeezi bwaitu. Nahabweki, nitusiima muno abo abaikazaaho obunywani bwabo n’Abakristaayo bagenzi baabo kuraba omu kuba abeebundaazi, abagumiisiriza, ab’embabazi, hamu n’abasaalirirwa abandi. Leka na itwe tukole kyona ekirukusoboka kuba banywani abarukwoleka emiringo egi enungi.