Omulingo Tusobora Kwikara Tuli Beesigwa Okwikiriza Kwaitu Obu Kulengwa

1-2. Kiki ekyabaireho Yesu obu akaba naayegesa omu Kaperenaumu?

KIRO kimu, Yesu akaba naayegesa ekitebe ky’abantu omu Kaperenaumu. Akabagambira ati: “Kakuba mutalya omubiri gw’Omwana w’omuntu kandi mukanywa esagama ye, timwine obwomeezi omuli inywe.” Akongera yagamba ati: “Ogu weena anyakulya omubiri gwange kandi akanywa esagama yange, aine obwomeezi obutahwaho kandi ndimuhumbuura ha kiro ekya ha mpero.” (Yoh. 6:53, 54) Baingi h’abeegeswa ba Yesu batagonze ebintu ebi yabalize. Bakagamba bati: “Ebigambo ebi nibitabaijura; nooha asobora kubihuliiriza?”—Yoh. 6:60.

² Abo abaatabaijukire habw’ebigambo Yesu ebi yabalize, bakaleka kumuhondera. Kinu kikabaho ngu habwokuba bakaba batarukwikiririza omuli Yesu naakake? Eki kitakabaireho, bamu, otwaliiremu n’abeegeswa ba Yesu, bakahunirra habw’ebintu Yesu ebi akaba akozere kandi baagamba bati: “Onu nuwe nabbi ow’akaba asemeriire kwija omu nsi.” (Yoh. 6:14) Nahabweki, abeegeswa abo, bakaba baine okwikiriza omuli Yesu. Baitu okwikiriza kwabo obu kwalengerwe, bataikale bali beesigwa hali uwe.

3. Abakwenda bakeetwaza bata hanyuma y’okuhurra ebigambo bya Yesu, kandi habwaki? (Rora n’ekisisani.)

³ Abakwenda bo bakaikara bali beesigwa hali Yesu. Yesu obu yabakagwize na bo obu baraaba nibagonza kumulekaho, Petero akagarukamu ati: “Mukama waitu, turaagenda hali oha? Niiwe oine ebigambo eby’obwomeezi obutahwaho. Tukaikiriza kandi twamanya ngu niiwe Ogu Arukwera owa Ruhanga.” (Yoh. 6:68, 69) Weetegereze ngu Petero atagambe ngu uwe hamu n’abakwenda abandi beetegeriize kurungi amakuru gonyini ag’ebigambo bya Yesu, obu yabagambiire ngu basemeriire kulya ha mubiri gwe kandi banywe esagama ye. Noobu kiraaba ngu na bo bateetegereze kurungi amakuru g’ebigambo gonyini, bakacwamu kwikara bali beesigwa hali Yesu. Habwaki? Habwokuba bakaba nibakigumiza kimu ngu Yesu, nuwe akaba “Kristo wa Ruhanga.”—Luk. 9:20, 35.

4. Bintu ki ebisobora kulenga obwesige bwaitu omuli Yahwe?

⁴ Obwesige bwaitu hali Yahwe nibusobora kulengwa omu miringo nyingi. Ekyokurorraho, twetwaza tuta obu habaho empindahinduka ha mulingo twetegereza ebyahandiikirwe ebimu, rundi obu habaho empindahinduka omu mulingo omulimo gwaitu ogw’okutebeza gusemeriire kukorwamu? Rundi twetwaza tuta obu kitugumira kwetegereza habwaki Yahwe aikiriza ebizibu ebimu kutuhikaho? Ekindi, okwikiriza kwaitu nikusobora kulengwa Omukristaayo munywani waitu nfenanfe obu atukora ekintu kikatusaaliza, rundi omuntu ou turukuteekamu ekitiinisa obu atutwaza kubi.

5. Soborra habwaki okwikiriza kwaitu twine kukwombeka ha musingi ogugumire. (Abakolosai 1:23)

⁵ Kusobora kwetegereza omugaso ogw’okwombeka omusingi gwaitu ha musingi ogugumire, teekerezaaho ekyombeko ekyombekerwe omu kiikaro ekikira kubamu emisisa nyingi. Ekyombeko nk’eki nikyetaaga omusingi ogugumire kusobora kwikaraho kitagwire. Omu mulingo nugwo gumu, kusobora kugumira ebirengo ebiraalenga okwikiriza kwaitu ebibaziibweho eruguru, okwikiriza kwaitu nikwetaaga omusingi ogugumire. Obu turaikara nitugumya omusingi ogw’okwikiriza kwaitu, nitwija kwikara tugumire, kandi tuli beesigwa hali Yahwe obu turaaba nituhikwaho ebirengo.—1 Kol. 15:58; soma Abakolosai 1:23.

6. Kiki ekyakoonyiire abakwenda kwikara bali beesigwa hali Yesu?

⁶ Kiki ekyakoonyire abakwenda kwikara bali beesigwa hali Yesu, abantu abandi baingi obu baamulekereho? Abakwenda bakaba nibakigumiza kimu ngu Yahwe nuwe asemeriire kuramibwa habwokuba nuwe Yahangire ebintu byona; kandi ngu Yesu Mwana wa Ruhanga, ow’aine “ebigambo eby’obwomeezi obutahwaho”; kandi ngu Yesu aine obusagiki bwa Yahwe. Hati, omu kiikaro ky’okuteeka omutima ha miringo nyingi okwikiriza kwaitu kusobora kulengwa, leka tuteeke omutima h’amananu ag’emirundi esatu agaraatukoonyera kwikara tugumire obu turaahikwaho ebirengo. Ganu nugo: (1) Yahwe nuwe Muhangi w’ebintu byona. (2) Yahwe nuwe yatereekeriize Baibuli. (3) Kandi Yahwe naasagika abantu be kasumi kanu. Obu turaaba nitukigumya ngu ebintu binu bisatu gali mananu, nitwija kwikara tuli beesigwa obu turaahikwaho ebirengo ebiraalenga okwikiriza kwaitu.

YAHWE NUWE MUHANGI

7. Okusuukururwa 4:11 ebazaaho ki Yahwe, kandi kinu nikiija kutukoonyera kita obu turaahikwaho ebirengo?

⁷ Soma Okusuukururwa 4:11. Orukarra oru nirutwijukya ngu Yahwe nuwe yahangire ebintu byona. Egi niyo ensonga enkuru habwaki tusemeriire kumuramya. Kandi obu twecumiitirizaaho amaani ge amaingi agarukuhuniiriza, tukigumiza kimu ngu naasobora kutukoonyera obu tuhikwaho ebirengo. Baitu Sitaani aijwize ensi n’ebisuba ebireetera abantu kugurukyagurukya Ruhanga obu araaba aroho. Abanyasayansi abamu bagamba ngu obwomeezi bukaijaho bwonka. Obu turaaba tutarukukigumiza kimu ngu Yahwe nuwe Muhangi kandi naatugonza, nitusobora kutandika kugurukyagurukya obu araaba aroho kwo, rundi obu araaba naasobora kutukoonyera obu tuhikwaho ebirengo.—Baheb. 11:6.

8-9. Kiki eki osobora kukora obu oraatandika kugurukyagurukya Yahwe obu araaba nuwe Muhangi? (Rora n’ekisisani.)

⁸ Obu oraatandika kugurukyagurukya Yahwe obu araaba nuwe Muhangi, gira eki wakoraho ahonaaho. Kora okuseruliiriza omu bitabu byaitu ebirumu obwakaiso oburukwoleka ngu Yahwe nuwe yahangire ebintu byona. Noosobora kutunga obwakaiso omu burocuwa Was Life Created? na The Origin of Life—Five Questions Worth Asking, oburaagumya okwikiriza kwawe. Obwakaiso obundi nibusangwa omu bicweka bya vidiyo “Kikahangwa?” ebiri ha jw.org. Munyaanya itwe omuto arukwetwa Jessica, kuruga United States, naagamba ati: “Hanyuma y’okusoma burocuwa The Origin of Life, nkakigumya ngu haroho omuntu anyakwine amagezi, Ayahangire abantu. Kinu nkaba nkimanyire kuruga kara, baitu hanyuma y’okusoma burocuwa egi, nkeeyongera kukigumiza kimu.” Ekindi, baingi bagasirwe omu kusoma ekitabu “Wegondeze omu Bwomeezi Ebiro n’Ebiro!” isomo erya 6 n’erya 7. Noosobora kuba osomere amasomo ago, baitu habwaki otongera okagasoma?

⁹ Omu kwesomesa kwawe okurukuhonderaho, noosobora kusoma obwakaiso oburukukigumya ngu Ruhanga aroho kwo. Ebi oraasoma nibiija kukukoonyera kugumya okwikiriza kwawe ngu Yahwe aroho kwo kandi bikukoonyere kweyongera kumumanya kurungi. (Bar. 1:20) Ekindi, ebi oraayega noija kubikozesa kukoonyera omuntu weena ow’arukugurukyagurukya Ruhanga obu araaba aroho. Ensonga enkuru eri ngu: Yahwe atuhaire obwakaiso bwingi oburukwoleka ngu nuwe Muhangi waitu.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

YAHWE NUWE YATEREEKERIIZE BAIBULI

10. Habawaki Baibuli y’omugaso muno hali itwe? (2 Timoseo 3:16, 17)

¹⁰ Soma 2 Timoseo 3:16, 17. Omu Baibuli harumu obutumwa kuruga hali Ruhanga, hali abantu. Harumu obwakaiso bwingi oburukukwata ha bwomeezi, etugambira ekigendererwa kya Ruhanga, n’ebintu ebi arukugonza tukole. Nitukigumya ngu Yahwe nuwe yahandikisize Baibuli, kandi eki kigifoora ekitabu ekirukukirayo obukuru omu bwomeezi bwaitu. Nitugonza kukigumya ngu twayetegereza kurungi ebi turukusoma kandi tukole eki turukusobora kubiteeka omu nkora.

11. Kiki ekirukukugumya ngu Yahwe nuwe yatereekeriize Baibuli?

¹¹ Habwaki nitukigumya ngu Yahwe nuwe yatereekeriize Baibuli? Haroho ensonga nyingi. Ekyokurorraho, ebintu Baibuli ebi ebazaaho ebyabaireho kara, bihikire. (Luk. 3:1, 2) Kandi ehikire obu eba neebazaaho obuhangwa. (Yob. 26:7) Baibuli kiri kitabu ekikyakizireyo kugabwa omu nsi, noobu kiraaba ngu emirundi nyingi Sitaani alengereho kugihwerekereza. Baibuli ekahandiikwa abasaija nka 40 abarukwahukana omu kasumi k’emyaka nka 1,600; baitu nabwo, ebi baahandiikire nibikirraniza. Erumu obuhabuzi bwingi obutahwa ha mulembe kandi obukoonyiire obukaikuru n’obukaikuru bw’abantu. (Nfu. 13:20; 15:21; Mat. 7:12) Kandi harumu obunabbi bwingi obuhikiiriziibwe, ekirukwoleka ngu nitusobora kwesiga Baibuli. (Yos. 23:14) Hataroho kugurukyagurukya, Baibuli ekahandiikisibwa Ruhanga!

12. Kiki eki tusemeriire kukora kakuba tutandika kugurukyagurukya Baibuli obu eraaba yatereekereziibwe Ruhanga?

¹² Kiki eki tusemeriire kukora kakuba tutandika kugurukyagurukya Baibuli obu eraaba yatereekereziibwe Ruhanga? Tusemeriire kugambira Yahwe omulingo turukwehurra, tumusabe obukoonyezi kandi hanyuma tukole okuseruliiriza. Ekyokurorraho, ow’oruganda omuto arukwetwa Jordan, ayayegere ebirukukwata hali Yahwe kuruga hali abazaire be, akagamba ati: “Timmara gaikiriza buli kimu kyona eki bangambira. Mbanza kukigumya ngu ebi bangambiire mananu. Baitu buli murundi mba ntarukwetegereza kurungi ebintu ebi nyikiririzaamu, ndengaho kukora okuseruliiriza omu bitabu byaitu, kusobora kutunga eby’okugarukamu eby’ebikaguzo byange.” Obu turaagumizaamu nitukigumiza kimu ngu Baibuli ekatereekerezebwa Yahwe, nitwija kugumya omusingi ogw’okwikiriza kwaitu—1 Kol. 3:12, 13.

YAHWE NAASAGIKA ABANTU BE KASUMI KANU

13. Kiki eki tusemeriire kukora kakuba tutandika kugurukyagurukya abantu ba Yahwe kasumi kanu?

¹³ Kakuba tutandika kugurukyagurukya Yahwe obu araaba naakozesa Abakaiso ba Yahwe kasumi kanu, twine kugira eki twakoraho omu bwangu. Ekyokurorraho, nitusobora kuteekerezaaho eby’okugarukamu eby’ebikaguzo binu: ‘Nibaha abarukukora kyona eki barukusobora kuhondera endengo za Baibuli? Nibaha abaine enyikiriza zaabo zoona ezirukusigikirra ha Baibuli?’ (2 Tim. 4:3, 4) Kandi ‘nibaha abarukukora Ruhanga ebi agonza kasumi kanu?’—Mat. 7:20, 21.

14. Ruhanga naakozesa ata Abakaiso ba Yahwe kuhikiiriza ebigambo ebiri omu Matayo 24:14?

¹⁴ Ruhanga naagonza abantu boona omu nsi bahurre amakuru amarungi, empero etakahikire. Nahabweki, nitusobora kwekaguza: ‘Nibaha abarukutebeza amakuru amarungi kasumi kanu?’ (Mat. 24:14) Nikyeyolekera kimu ngu Yahwe naakozesa Abakaiso ba Yahwe kasumi kanu kukora omulimo ogw’okutebeza. Nubo bonka abarukutebeza amakuru amarungi ag’Obukama omu mahanga agarukuhingura omu 240. Kandi twikaire nitukora omulimo gunu kumara emyaka erukuhingura omu 100 hansi y’Obukama bwa Ruhanga. Kandi twikara tutaire omutima ha mulimo omukuru ogw’okutebeza n’okwegesa.—Mat. 28:19, 20.

15. Abakaiso ba Yahwe beeza bata ibara lya Ruhanga kasumi kanu? (Matayo 6:9; Isaaya 43:10)

¹⁵ Soma Matayo 6:9 na Isaaya 43:10. Twetwa ibara lya Ruhanga, Yahwe, kandi tukyesiimisa habw’okwetwa Abakaiso ba Yahwe. Kasumi kanu, abantu baingi omu nsi tibamanyire ibara lya Ruhanga, baitu tuligarwire omu nkarra nambere lisemeriire kuba omu Baibuli. Nirisangwa omu Baibuli eya New World Translation of the Holy Scriptures emirundi erukuhingura omu 7,000.

16. Habwaki nitusobora kugamba ngu Abakaiso ba Yahwe niboorobera ekiragiro ekirukusangwa omu Yohaana 13:34, 35? (Rora n’ekisisani.)

¹⁶ Soma Yohaana 13:34, 35. Kasumi kanu abantu baingi baine obuteetegerezangana kandi baijwire enobi, baitu abantu ba Yahwe bo b’embaganiza, bagonzangana kandi bali omu bumu. Nituruga omu biikaro ebirukwahukana omu nsi, tukakurra omu nyikara ezirukwahukana, baitu tukora kyona eki turukusobora kwikara omu businge, n’okugonzangana. Wakagendaga omu nsorrokano, omu kitebe eky’omu kiikaro ekindi? Obu kiraaba nukwo kiri, okarora omulingo ab’oruganda na banyaanya itwe hoona nambere bali nkooku barukugonzangana kandi bali omu bumu. Hataroho kugurukyagurukya, Yahwe naakozesa Abakaiso be kukora ebi agonza kasumi kanu. Obu turaikara nitwijuka ngu Yahwe naasagika abantu be kasumi kanu, nikiija kutukoonyera kwikara tuli beesigwa hali uwe, okwikiriza kwaitu noobu kuraalengwa.

OTALIREKAHO YAHWE

17-18. Nyikara ki ezigumangaine ezisobora kutuhikaho, baitu n’obumanzi kiki eki turaagamba?

¹⁷ Omu biro binu ebya ha mpero, itwena nitwija kuhikwaho enyikara ezigumangaine. (2 Tim. 3:1, 13) Nitusobora kuhikwaho enyikara ezindi ezigumangaine. Ekitebe kya Ruhanga nikisobora kukora encwamu ezimu ezisobora kutugumira kwetegereza. Rundi nitusobora kwehurra ngu ow’oruganda rundi munyaanya itwe atwetegeriize kubi rundi naatukora ekintu ekirukutusaaliza muno. Nitusobora kutamanya omulingo ogw’okumaraho ekizibu ahonaaho, rundi nitusobora kulemwa kwetegereza habwaki ebintu ebimu nibituhikaho.

¹⁸ Noobu kiraaba ngu nitusobora kusaasa rundi kwetuntura habw’ebintu ebiriyo nibitubaho, nitwija kwikara tuli beesigwa hali Yahwe obu turaaba nitukigumiza kimu ngu nuwe Muhangi, Baibuli Kigambo kye, kandi ngu Abakaiso ba Yahwe, bantu be. Nkooku Petero yagambiire Yesu, na itwe nitusobora kugambira Yahwe tuti: “Mukama waitu, turaagenda hali oha? Niiwe oine ebigambo eby’obwomeezi obutahwaho.”