Yahwe Aikaire Nantendeka Kurugira Kimu omu Buto Bwange

Ntakagumiizeemu, leka mbanze mbagambire ha byafaayo byange kurugira kimu ha kutandika. Nkazaalirwa omu kasumi ak’Obulemu obw’Ensi Yoona Obwa Kabiri omu Calgary, Canada. Ha kumalirra kw’emyaka 1940, Payoniya omuto arukwetwa Donald Fraser akateera kodi ha mulyango gw’eka yaitu kandi nyinanyowe akaikiriza kwegesebwa Baibuli. Akagonza muno ebi akaba naayegesebwa kuruga omu Baibuli, baitu habwokuba akaba arwaire muno akaba atasobora kugenda omu nsorrokano butoosa. Baitu nabwo akakurakurana kandi yabatizibwa omu mwaka gwa 1950. Eky’obusaasi akafa atakahikize n’emyaka ebiri abatiziibwe. Omu kasumi ako isenyowe akaba atakafookere omu h’Abakaiso ba Yahwe, baitu nabwo akaikiriza Abakaiso ba Yahwe kwebembera omu kuziika nyinanyowe.

Hanyuma y’okurabaho ebiro bike nyinanyowe amazire kufa munyaanya itwe omu ow’arukwetwa Alice ow’akaba akuzire omu myaka, kandi ow’akaba aseeserweho amagita akandaaliza kugenda omu rusorrokano. Akaba ammanyire habwokuba nagendaga omu nsorrokano eza ha wiikendi na nyinanyowe obu yaabaga atungiire amaani. Nkasaba isenyowe kunyikiriza kugenda. Akaikiriza kandi yacwamu kugenda nanyowe “omurundi gumu gwonka” obu naagonza kusiima ow’oruganda ayahaire orubazo ha rufu rwa nyinanyowe. Kiro eki hakabayo Isomero ly’Omulimo gwa Ruhanga hamu n’Ekicweka ky’Obuheereza. Mali runu rwali rusorrokano orusemeriire, isenyowe kubanza kubamu. Isenyowe akaba asomeriire eby’okubaliza omu rwijwire rw’abantu kandi akakwatwaho muno habw’embazo enungi ezaahairwe omu rusorrokano oru. Akacwamu kubaga ha rusorrokano oru buli wiiki. Mpora mpora akatandika n’okwijaga omu nsorrokano zoona.

Omu biro ebi, ow’oruganda ayayebemberaga orusorrokano yatandikaga naasoma omu iraka erirukuhulirwa amabara g’ab’oruganda abakaba bali omu isomero, kandi buli omu obu yahurraga ibara lye yagambaga ati, “Ndi hanu.” Kiro kimu nkasaba ngu nanyowe ibara lyange lisomwe ha rusorrokano orukaba nirwongeraho. Ow’oruganda akansiima muno, baitu atankaguze obu ndaaba nkaba mmanyire ebikaba nibizingirwamu.

Nkaba ntakimanyire ngu kubasaba kusoma ibara lyange kikaba nikimanyisa ngu nkaba nyehaireyo kuha embazo ha rusorrokano. Wiiki eyahondiireho, ibara lyange likasomwa kandi noomuhimbo mwingi nagarukamu nti, “Ndi hanu.” Hanyuma y’orusorrokano, ab’oruganda na banyaanya itwe bakansiima muno. Hanyuma y’okurabaho wiiki nyingi nkaheebwa orubazo oru mbalizeehoga ha kutandika kw’ekicweka kinu.

Omu kasumi ako, abeegi baanihirwamuga kuteekaniza embazo ezaabaga ziine edakiika ezinyakuli hagati ya mukaaga kuhika ha munaana. Omu kasumi ako, titwagarukiraga ha kusoma enkarra ezimu ezihairwe kuruga omu Baibuli. Isenyowe akankoonyera kuteekaniza orubazo oru, kandi akangambira kurwerengesaamu emirundi 20 ntakaruhaire. Hanyuma y’okuha orubazo oru, omuroleerezi w’orusorrokano akampa obuhabuzi obwankoonyire muno. Kumara emyaka nyingi, Yahwe aikaire nantendeka kuraba omuli isenyowe, ab’oruganda na banyaanya itwe, hamu n’ekitebe kye.

YAHWE AKAGUMIZAAMU NANTENDEKA

Alice, ou nsangirwe mbagambiireho akantendeka muno obu natandikire okutebeza. Omu kasumi ako, twasomeraga omuntu ou turukutebeza ebyahandiikirwe bisatu kandi hanyuma tumuha ekitabu. Akaire kange obukaahikaga ak’okutebeza omuntu, Alice nuwe yayeyanjuraga, atandika kubaza na uwe, kandi hanyuma ansaba kumusomera ekyahandiikirwe eky’okubanza. Kandi hanyuma naagumizaamuga nimbaza n’omuntu ogu, mmusomera ekyahandiikirwe ekya kabiri n’ekya kasatu kandi mmuha n’ekitabu. Obwire bukahika nayega omulingo gw’okutandika kubaza n’omuntu hataroho ow’ankoonyiire. Hanyuma ya isenyowe kubatizibwa omu 1954, akagumiizaamu nantendeka omu kutebeza. Akakokora kyona ekirukusoboka kunkuliza omu mananu noobu kiraaba ngu akaba nankuza ali wenka. Yatwaraga ebintu eby’omwoyo nk’ekintu ekikuru muno hali uwe. Naikaraga nkimanyire ngu tusemeriire kwejumbira omu nsorrokano zoona n’okutebeza ha wiikendi.

Omu myaka 12 ei namazire ha isomero, nkeega ebintu bingi muno ebiikaire nibinkoonyera omu bwomeezi bwange. Nkeega bingi ebirukukwata ha isomo ly’okubara hamu n’okubaza kurungi orulimi Orungereeza. Amasomo ag’Orungereeza aga nakozere hamu n’isomo ly’okwehangahanga obu nimpandiika ha bintu ebirukwahukana gankoonyiire muno omu bujunaanizibwa obu nyine hati obu ninkorra hamu n’Ekitongole Ekirukujunaanizibwa n’Okuhandiika.

Abantu bakira muno kunkaguza habwaki ngonza muno kuzina. Abazaire bange boona baagonzaaga muno okuzina. Obu nahikize emyaka musanju, nkatandika kwega kuteera enanga ha bw’akacu, baitu omwegesa wange atasiime ebintu ebi nkaba ninkora. Nahabweki akagambira isenyowe ngu ndeke kwega. Niinyetegereza habwaki omusomesa wange akaba naagonza mbireke, nkaba ntaine ekihika ky’amaani eky’okwega kasumi ako.

Hanyuma y’okurabaho emyezi nke, isenyowe akantungirayo omwegesa ondi. Ha murundi gunu nkeega kuteera kurungi enanga hamu n’okuzina. Obu nkaba nkyali muto, nkaba nyine iraka erirungi muno kandi nkasinga empaka ezimu ez’okuzina. Nkaba nyine ekigendererwa eky’okufooka mwegesa w’okuzina nukwo ntunge sente ezirankoonyera kuheereza nka payoniya. Baitu nkakyetegereza ngu nkaba niinyija kumara obwire bwingi ninsomaho eby’okuzina kandi niinyeteekaniriza ebizaamu. Nahabweki omu mwaka gwa 1963, nkaleka kusomerra eby’okuzina kandi natandika kuheereza nka payoniya ow’akasumi koona.

KUHEEREZA NKA PAYONIYA KIKANDEETERA OKUSEMERERWA

Hanyuma y’okumara omwaka gumu nimpeereza nka payoniya, nkasindikwa kuheereza nka payoniya ow’embaganiza omu Kapuskasing, Ontario. Payoniya ou nakoraga na uwe ow’arukwetwa Daniel Skinner akaba naateezaamu emyaka yange emirundi ebiri. Akanyegesa bingi muno ebirukukwata ha mulingo ekitebe kikoramu. Nkakomwa kuheereza h’Akatebe ak’Obuheereza omu kitebe obu nkaba nyine emyaka 20. Nahabweki nkaba nyine ebintu bingi muno eby’okwega. Nyine okusemererwa kwingi muno habwokuba ekitebe hati kyongiire kyata omutima ha kutendeka ab’oruganda abato. Kakuba ab’oruganda banu beekamba, Yahwe naasobora kubakozesa kuhikiiriza ebintu bingi muno omu myaka yabo y’obuto.

Obwire obumu kyangumiraga okwikara omu Kapuskasing. Haroho enyikara y’obwire obu yafukaga muno. Nyowe na Dan twakiraga kurubata n’ebigere obu twabaga twine nambere turukugenda. Gumu ha migisa ei natungire omu bujunaanizibwa obu, gwali gw’okutangaana munyaanya itwe ow’arukwetwa Linda Cole, ayahikire yafooka Linda Splane.

Linda yagonzaaga muno kutebeza kandi akaba aine abantu baingi abarungi ab’okugarukira. Akaba ali mugabi, w’embabazi, kandi ow’arukugonza kumara obwire n’abantu. Nyina, arukwetwa Goldie akaba ali munyaanya itwe omwesigwa. Ise arukwetwa Allen, ha kubanza yahakanizaaga amananu, baitu eki noobu kiraaba nukwo kyabaire, Goldie yagendaga na Linda ha Kyombeko ky’Obukama ali hamu na bagenzi be aboojo, John na Gordon kandi yabatendekaga noobu baabaga bali omu kutebeza. Akasumi kakahika Goldie, Linda, John, na Gordon, boona baafooka bapayoniya. Hanyuma y’okurabaho emyaka, isebo Allen na uwe akaikiriza amananu kandi yayekamba muno omu kitebe.

Omu 1965, nkaraalizibwa omu Isomero ly’Abagurusi n’Abaheereza ha Bbeseeri ey’omu Canada erikaba nirimara omwezi gumu kusobora kwongera kutendekwa. Obu nkaba ndi omu isomero eri, nkasabwa kwijuza foomu ey’okugenda omu Isomero erya Giriyaadi. Nkaba ntakateekerezaahoga kuheereza nk’omumiisani, baitu nabwo, nkaijuza foomu. Nkaikirizibwa kuba omu Kilaasi eya 42. Omu Isomero lya Giriyaadi, abeegesa baitu baatuhandiikiraga kutwoleka omulingo tukaba nitukoramu. Ebbaruha ei nabandize kutunga ekaba nenyekambisa kutamu amaani kwega ebirukukwata ha kitebe kya Yahwe. Omu kasumi ako nkaba nyine emyaka 21, nahabweki amagezi ago mali nkaba ningeetaaga.

Kimu ha bintu ebi twayegesiibwe omu Isomero lya Giriyaadi nugwo omulingo gw’okukwatamu ensonga ez’abanyamakuru abarukutwarramu abarukukora ha tivi, ha rediyo, n’omu mpapura z’amakuru. Ekintu eki nkakigonza muno. Nkaba ntamanyire ngu ekintu kinu kikaba nikiija kunkoonyera muno omu kasumi ak’omumaiso nkooku ndukugenda kubasoborra.

KUGENDA OMU SENEGAL

Hanyuma y’okurabaho ebiro bike tumaliriize Isomero erya Giriyaadi, nyowe na Michael Höhle, ou bampaire kuheereza na uwe nk’abamiisani, tukasindikwa kuheereza omu Senegal, Afrika. Omu kasumi ako, omu Senegal hakaba haliyo abatebezi nka 100.

Hanyuma y’okurabaho emyezi nyingi niinyejumbira omu buheereza bwange bunu, nkaraalizibwa kukorra ha ofiisi y’itaagi ekiro kimu omu wiiki. “Ofiisi y’itaagi” ekaba eri omu kisiika kimu kyonka ekikaba kiri omuka y’abamiisani. Noobu kiraaba ngu ofiisi ekaba eri ntaito, Emmanuel Paterakis ow’akaba naaheereza nk’omuroleerezi ha itaagi, akanyijukya ngu, itaagi eri likaba nirikikirra ekitebe kya Yahwe omu ihanga eri. Kiro kimu Ow’oruganda Paterakis akacwamu ngu tuhandiikire abamiisani ebbaruha erukubagarramu amaani. Omu kasumi ako, kyali kitanguhire kuhandiika ebbaruha emu hanyuma okagiteeramu kopi nyingi, nahabweki tukahandiika buli bbaruha nitukozesa ekyoma ekirukwetwa typewriter. Ogu gwali mulimo ogugumire muno habwokuba tukaba twine kukigumya ngu titwakora ensobi yoona!

Obu nkaba niinyeteekaniza gukarukayo omu ka y’abamiisani, Ow’oruganda Paterakis akankwasa ebbahaasa. Akangambira ati, “David, ekitebe kikuhandikiire ebbaruha.” Obu nasumurwire ebbahaasa, nkasangamu emu ha bbaruha ezi nkaba mpandiikire! Ekintu eki kikanyegesa kutamu ekitiinisa ekitebe, ofiisi y’itaagi k’ebe eri ntaito rundi nkooto.

Nkanywana abatebezi baingi omu kitebe kandi namaraga na bo obwire bwingi buli Kyamukaaga rwebagyo. Obusumi obu nabwegondezaamuga muno. Na kasumi kanu nitukyabaza hamu n’abantu abo! Obu nkaba ndi omu Senegal, nkeega orulimi Orufaransa habwokuba nurwo orulimi orukozesebwayo kandi runkoonyiire muno obu mbaire nimbungira ofiisi z’amataagi kwetoroora ensi, nambere babaza Orufaransa.

Omu 1968, nyowe na Linda tukaraganizangana kutaaha obuswere. Kumara akasumi, nkalengaho kuserra omulimo ogw’okukora esaaha nke, nukwo nyowe na Linda tusobole kuheereza nka bapayoniya, baitu abarukugaba emirimo abarukukira obwingi baakiraga kuha emirimo abantu ab’omu kiikaro. Hanyuma, obu nagarukire omu Canada, tukataaha obuswere kandi tukakomwa kuheereza nka bapayoniya ab’embaganiza omu Edmundston, New Brunswick, orubuga orutaito orukaba ruli ha nsaro ya Quebec.

KUHEEREZA NKA BAPAYONIYA OMU NEW BRUNSWICK NA QUEBEC

Nyowe na Linda obu tukaba tutakasindikirwe omu Edmundston, hakaba hataliyo abatebezi oihireho abeegi ba Baibuli bake. Ediini ey’Abakatuliki ekaba neerema haihi buli muntu weena omu kiikaro eki. Haihi buli ka ekaba eroho akapande akaroho ebigambo Abakaiso ba Yahwe Tibarukwikirizibwa Hanu. Omu kasumi ako obupande tibwayeraliikirizaaga muno nkooku burukweraliikiriza kasumi kanu, nahabweki twagumizaamuga nitugenda buli ha nju. Buli wiiki Abakatuliki baataga akarango omu mpapura z’amukuru akarukugamba ngu: “Leka twesorooze tumarreho kimu Abakaiso ba Yahwe.” Omu Edmundston hakaba harumu Abakaiso ba Yahwe bbana bonka Victor, Velda Norberg, Linda, nanyowe—nahabweki tukaba tukimanyiire kimu ngu bakaba nibamanyisa itwe.

Tindyebwa orubungo orw’okubanza orw’omuroleerezi w’ekicweka. Hanyuma y’okumara na itwe wiiki akagamba ati, “Obundi ekintu eki musobora kukora mukyali hanu nukwo kukoonyera abantu kuhinduramu omulingo baroramu Abakaiso ba Yahwe.” Kuruga kasumi ako kinu tukakifoora kigendererwa kyaitu kandi kikarugamu ebirungi. Mpora mpora abantu bakatandika kurora embaganiza ey’ekaba eri hagati y’Abakaiso ba Yahwe abakaba bali beebundaazi hamu n’abeebembezi b’ediini ey’Abakatuliki ab’emyehembo. Nambere turukubaliza, omu rubuga oru haliyo ekitebe ekitaito.

Hanyuma y’okumara nk’omwaka omu kiikaro eki ekikaba kyesoroire, tukaraalizibwa kugenda kusagika ekitebe ekikooto omu rubuga rwa Quebec. Tukamarayo emyezi mukaaga ei twayegondizeemu muno tuli hamu n’ab’oruganda na banyaanya itwe abagabi batakaturaaliize kugenda omu mulimo gw’okubungira ebitebe.

Emyaka 14 eyahondiireho tukagimara nitubungira ebitebe omu Quebec. Mali tukeegondeza muno omu busumi obu. Omulimo gw’okutebeza omu Quebec gukaba nigurugamu ebirungi bingi, kandi n’omu bitebe ebi twabungiraga twakiraga kutangaana abantu abarukukira hali omu abarukuruga omu ka emu baliyo nibeega Baibuli kandi nibagonza kufooka Bakaiso ba Yahwe.

KWIJUKA ABO ABAAKOZERE N’AMAANI

Ab’oruganda na banyaanya itwe abarukubaza Orufaransa abarukuruga omu Canada banguhire kugonza. Tibeeserekerra, baine okusemererwa, kandi beekambi. Baitu tikyabanguhiraga kwikiriza amananu, kandi baahikwahoga okuhiiganizibwa okw’amaani kuruga hali abanyabuzaale. Bamu h’ab’oruganda na banyaanya itwe abato baabagambira bati: “Komamu kimu ha bibiri, kuleka kwega n’Abakaiso ba Yahwe rundi kuruga omuka.” Bakaikara bali beesigwa hali Yahwe noobu kiraaba ngu baali nibahikwaho okuhakanizibwa oku. Hataroho kugurukyagurukya obwesigwa bwabo busemeza muno Yahwe.

Hati ningonza n’okubazaaho bapayoniya ab’akasumi koona abeesigwa hamu na bapayoniya ab’embaganiza abaaheerezaaga omu Quebec. Abarukukira obwingi bakaruga omu biikaro ebindi eby’omu Canada. Eki nikimanyisa ngu bakaba batarukwija kugarukira ha kwega orulimi Orufaransa, baitu bakaba baine n’okwega ha buhangwa bw’abantu ab’omu kiikaro abaali batwaliriziibwe muno ediini y’Abakatuliki, hamu n’omulingo bateekerezaamu.

Emirundi erukukira obwingi bapayoniya ab’embaganiza baabasindikaga kuheereza omu biikaro ebyesoroire nambere hakaba hatali abatebezi boona. Habw’okusoroora kw’abantu ab’omu kiikaro, kyabagumiraga muno kutunga oburaaro n’emirimo ey’okukora obwire buke. N’ab’oruganda na banyaanya itwe abaabaga baakaruga kutaaha obuswere baikaraga n’ab’oruganda na banyaanya itwe abandi abarukuhika nka munaana, nukwo kibasobozese kusasura hamu ebisale by’enju. Bakaba batarukusobora kwikara bonka. Bapayoniya banu baali beekambi muno. Obu baatandikaga kwegesa omuntu Baibuli baakoraga kyona ekirukusoboka kwikara nibamukoonyera. Hati nkooku omu Quebec hatakyaliyo obwetaago bw’amaani, baingi hali bo bagenzere omu biikaro ebindi nambere hali obwetaago bw’abatebezi.

Obu tukaba nituheereza omu mulimo gw’okubungira ebitebe twakiraga kukora n’ensinganto buli Kyamukaaga nyekyakara, kinu kikatukoonyera kumanya ebizibu ebi bakaba nibarabamu. Bamu ha nsinganto abatwakoraga na bo hati nibaheereza nk’abamiisani omu mahanga agandi kandi abandi baine obujunaanizibwa obundi

Omu kasumi ako, ebitebe ebimu tibyasoboraga kutugarurra sente ezi twabaga tukozeseze omu by’endubata, nahabweki obwire obumu sente zaabaga zituhoireho nambere okwezi kwahwerayoga. Omu bwire obu, twayesigira kimu Yahwe habwokuba nuwe yabaga amanyire enyikara zaitu, kandi atatulekeho. Twasoboraga okuruga omu kitebe ekimu kandi tugenda omu kindi.

AMASOMO AGA NAYEGIIRE HALI ABANDI

Obu nkaba ndi omu Quebec, hakaba haroho emigisa nyingi ey’okutebeza ha rediyo, ha tivi, hamu n’omu mpapura z’amakuru. Nahabweki kikansemeza muno ngu nkaba nyegere ebintu binu obu nkaba ndi omu Giriyaadi. Nakoraga muno na Léonce Crépeault, na uwe ow’akaba ali omu mulimo ogw’okubungira ebitebe kandi ow’akaba ali murungi muno omu kukorra hamu n’ab’amakuru. Obu yabaga naabaza n’abantu ab’amaani muno omu makuru, tiyagonzaga kubooleka ngu amanyire bingi, oihireho, yatandikaga kubaza na bo naagamba ati: “Ow’ekitiinisa, nyowe na mugenzi wange, tuli batebezi. Tumanyire bike muno obukirukuhika ha kubaliza ha tivi rundi ha rediyo. Baitu tuhairwe obujunaanizibwa obw’okumanyisa abantu boona ha rusorrokano orukooto orw’Abakaiso ba Yahwe oru turukwija kuba narwo. Nitwija kusiima obukoonyezi bwona obu muraatuha.” Habwokuba yayolekaga obwebundaazi, abanyamakuru baingi baagonzaaga kutukoonyera.

Hanyuma, itaagi likansindika kugenda kukorra hamu n’Ow’oruganda Glen How, omu ha baalooya baitu ha misango ey’egumire muno abanyamakuru ei baagonzaaga kubazaaho. Nkagasirwa muno kuruga omu kutendekwa oku natungire omu Giriyaadi, hamu n’okukorra hamu n’Ow’oruganda Léonce. Mali gukaba mugisa gw’amaani kukorra hamu n’Ow’oruganda How. Tiyatiinaga obu yabaga naatonganirra ekitebe omu mbuga z’ebiragiro. Baitu ekirukukirayo obukuru, yagonzaaga muno Yahwe.

Omu 1985 tukasindikwa kuheereza omu kiikaro ekikaba kiri haihi n’eka ya isenyowe omu Canada, ekyatusobozeseze kumurolerra. Hanyuma y’emyezi esatu, akafa. Tukagumizaamu nitubungira ebitebe omu Canada kuhikira kimu omu 1989 obu twaraaliziibwe kufooka Ababbeseeri omu United States. Tukaba twine kulekaho omulimo ogw’okubungira ebitebe, ogu tukaba tukozere kumara emyaka haihi 19. Emyaka egi yoona tukagimara nituraara omu maka g’ab’oruganda na banyaanya itwe baingi ab’amakune kandi nitulya na bo ebiihuro. Mali nitusiima muno ab’oruganda na banyaanya itwe boona abaatwikirizaaga kuraara omu maka gaabo n’okulya na bo ebiihuro!

KUHEEREZA HA BBESEERI OMU UNITED STATES

Obu twahikire omu Brooklyn, bakansaba kukora omu Kitongole ky’Obuheereza. Mali ninsiima muno habw’okutendekwa oku natungire omu kitongole eki. Limu h’amasomo aga nayegere nukwo kutateekereza ngu nyetegeriize ekintu ntakamanyire byona ebirukukikwataho. Hanyuma omu 1998, nkasabwa kuheereza omu Kitongole Ekirukujunaanizibwa n’Okuhandiika nambere nkyali, kandi niinyega bingi. Kumara emyaka nyingi nkatunga omugisa ogw’okukoonyera Ow’oruganda John Barr, ow’akaba ali muteeraniza ow’Akatebe Akahandiiki. Mali tindyebwa okutendekwa oku natungire kuruga hali uwe hamu n’obwire obu namazire na uwe. Mali akaba ali w’oruganda ayahonderaga ekyokurorraho kya Kristo.

Mali guli mugisa gw’amaani kukorra hamu n’ab’oruganda na banyaanya itwe abeebundaazi abarukuheereza omu Kitongole Ekirukujunaanizibwa n’Okuhandiika. Bakira muno kusaba Yahwe kubakoonyera kuhikiiriza kurungi obujunaanizibwa bwabo, kandi bakimanyire ngu buli kimu kyona eki bahikiiriza, bakihikiiriza hatali habw’obusobozi bwabo, baitu habw’omwoyo gwa Yahwe.

Ekindi, nyowe na Linda tukatunga omugisa ogw’amaani ogw’okubungira ab’oruganda na banyaanya itwe abeesigwa omu mahanga 110. Tusoboire kwerorra omulingo ab’oruganda na banyaanya itwe abarukuheereza nk’abamiisani, ab’oruganda abarukuheereza ha butebe bw’amataagi, hamu n’abandi abarukuheereza omu buheereza obw’akasumi koona obw’embaganiza, barukugonzaamu Yahwe. Ekindi, tusoboire kurora obwekambi n’obwesigwa obw’abatebezi abarukwebembeza Obukama, noobu kiraaba ngu nibahikwaho obulemu, ebizibu omu by’entaahya, hamu n’okuhiiganizibwa. Mali, Yahwe naabagonza muno!

Kumara emyaka nyingi, Linda aikaire nankoonyera kuhikiiriza obujunaanizibwa bwange. Agonza muno abantu kandi aikara naaserra emiringo ey’okubakoonyera. Ekindi, amanyire kurungi kutandika kubaza n’abantu. Akoonyiire baingi kwega hali Yahwe, otwaliiremu n’abo abakaba balekere kuheereza Yahwe, kwongera kumuheereza. Mali, Linda ali kisembo ekirungi kuruga hali Yahwe! Nkooku nyowe na Linda tuliyo nitukura omu myaka, nitusiima muno ab’oruganda na banyaanya itwe abato, abatukoonyera obu tuba twine orugendo hamu n’omu miringo endi.—Mar. 10:​29, 30.

Mali obu nteekerezaaho emyaka 80 ey’erabireho, nsiima muno Yahwe. Niinyikirraniza n’omuhandiiki wa zabbuli ayahandiikire ati: “Ai Ruhanga, niwe wanyegeseze okuruga omu buto bwange; Kandi okuhikya hati nkatebeza emirimo yawe eyamahano.” (Zab. 71:17) Eki nikyo ndukugonza kugumizaamu ninkora obwomeezi bwange bwona.